الموضوع: لو أنت بتشتغل بره مصر تشتري عربيه ولا تأجر

بص يا باشا
انا بقالي سبع سنين بره مصر . قبل ما اسافر كان عندي عربيه جولف و رفعتها لما رجعت و نزلتها لقيت ماستر الفرامل مهرب زيت و جلده زور الشكمان نشفت والعربيه بقي صوتها زي الدبابه و عايز بطاريه جديده و كاوتش
رحت بايع العربيه في نفس الاسبوع
و بقيت باجر من ساعتها .. اول ما اجرت كان من واحد معرفه و العربيه و انا ماشي (طرمبه المياه باشت) و المياه نزلت و العربيه جابت وش سلندر و رغم ان الموضوع مليش اي ذنب فيه الا اني لبست ساعتها الموضوع و زود عليا حاجات تاني في العربيه و دفعت مبلغ محترم و من ساعتها وانا باجر من شركه محترمه جدا في التعامل (avis) بصراحه ناس زي الفل . بكلمهم قبل ما انزل و احجز العربيه و استلمها في المطار و اخلص اجازتي و اسلمها في المطار و انا مسافر وخلال الفتره دي لو في اي حاجه في العربيه بيبعتلك فنيين لحد مكان العربيه و معاهم عربيه تانيه علشان لو معرفوش يصلحوا العربيه في مكانها بيدوك العربيه التانيه و مره العربيه فصلت وانا في الزمالك الساعه 12 بالليل و كلمتهم علي الموبيل و قالي اقفل العربيه و سيبها وروح و الصبح لقيت عربيه تانيه تحت البيت من فئه اعلي كتعويض ليا
و العربيات متأمن عليها شامل و في حاله انك رجعت العربيه معجونه لا قدر الله بتدفع 100 دولار
بس مشكلتهم ان اسعارهم عاليه اوي
اما السنادي و بعد حساب سعرهم الجديد و ان اجازتي بقت اطول زائد ان مراتي بقت بتقعد 3 شهور في مصر و بتستعمل عربيه فاشتريت عربيه اوكتافيا ب 90000 لأني حسبتها اقتصاديا و لقيت ان الشراء هيكون اوفر في الوقت الحالي
انا حكيتلك القصه كلها يمكن تنفعك في قرارك لأنك لازم تشوف ظروفك كويس و تحسبها علي حسب اولوياتك في المرحله الحاليه لأنك مينفعش تاخد حكم مطلق في الموضوع لأن اللي بيسافر ظروفه ممكن تتغير كل سنه عن التانيه

انا بردة نازل قريب ودى اول اجازة لية وشايف ان التاجير احسن
ومش لازم تاجر الاجازة كلها وتشوف اهم فترة فى الاجازة وتاجر فيها