لما اروح اشتري عربية زيرو اتمم على ايه ؟؟

**ahmadmidop** · 28-04-2010 08:56 PM

يا جماعة الواحد لما يجي يشتري عربية زيرو ايه الحاجات الي يتمم عليها وهوا بيستلم العربية .. والعداد يكون عملو كام تقريبا ويبقى في السليم

**Moe86** · 28-04-2010 11:10 PM

نسخة المفتاح التانية
الكود بتاع المفتاح
الاستبن و الكوريك كامل و لو معاه مفكات ولا حاجة
الدواسات ( أغلب العربيات ملهاش)
الأريال لو بيتفك
الولاعة و الطفاية
أى غطاء جوة الموتور زى غطاء البطارية مثلا
اتأكد ان الفرش مافيهوش قطع أو حرق سيجارة لأنها حصلت قبل كدة
دة اللى فاكرة حاليا
بالنسبة للعداد مش مقياس للأسف لأن ممكن العربية تكون ماشية و هما شايلين فيوز العداد , دة صعب يحصل فى التوكيلات و الموزعين الكبار

إنت ناوى تجيب حاجة جديدة ولا إية يابو حميد ؟

**Medo.Malek** · 29-04-2010 12:20 AM

و الله حضرتك انا لما استلمت الاول أتأكدت من كل ما يتعلق بكهربة العربية كلها الانوار و الاشارات و التكييف و الكاست ة الازاز الكهربة و المرايات و الكلاكس ده اللى فاكره فى الكهربة
و بعد كده تممت على الفرش و الكراسى و بعد كده بصيت على جسم العربية من برة و على الابواب و جربت السنتر و ال ريموت كنترول ( بس للاسف مجربتش افتح الابواب و الشنطة بالمفتاح نفسه و بعد استخدام 5 شهور اكتشفت ان الشنطة مش بتفتح بالمفتاح فا خد بالك من النقطة دى)
ده بالاضافة للكلام اللى سبق و قاله الاخ Moe86

**yoko** · 29-04-2010 12:54 AM

فعلا كده جابوا كل حاجة!!!!!!! ولو من موزع مش من التوكيل إنزل بص على العربيه من تحت ليكون حد خبطها ولا حاجة ول لقيت حدفة أو أي حاجة تاني يوم تروح التوكيل متستناش