عايز اعرف معدل استهلاك البنزين لتويوتا ياريس ....... يعنى لو حد حسبه يقولنا , علشان نعرف المتوسط كام .:3_3_102[1]:
عرض للطباعة
عايز اعرف معدل استهلاك البنزين لتويوتا ياريس ....... يعنى لو حد حسبه يقولنا , علشان نعرف المتوسط كام .:3_3_102[1]:
شوف حضرتك ...
أنا هأقولك علي حساباتي من واقع سفري بالعربية داذما :
- سعة الخزان 42 لتر
- متوسط المسافة المقطوعة ذهابا و أيابا = 520 كم
- كمية البنزين المستهلك في عملية أعادة التفويل = 48 لتر
من خلال هذا ..
متوسط الاستهلاك = 520 كم / 48 لتر = 10.8 كم / لتر
مع ملاحظة الاتي :
- متوسط سرعاتي أثناء السفر : (120 - 140) كم/ساعة
- متوسط عدد لفات المحرك : (3000 - 4500) لفة/دقيقة
- التكييف : يعمل طوال الرحلة ذهابا و عودة
- الحمولة : أنا فقط
- الطريق : القاهرة / بورسعيد / دمياط و العكس
- مقاومة الهواء : شديدة أحيانا في رحلة الذهاب و من متوسطة الي خفيفة أثناء العودة ليلا
- حالة الاطارات : جيدة جدا (بنسبة 85 %)
- العربية : أوتوماتيك موديل 2008
طبعا السرعات اللي ذكرتها سرعات غير أقتصادية و لكن أعتقد أن في السرعات الاقل (90 - 100) كم/ساعة سيكون الاستهلاك أقل بكثير و لكني لم أجرب السفر علي هذه السرعات بشكل فعلي
مع خالص تحياتي
م/ سمير الشهاوي
التفويله بتكفى للمشى مسافه حوالى 420 كيلو داخل البلد.. دا من التفويل لحد ما توصل لاول شرطه فى التانك وطبعآ حيكون لسه فاضل الشرطه الاخيره حتمشى معاك شويه بردو بس بلاش توصل العربيه للشرطه الاولى
شكرا يا جماعة على المشاركة .......
بس معلش يا باشمهندس سمير الحته دى مش فاهمها ... يعنى ايه ؟
- كمية البنزين المستهلك في عملية أعادة التفويل = 48 لتر
عربيتى 2008 مانيوال
بتعمل فى السفر من 340الى 360 كيلو
وداخل المدينه من 290 الى 310
هذا مع تشغيل التكييف فى اوقات الظهيره فقط
يعنى اعتبر تشغيل التكييف فى نصف المسافه فقط
وبستخدم بنزين 90
كنت بستخدم 92 لكن لاحظت ان 90 آداء افضل
بصراحه مريحانى جدا فى استهلاك البنزين
اقتباس:
- كمية البنزين المستهلك في عملية أعادة التفويل = 48 لتر
شوف حضرتك ..
أنا بأفول التانك يعني 8 شرط = 42 لتر
و لما بأعمل اللفة اللي قولت لحضرتك عليها و بأرجع أفول تاني بتكون علي الشرطة الاخيرة و بتدي فلاشر
في الحالة دي بتاخد 38 لتر
معلش غلطت في الرقم بدل ما أقول 38 قولت 48 لأن كان معايا عربية تانية كانت بتأخد حوالي 52 لتر
أسف علي الغلطة دي
بتعمل في الصفيحه (20 لتر)
- داخل المدينه: 260- 280 كم
- السفر: 300 - 320 كم
وعلى فكره أول شرطه بتختفي بعد 7 لتر وبعد كده كل شرطه 5 لتر
يا جماعه داخل المدينه بيختلف لو العربيه عملت 350 كيلو فى التفويله يبقى كتر خيرها قوى وانتا كمان كدة موقفتيش فى اشارات كتير لكن فى السفر انا الشرطه الواحدة ممكن تعمل معايا من 70 الى 80 كيلو يعنى 5 لتر
اخر مشوار الجمعه الماضيه طنطا الاسكندريه الكيلو 21 ولف داخل النخيل والعوده من الكيلو 21 الي طنطا العربيه اخذت 20 لتر يعني صفيحه مش فاكر كام كيلو بالتحديد بس تقريبا من 250 كيلو الي 300
السرعه كانت من 90 الي 120 الحموله 2 فرد
تمااااااام على المواضيع المفيده دى
اقول انا استهلاكى بقى
1- مع بنزين 92 بيوووور بتعمل متوسط 70 كيلو فى الشرطه ال 5 لتر خارج المدينه
2- مع بنزين 90 السحب يقل حبه صغننه بس تعمل 75 كيلو خارج المدينه
3-مع خليط 1 الى 1 من بنزين 90 و 80 السحب يقل حبتين بس تعمل من 80 الى 85 كيلو فى ال شرطه ال 5 لتر
وبصراحه برتاح فى الخليط دا علشان سحب العربيه فى الطلعات بيبقى صعب حبتين لدرجه انى كذا مره اخبط بسبب كدا ومش بعرف اركن براحت بسبب السحب دا
اولا الاوتو بتفرق عن المانوال يعنى الاوتوماتيك بتستهلك زيادة
انا عندى اوتوماتيك
جوه البلد زى المنصورة مفيش فيها اى طريق تفتح فيها
الصفيحة بتعمل حوالى 240 كيلو
لكن على الطريق الصفيحة لم تقل عن 350 كيلو مع قيادة متوسطة لا هادية ولا رياضية .
