الميه بتغلي في الاربه والمروحه شغاله

**khaladsaef** · 27-04-2010 10:08 AM

صباح الخير يا جماعه ، امبارح وانا ماشي بالعربيه فجأة لقيت الحراره بتعلي جامد استنيت شويه ومشيت بيها تاني ، لقيت برده نفس الموضوع ، وسمعت صوت الميه بتغلي في العربيه والمروحه شغاله، ورحت للميكانيكي ، وقالي احتمال يكون وش سلندر او حساس الحرارة هنستنس لما العربيه تبرد ونشوف، وبعد حوالي ساعتين دورنا ونفس الموضوع ، هو قالي احتمال ميكونش وش السلندر
وبكره نشوف حساس الحراره علشان ده شغلانه وهنفك سير الكاتينه ، بصراحه يا جماعه انا مش عارف بالظبط ايه اللي حصل وايه السبب دي اول مره والعربيه موديل 2002 وعامله 90000
ارجوا الافاده بالرأي ؟؟ اعمل ايه؟؟

**محمد الشامي** · 27-04-2010 10:37 AM

ان شاء الله الموضوع يكون بسيط

لكن صباع الحراره ملهوش علاقه بفك سير الكاتينه

بس المهم المراوح عندك بتشتغل على انهي سرعه ؟؟ السرعه الأولى ولا التانيه ؟؟

**khaladsaef** · 27-04-2010 10:41 AM

الكهربائي قال ان المروحه شغاله علي السرعه العاليه وهو اللي قال روح للميكانيكي ، هل ممكن يبقي العيب فعلا في صابع الحراره ده

**محمد الشامي** · 27-04-2010 10:44 AM

طيب حضرتك جربت انك تشوف حراره المياه داخل الخرطومين الكبار اللي داخل وطالع من الريدياتير ؟؟؟

يعني هل الحراره في الخرطومين وقت غليان الميا في القربه بتكون متعادله او متقاربه تقريبا ؟؟

ولا ناحيه بارده وناحيه سخنه بتغلي ؟

**khaladsaef** · 27-04-2010 10:49 AM

شكرا لاهتمامك يا استاذ محمد ، بس بصراحه انا مشفتش الخراطيم بس الميكانيكي كان بيضغط عليها ، انت شايف الموضوع ممكن يكون ايه؟؟

**محمد الشامي** · 27-04-2010 10:55 AM

معلش انا حاسس اني طولت عليك في الأسئله

لكن نفس الموضوع ده حصل في عربيه جولييت وبردو الميكانيكي قال وش سلندر و و وو

لكن الموضوع كله طلع ان طلمبه الميا كانت منتهيه , وكانت مش بتقلب الميا جوا دوره التبريد , وبالتالي كانت الميا فعلا بتغلي وحراره العربيه بتعدي علامه النص والمراوح بتشتغل على الدرجه العاليه على طول

وبعد تغيير الطلمبه المشكله اتحلت تماماً والحمد لله

الطلمبه الإيطالي 120 جنيه
الطلمبه الألماني 110 جنيه
الطلمبه الكوري 85 جنيه (صيني ومضروبه)
الطلمبه الصيني 75 جنيه

اظن لو صباع الحراره فيه مشكله كان العداد هيخرف وممكن المراوح تشتغل , لكن مكنتش الميا هتغلي في القربه

طبعا حضرتك مكنتش فاتح غطاء القربه والمراوح شغاله !! صح ولا ايه ؟

**محمد الشامي** · 27-04-2010 10:58 AM

عالعموم في الغالب هتلاقي من اعراض تلف الطلمبه

لو مسكت الخرطومين الكبار زي ما قولتلك اثناء عمل المراوح على السرعه العاليه , هتلاقي الخرطوم اليمين بارد (في مواجهه الكبوت) والخرطوم الشمال سخن مولع , وهتلاقي قربه المياه بتغلي , سواء مع عمل المراوح او بدون عمل المراوح

**khaladsaef** · 27-04-2010 11:01 AM

شكرا يا استاذ محمد علي المعلومات دي ، بس عايز اسالك سؤال لو العيب في حساس الحرارة هو الحساس ده بيتغير ؟؟؟؟؟

**محمد الشامي** · 27-04-2010 11:04 AM

صباع الحراره بيتغير عادي جدا , وتمنه 30 جنيه او 35 جنيه , مش فاكر بصراحه

لما حضرتك تروح للميكانيكي , قوله الأول يبصلك على طلمبه الميا شغاله ولا لا

**khaladsaef** · 27-04-2010 11:08 AM

أن شاء الله هعمل زي ماقلت وشكرا لتفاعلك مع مشكلتي

الموضوع: الميه بتغلي في الاربه والمروحه شغاله

LinkBack

أدوات الموضوع

عرض

-

-

-

-

-

المواضيع المتشابهه

الشباب الميه الميه اعضاء ونجوم نايل موتورز ارجو المساعده كربراتير

أسباب نقص المياه في الاربه؟؟

رشاشات الميه بتاعت النترا 2007 الزجاج مش شغاله

ميه الاربه صفرا من كتر الصدى

(الميه بتنقص جامد)هل فيه ماده بتتحط في الردياتير لمعالجه تسرب الميه ؟

الكلمات الدلالية لهذا الموضوع

المفضلات

المفضلات

ضوابط المشاركة