الموضوع: تغييرعلبه الدركسيون

السلام عليكم ورحمة الله وبركاته
السادة الزملاء كما ناقشت مع حضرتكم سابقاً موضوع الطقه الخفيفة في الدركسيون العربية واقفة أو علي السلانسية وهي ماشيه علي أرض ناعمة ، والحلول المقترحة من جانبكم والتي لم يأتي بها أحد في التوكيل "بيريحوا دماغهم تقريبا".
قلت أنا أوجع دماغي ليه ، العربية لسه جديدة غير يا معلم (في الضمان طبعأً "أنا ضد مبدا إدفع") روحت عامل مهموز بين أبو غالي ومنصور علشان العملية يسرعوها شوية ولقيت واحد بيكلمني من أبو غالي يسألني المشكلة فين وواحد من منصور بيقولي إنت بتشتكينا ليه قلت لهم ما ليش فيه إبعتوا قطعة الغيار علي فرع جسر السويس (أبو غالي) وروحت غيرتها هناك بس الظاهر إن الجماعة هناك زهقوا مني ، فلطعوني المرة دي من الساعة 10:30 صباحاً إلي الساعة 6:30 مساء
وأنا رخمت وقولت أستلم بعد التجربة مش مستلم إلا لما أجرب (هما بيقفلوا الساعة 5:30) "محدش يشتم بس رخامة لازم يقابلها غتاته" .
* تم التغيير والعربية بقت زي الفل ،
*وتم تضبيط الزوايا وضغط الإطارات .
*بس مش عارف فكوا البطارية ليه ولما رجعوها تاني رجعوها بإهمال كده برضه مش عارف ليه هي الغطيان العازلة علي الأقطاب ولكنها ليست مثل شكلها الأول !
لاحظت برضه إنهم غيرو الكاوتشات من ورا لقدام حركة كنت عاوز أعملها بس هما عملوها بنفسهم "ربنا يكرم المهندس والصنايعي إلي كانوا شغالين فيها ".
"صحيح شوفتهم وهما بيكتبوا في السيستم تكلفة قطعة الغيار لقيتها 140 جنيه تقريباً ده هايبقي غير المصنعيه ."
سؤال "موجه للسادة المهندسين إلي إشتغلوا في التوكيل قبل كده " هو يعني إيه في أي بي في توكيل دايو بيتعامل المعاملة دي ليه علشان لقيت زبون داخل معاه عربية كحلي قاموا سلتبوا الشنطة بالكامل ، وبعدين حطوا العربية علي الإسكانر ، وطلعوها علي ضبط الزويا ، وبعدين طلعوا مرتين يجربوها :(
لو الموضوع فلوس أزيد نقول ولو الموضوع كوسه ممكن نشوف وضعها إيه ؟
تحياتي وإحتراماتي للجميع