عموما الياريس من افضل السيارات فى العالم فى استهلاك البنزين
ودا بشهادة الاجانب ومواقع عديدة اجنبية شهيرة
طبعا دا بغض النظر عن السيارات الهجينة
مع الوضع فى الاعتبار ان الياريس نازله من 2006 يعنى كويس اوى انها كده
فما بالكم بالجيل القادم فى 2011 انا سمعت انه هيكون ثورة فى استهلاك البنزين وهيبقى فى منه هجين .
وفى النهاية اسلوب القيادة بيفرق كتير جدا فى المسالة دى
والار بى ام هو الى بيحدد استهلاك البنزين .
يا جماع المفروض كل شرطه 5 لتر لكن ده مش صحيح لان التانك مش اسطوانى بيختلف يعنى تانى شرطه من فوق مش زى بقية الشرط اللى تحتها افضل شئ تفول وبعدين تسافر مع تصفير العداد طبعا وبعدين تفول تانى وتشوف خدت اديه
جوه البلد اقصى استهلاك 8 لتر / 100 كم مع الوقوف والتكييف
فى السفر اقل استهلاك 6 لتر / 100 كم على سرعة 90 او 100
8-9 لتر / 100 كم سرعات 160 او اعلى
ايوه الرقم صحيح 160 الى 190
مع العلم انى غاوى حرق وشد وقرص على الغيارات دايما
طيب بالنسبة لتكييف العربية وموتورها ١٣٠٠ سي سي
هل التكييف قوي ولا بيتقل العربية وتبريده ضعيف
فصل الخطاب في الياريس وتقييم شامل لهذه السيارة :
استهلاك البنزين لياريس 2007 فتيس عادة
9 - 9.5 ك / لتر داخل البلد شرط التعشيق على ار بي ام من ( 2-3 )
14 - 15 ك / لتر على الطرق السريعه حتى سرعة 140 كم / ساعة
ملاحظة : التعشيق على ار بى ام من 3.5 - 4.5 بيضاعف استهلاك الوقود وبيوصله الى 7 ك داخل البلد
مميزات وعيوب السيارة وهحاول اكون حيادي عشان مازعلش حد !!!
مزايا :
1 - مساحة داخلية لاباس بها لاواسعة ولا ضيقة مساحة مناسبة
2- استهلاك بنزين جيد مقارنة بجميع السيارات في نفس الفئة وان كان المطلوب منها يكون افضل على محرك 1.3 ليتر
3- مرتفعه عن الارض وقلما تحك في المطبات
4- تمنها فيها وقت البيع
5 - الماتور والفتيس كورولا 1.3 وكذالك كباس التكييف وكثير من قطع الغيار مثل التيل الخلفى وغيره وده بيخلى كثير من قطع غيارها متوفرة باسعار جيدة
6- باور السيارة كهربا خفيف وظريف واخف من الكورولا
7- ماتور السيارة على كاتينه مش على سير كاوتش
8 - الاعطال الميكانيكية قليلة اذا كانت السيارة نضيفة حتى على الكيلو متر العالى
العيوب وماادراكم مالعيوب :
1- كباس التكييف على حساس ودايما بيخرب بمعدلات كبيرة جدا وده مابيتصلحش الكمبروسور كله بيتشال ويتحط بدله كمبروسور كورولا هو نفسه بس بدون حساس .
2- زراير التحكم في التكييف في التابلوه نفس خامة لعب الاطفال بل اسوء وعايزة معاملة خاصة والا هتتكسر من الداخل وماكنش العشم في التويوتا
3- السيارة كنزة من الامام وده عامل حمل على المقصات الامامية اكثر من سيارات كتير في نفس الفئة وبيخلى عمر المقصات الامامية اقل من المعتاد بكتير
4 - عزل السيارة سيء صوت الطريق مسموع وصوت الماتور بيزعق بعد ار بي ام 4 وانت طالع اذا قفلت الزجاج لو فاتح الشباك مش هتسمع حاجة ووش الهوا مسموع بعد سرعة 140
5- قطع الغيار في بعض الحاجات بتبقى غالية بالذات القطع الكهربائية وبتبقى اغلى من الكورى بكتير على سبيل المثال شريط ال اير باج ب 350 ج وهو الى بيوصل كهربا للكالكس وكذالك بوبينه البوجيه الواحدة بحوالى 200 ج والعفشة الامامية فارقة عن الكورى بكتير المقص على سبيل المثال الاصلى معدي الالف ج واستيراد الواحد ب 400 والكوبى رخيص بس مش بينفع مع الياريس زى ماقلت عشان فيه حمل زايد على الجزء الامامى ولازم اصلي
6- دواسة الدبرياج تقيله عن معظم السيارات وده في الزحمه مزعج جدا
7- الفرامل ضعيفة بتكلم عن العادية مش ال اي بي اس وتحس بصعوبة في الفرملة لما تكون بتجرى وداخل على مطب وعايز فرملة تسعفك
8- ناس كتير ركبت معايا وقالولى العربية بتدوخ جامد مع انى شخصيا مالاحظتش يمكن عشان انا الى بسوق
النصيحة النهائية : مقارنة بأسعار السيارات في السوق تعتبر من ارخص السيارات اليابانى وقريبة من اسعار السيارات الكورى بل ارخص كمان وكل ماذكرت من عيوب لايسقط عنها انها عمليه وبتاعه شغل ومابتقولش لا ويعتمد عليها بشرط انك تكون واخدها بسعر كويس لان فيه ناس بتدفع فيها 90 و 100 الف وانا شايف ان ده كتير ومايصحش كدة !!!!