صوت كركره فى الموتور

**usagendy** · 28-04-2010 12:17 PM

السلام عليكم ورحمة الله وبركاته
انا عندى مشكله مش عارف سببها
العربيه فى السحب بتعمل صوت كركره زى الصوت اللى بنسمعه لما العربيه تحط بنزين 80 على الرغم انى بحط بنزين 92 على طول
صوت الكركره بيبقى موجود على سرعات كمان يعنى فوق ال90 كمان بس بتبقى كركره سريعه تسمعها وصوتها واطى .
ولما بتبقى الكركره دى موجوده سحب العربيه بيبقى وحش ولما تختفى بيبقى السحب كويس
واختفاءها وظهورها مالوش وقت ولا ميعاد بس ظهور الكركره دى بنسبه كبيره عندى عن عدم ظهورها.
عربيتى لانوس وان موديل 2000 وعامله 260000 الف كيلو.
فهل ممكن يكون ليها ظبط تاكيهات انا الصراحه مش عارف
ياريت المشوره اعمل ايه

**AHMADALY1999** · 28-04-2010 12:31 PM

اللانوس مالوش ظبط تاكيهات هى بتظبط نفسها
مش عايز اقولك طنش لانى اكاد اجزم ان مفيش عربية جديدة مفيهاش الكركرة دى نتيجة ارتفاع نسبة الانضغاط فى المواتير الحديثة لان من الواضح ان المشكلة دى لسة ظهرالك قريب بس طالما هى بسيطة و يا دوب بتعرف تسمعها يبقى مفيش منها ضرر
هل تقدر تربط زمنيا بين حاجة عملتها فى العربية و بداية ظهور الكركرة ؟
البوجيهات الى راكبة بقالها اد ايه ؟
جربت تصبر و تحط بنزين من بنزينة تانية ؟
و حكاية ان لما بتسمعها سحب العربية بيقل ده طبيعى لان حساس التسقيف بياخر الكهرباء لما بيحس بتسقيف
جرب حط octane booster و لو الصوت راح يبقى المشكلة مشكلة بنزين
برضه فيه عبوات تنظيف دورة الوقود بتضاف لتنك البنزين علشان تتخلص من الرواسب الكربونية الى ممكن تتسبب فى التسقيف ( لو حتجيب جيب منتج امريكى من اى محطة موبيل او شل او كارفور ..... الخ )

**محمد الشامي** · 28-04-2010 12:39 PM

هو حضرتك تقصد صوت تسقيف مش كركره

بالنسبه لظبط التاكيهات في اللانوس فهو هيدروليكي , يعني هي بتظبط نفسها بدون تدخل العنصر البشري

لكن مشكله حضرتك من رأيي انها هتكون حاطه من الأتي :-

1- عيب رشاشات
2- عيب بوجيهات

عيب الرشاشات ممكن تكشف عنه عن طريق الكشف على السياره بجهاز الأسكانر , والنسبه الطبيعيه على الجهاز المفروض تكون 14.7 على ما أتذكر , لو كانت اكتر من كده يبقه الرشاشات بتسيل والعربيه مش بتسحب وبتاكل بنزين كمان

ومن اعراض عيب الرشاشات : تأخير في الدواره , واحيانا شبه رجرجه مع بدايه التدوير , عادم لونه مائل للأسود بشكل ملحوظ صباحاً

والعلاج : تغيير الرشاشات بـ رشاشات BMW وسعرها تقريباً في حدود 200 جنيه

وبالنسبه لعيب البوجيهات فـ حضرتك ممكن تعرفه لو كانت العربيه في بدايه التدوير بتطلع عادم ابيض او بتشم ريحه بنزين نيئ (غير محروق) , وبالتالى هتلاقي صوت الموتور عالى نسبياً

ولو فعلا الموضوع كده هات طقم بوجيهات ngk r واحد شمعه

وبخصوص حكايه السحب الضعيف للعربيه , ممكن تغيير فلتر الهواء والبنزين , وتنضف بوابه المنافولد والأيدل

وبإذن الله المشكله تختفي

**محمد الشامي** · 28-04-2010 12:41 PM

المشاركة الأصلية كتبت بواسطة ahmadaly1999

مش عايز اقولك طنش لانى اكاد اجزم ان مفيش عربية جديدة مفيهاش الكركرة دى

هو الزميل معاه عربيه 2000 وانا كمان , و الحمد لله بصراحه عمري ما سمعت لا كركره ولا تسقيف !!!!!

**usagendy** · 28-04-2010 12:46 PM

انا أولا متشكر على الردود
ثانيا اكيد المشكلة مش بوجيهات لانى لسه مغيرها والموضوع ده مش جديد موضوع الكركره او التسقيف قديم مونت من بنزينات مختلفة وبرضه مافيش فايده
بالنسبة للرشاشات انا مغيرها برشاشات اوبل والعربية ما بتغيبش فى الدواره خالص
اما octane booster انا معرفش اجيبه منين علشان اجربه فلو تكرمت حضرتك تقولى اجيبه منين وسعره كام وكيفية استخدامه
وشكرا

**محمد الشامي** · 28-04-2010 12:48 PM

طيب الفلاتر حالتها ايه ؟؟ وحساس الأيدل ؟ وبوابه المنافولد ؟

**usagendy** · 28-04-2010 12:50 PM

انا من فتره قريبه غيرت حساس الشكمان والراجل حطهالى على الاسكنر وقالى ان الدنيا كلها كويسه
اما بالنسبة للمنافولد انا ماعملتش فيها اى حاجه خالص

**محمد الشامي** · 28-04-2010 12:56 PM

المشاركة الأصلية كتبت بواسطة usagendy

انا من فتره قريبه غيرت حساس الشكمان والراجل حطهالى على الاسكنر وقالى ان الدنيا كلها كويسه
اما بالنسبة للمنافولد انا ماعملتش فيها اى حاجه خالص

طيب والفلاتر ؟؟؟؟ هواء وبنزين ؟؟؟ وحساس الأيدل ؟؟

**AHMADALY1999** · 28-04-2010 01:01 PM

المشاركة الأصلية كتبت بواسطة usagendy

اما octane booster انا معرفش اجيبه منين علشان اجربه فلو تكرمت حضرتك تقولى اجيبه منين وسعره كام وكيفية استخدامه
وشكرا

طيب ممكن الاول تجرب تجيب منظف دورة الوقود FUEL SYSTEM CLEANER من بنزينة جديدة زى ON THE RUN الى فى موبيل او شل او مصر و الامارات او كارفور او حتى محلات كماليات السيارات
المهم يكون منتج امريكى مش مصرى و حتلاقيه فى حدود 40 ل 50 جنيه بس طريقة الاستخدام بتفرق من منتج لاخر غالبا حتكون سهلة يعنى تصب العبوة كلها على التنك بعد ما تمون

بعد كده ممكن تجرب ال octane booster برضه من نفس الاماكن بس حتلاقيه ارخص يعنى فى حدود 25 جنيه و تقريبا نفس طريقة الاستخدام