الموضوع: امشي بالراحه توصل بسرعه

السلام عليكم ورحمة الله وبركاته،،،

أنا عارف ناس كتير بيجروا بالعربيه عشان عنهم ثقه جامده أوي في سواقتهم وأنا فعلاً مقتنع بمهارتهم الشديده في السواقه لكن دايما أنصحهم وأقول إن في عيوب كتيره مش بتبان في العربيه إلا على السرعات العاليه أوي، ولو لا قدر الله حصل حاجه مش متوقعه هايكون الزمن المتاح لتدارك الموقف قصير جدا وقد يحدث ما لا يحمد عقباه.

ممكن يحصل حاجه في الكاوتش ولا في العفشه تخلي العربيه تخرج عن السيطره تماما.

أكيد كلنا ساعات بنستجيب لرغبة السرعه بس أنا عن نفسي لما أحس إني بدأت أنسى نفسي بافكر في كام حاجه كده، باتخيل لو حصل حاجه لا قدر الله أنا ممكن أكون سبب في تعاسة أسره كامله سواء أسرتي أو أسرة أي حد أنا تسببت في أذاه. وبافكر برضه إني ممكن أضر نفسي جامد.

يا جماعه بلدنا مش بتاعت جري عشان طرقنا مش طرق جري وعربياتنا أي كلام معظمها والعربيه اللي بتجري ما بتقفش :)

وأكيد طبعا جهل معظمنا الشديد بقواعد السواقه بيخلي حوادث كتير تحصل بسبب الجهل أو الغباء في السواقه وسوء التقدير

وفي النهايه طبعا كلنا عارفين إن الواحد لا قدر الله لو جراله حادثه فأكيد الإسعاف هاييجي بعد أما أكون خلصت

بلدنا مش بتاعت جري

ربنا يسترها معانا جميعا وآسف للإطاله