السلام عليكم و رحمه الله و بركاته
الموضوع ده موجه لكل صاحب عقل سوي
و بتعذر لاصحاب العقول المريضه
و بوجه تحيه خاصه لكل عضو معانا بيساهم في الحد من حوادث المرور
و تحيه خاصه برضو لكل من ساهم في ردع جنون السرعه في الشوارع المصريه خصوصا علي صفحات المنتدي
و ارجو من اصحاب العقول السويه في المنتدي انهم يتصدو لمجانين السرعه و كل تصرف غير مسئول من بعض الاعضاء , خصوصا المواضيع اللي اثارت بخصوص حزام الامان
مش معني انك جاهل او احمق انك تتكلم بكل ثقه الدنيا عن تجربه ليك من غير حزام الامان
ابحاث الامان ابحاث مكلفه و بتقوم بيها دول و مؤسسات
مش واحد خبط عربيه في اشاره و ييجي يقولك حزام الامان مش مهم جوه البلد و تلاقيه بيقاوح كمان!!
باعتذر عن اي حده في الكلام
بس لازم للاسف نكون واعيين اكتر من كده بخصوص الموضوع ده
خصوصا اننا حتي و ان مكناش عارفين بعض معرفه شخصيه فأحنا بنقابل و بنحتك ببعض كل يوم اكتر من مره علي الطريق
فأكيد مش عايز اروج لأفكار تؤدي بيا او بغيري الي التهلكه
و اكيد احب ان الشارع المصري يكون امان للمشاه و قائدي السيارات اكتر من كده
انا بعلن الحرب علي مروجي التهور و الاستهتار علي الطريق
و علي كل عضو بيقدر حياته و حياه اسرته انه يشاركني نفس الهدف
===================================
النهارده جايب لكم شويه فيديوهات عن اهميه حزام الامان
كلها بلغات اجنبيه بس صوره تغني عن الف كلمه
و عايزكم تركزو في الفيديو الاول تركيز خاص
لأن العربيه في الاختبار ده كانت علي سرعه 40 كيلو متر في الساعه!!! (40 مش 60 ولا 70 ولا 80!!!!)
و باقي الفيديوهات متعلقه بحزام الامان و اهميته و بالنسبه كمان للراكبيين الخلفيين و خدو بالكو انهم بيكونو زي القذائف و بيشكلو خطوره علي باقي الركاب
و بالنسبه للاطفال فلازم نراعي سن الطفل و انه بيكون محتاج وسائل تأمين مختلفه عن الكبار
و فكره ان الام تحط الطفل علي حجرها في العربيه قدام ادي للاسف نتيجتها (طبعا كلنا شوفنا في الشارع ساعات الاب بيكون سايق و حاطط طفله علي حجره تخيلو المنظر ساعتها هيكون ازاي؟!!)
و في فيديو او اكتر بيوضح الخطوره الشديده لوجود اطفال في الكنبه الخلفيه من غير وسائل امان مخصوصه ليهم
======================================
ياريت نتفرج كلنا علي الفيديو كله و نفكر
هل انت بتربط حزام الامان؟
هل بتجبر الراكب بجوارك علي ارتداءه؟
هل مقتنع ان اي حزام مدلدل يكون كافي انه يحميك؟
هل مقتنع لسه ان حزام الامان منظر و الفكره ان المرور بياخد عليه مخالفه و بس؟
هل مقتنع انك تربط الحزام علي كتفك بدل ما تربطه بالاسلوب الصحيح؟
هل اخدت بالك وضع الحزام الخاطيء بيسبب ايه؟
هل بتعرف انجليزي كويس و سمعت الفيديو اللي بيتقال فيه ان لحظه الحادثه جسمك بيندفع و كأنك بتقع من الدور التالت و ان الجسم البشري مش بيتحمل الاصابات بالشكل ده؟
هل اخدت بالك من اندفاع الطفل في الكنبه الخلفيه كالطلقه الي الامام؟
هل اخدت بالك انه حتي لو بالغ و راكب في الكنبه الخلفيه برضو بيندفع نفس الاندفاع؟
هل ناوي تربط حزام الامان انت و من معك بعد كده؟!!