الموضوع: معلش يا شباب نتكلم بالعقل و المنطق شويه

المشاركة الأصلية كتبت بواسطة محمد الشامي

عارف ياروميو العربيات دي حظوظ فعلا

وانا واحد من الناس اللي حظها كويس والحمد لله , العربيه اللي معايا دي موديل 2000 اشترتها وحالتها كانت زيرو بكل المقاييس , مفيش فيها حتى لمبه محروقه او حاجه محتاجه تتغير ... الخ

واول مره دخلت بيها على الميكانيكي كان بعدها بـ سنه تقريبا , لزوم السيرفيس و و و يعني حتى مكنش فيها مشكله معينه

وبالتالي الواحد بيحترم ان العربيه شايلاه وبتعززه وقت اللزوم

لكن للاسف في ناس تانيه بيحصل معاها عكس اللي حصل معايا تماماً !!!!!!!!! يعني فعلا الموضوع حظوظ بنسبه كبيره

انا كمان عايز اشبهلك العربيه دي بالصديق , على اد ما هو صديق مخلص جدا و وفي على الاخر لكن اكيد فيه عيوب , وبالرغم من كده انت بتستحمله وتعديله وتبلعله زي ما بيقولوا
وده لانه بيكون عزيز عليك لدرجه اكبر من انك تتخلى عن الصداقه دي
وعلى اد ما انت بتستحمله هو كمان بيستحملك وقت الشده , وبيرفع راسك في الاوقات الحرجه فعلا
وياسلام بقه على قمه الرضاء لما تجيب لصحابك ده هديه !! طبعا في حالتنا هنقول الهديه بالنسبه للعربيه انك بتعملها صيانه او بتعمل upgrade لحاجه معينه فيها , بتلاقي صاحبك ده وقتها شايلك من على الارض شيل

فـ بما اننا بشر وكلنا احيانا بنغلط وبنتعلم من غلطنا وفي غيرنا بيستحملنا , فالجماد (العربيات) كمان كده و لازم نستحملها لانها اكيد رفعت راسك وراسي في موقف معين في يوم من الايام

وخلي بالك العربيه بينشأ بينك وبينها حاله نفسيه بجد , وكل ما رضيت عنها واديتها هي كمان بترضي وبتديك اكتر

معلش طولت عليك بس فعلا العربيه سواء دايو او غيرها اكيد ليها اخطاء وعيوب زيها زي اي نوع تاني

عالاقل اخطاء الدايو ومشاكلها في حاجات بسيطه , لمبه تشيك او صباع حراره و و و
لكن في عربيات تانيه فيها عيوب جسيمه وبتخلي الشركات المصنعه تسحب خطوط انتاجها بدل المره اتنين

انا من رأيي نقول الحمد لله اوي على اللي احنا فيه كأصحاب دايو

كلام سليم 100 في 100

انا رأيي ان المشاكل اللي عندك يا روميو عشان العربيه مستعمله واكيد الميكانيكي كمان اي كلام لانه مش قادر يظبط العيوب كلها .. لو مكانك هنزل لحد ميكانيكي فعلا زي ما الشباب هنا بينصحو بمحمد مثلا ... واخليه يظبطها مره واحده من كله ومهما تتكلف اهي مره .. انا ا لحمد لله معايا لانوس من 4 سنين ومبعملش فيها اي حاجه غير زيت وفلاتر ... مصاريف التشغيل يعني بس فاعتقد ان المشكله في عربيتك لوحدها نتيجه لسوء استعمال المالك الاول لها .. ربنا يعينك ويعمل لك الخير كله يا رب

بالعكس عربية جميلة ....قليلة الاعطال ...قطع رخيصة ....بتستحمل البهدلة ....وبصراحة فيها كل امكانيات العربية الحديثة وفي الصيانة سهلة زي العربيات القديمة