الموضوع: العربية اتخبطت خبطة جامدة اوي (بس الحمد لله علي كل حاجة)

اولا بجد الحمد لله علي كل شيء
اللي حصل كالاتي:
يوم الاحد اللي فات يوم عيد تحرير سيناء و اجازة كنت ماشي في شارع الهرم اتجاه الجيزة امام سينما رادوبيس رايح للكليه كان عندي كورس و مش يناخد اجازة طبعا من الكورس المهم الحتة دي للي يعرفها فيها ملف علي الشمال و كان في عربية نقل راكنة علي اليمين و انا كنت وراها فعايز اطلع مممنها بصيت في المراية الشمال مفيش اي حاجة جنبي غير واحد ماشي بعجلة ورا و كان في عربية بتلف من الملف اللي علي الشمال و دي بعيد لسة بقول يا هادي و بطلع من العربية النقل و الاقي واحد جي بعربية افيو بسرعة جنونية و كان هيلبس في العربية اللي بتلف علي الشمال من الملف فراح واخد غرزة جامده العربية طوحت منه و كان خلاص هيشلني انا و الراجل اللي بعجلة فانا علشان افادي اللي راكب العجلة ده لاني خفت يخبط فيا و ينزل تحت الافيو و كمان علشان ابعد عن الافيو فلميت العربية يمين علي العربية النقل بس مخبطش فيها و فجأة اسمع اصوات و تخبيط ولا كأن العربية بتتفرم فرملت و وقفت و نزلت اشوف و لقيت ...............
االعربية النقل (حسبيً الله و نعم الوكيل بجد ) طالع من الصندوق بتاعها من الجنب حتة حديد طالعة عن ابعاد العربية اوي مش عارف ايه لزمتها !!!!!!!!!!
و طبعا مكنتش في مرمي نظري لانها في مستوي الاكره بتاعت الباب و طبعا انا مش شايفها لانها كانت جنبي مش امامي و مش عامل حسابها الحمد لله خدت من اول نصف الباب الامامي يمين لحد الرفرف الخلفي
خط ماشي واخد نصف الباب الامامي و الباب الخلفي كله و الرفرف الخلفي لحد مفرملت و العربية وقفت تقريبا لحد قرب الاخر البابين طبعا الدهان اتشال و البابين و الرفرف اطبقوا بجد اول مشفت العربية حزنت
بس في نفس الوقت حمدت ربنا انها جت علي اد كده و اني سليم
خصوصا ان الراجل بتاع الافيو لو انا مكنتش لميت العربية كان هيخبطني في الباب بتاعي و الجزء الامامي و سعتها التلفيات كانت ممكن تبقي اكبر و انا كنت ممكن اتعور (بعد الشر عليً طبعا )
او كان ممكن بتاع العجلة ده يخبط فيً و يقع تحت عجل العربية الافيو و يحصله حاجة و كنت البس فيها خصوصا ان اللي راكب الافيو لما لقي كده جري
انا اول ما العربية اتخبطت كلمت خالد و مصطفي (مشمش) و طبعا مشمش كان الموبيل مقفول كالعاده بس خالد بجد عايز اشكره الراجل ساب بيته و مراته يوم الاجازة و جالي من الحرفيين لحد الكلية بتعتي في القصر العيني و فضل قاعد معايا نتكلم و نشوف هنعمل ايه بجد اكتر من اخ فانا عايز بجد اشكره علي وقوفه جنبي كده و تعبه معايا
و في الاخر الحمد لله علي كل شيء و كل اللي يجيبه ربنا كويس و احسن لينا لانو اكيد نجاني من حاجة اكبر محدش عارف ايه اللي كان ممكن يحصل
الحمد لله