لو بطلنا نحلم .. يحصل إيه

**alf2boshra** · 28-04-2010 11:43 PM

كل واحد مننا كان ليه حلم قديم .. فيه مننا حقق حلمه أو أحلامه ..
وفيه لسه الزمن مش مطاوع والحلم مستعصي مش راضي يتحقق ..
ياترى اللي حقق فينا حلمه ممكن يتباهى بيه ويتكلم عنه
واللي لسه ممكن يتكلم ويقول علشان لو فيه اقتراحات او مساعدات
يارب تتحقق اماني كل اعضاء المنتدى ، وكل الناس
هو مفروض ابتدي بنفسي بس هاستنى مش هاتكلم دلوقت
مش عشان حاجه معينه .. لكن عاوز اشوف مدى استقبالكم للموضوع
عموما وعشان ماحدش يقول ليه هو ما يبتديش
أنا كان حلمي القديم ، وأكبر حلم اتمنيته إني أكتب واملى الدنيا كلام و .........
وهاكمل لما اشوف مدى استقبالكم للموضوع
=======
يارب يكون موضوع لطيف ويعجبكم
ألفي بشرى

**shaddadfalcon1** · 29-04-2010 12:12 AM

انا بقي مفسي ابطل احلم لان الأحلام دي هتموتني
لاني بحلم واحلم وبعدين اصحي الاقي نفسي لسه في ارض الواقع
وغالبا الأحلام اللي بتعمل كده هي الأحلام الماديه
يعني انا مببطلش تفكير كل يوم اني يكون عندي موستانج و m5 ورنج رووفر وكام عربيه كده تانيه بالأضافه لشقه واسعه في مكان راقي
وطبعا اول ماببص لحالي بقول الحمد لله يمكن احقق حاجه منهم بس عايزه وقت وساعات تانيه يجيلي احباط خصوصا لما تحصل حاجه تقضي علي القرشين اللي معايا

**alf2boshra** · 29-04-2010 12:20 AM

المشاركة الأصلية كتبت بواسطة shaddadfalcon1

انا بقي مفسي ابطل احلم لان الأحلام دي هتموتني
لاني بحلم واحلم وبعدين اصحي الاقي نفسي لسه في ارض الواقع
وغالبا الأحلام اللي بتعمل كده هي الأحلام الماديه
يعني انا مببطلش تفكير كل يوم اني يكون عندي موستانج و m5 ورنج رووفر وكام عربيه كده تانيه بالأضافه لشقه واسعه في مكان راقي
وطبعا اول ماببص لحالي بقول الحمد لله يمكن احقق حاجه منهم بس عايزه وقت وساعات تانيه يجيلي احباط خصوصا لما تحصل حاجه تقضي علي القرشين اللي معايا

عموما لو تسعى أكتر وأكتر في المكان اللي انت فيه وتحاول تحسن وضعك
وتتقن شغلك اللي انت فيه سواء دراسه او عمل
وكل ما تتقن حاجه اكتر كل ما تتميز في شغلك اكتر
وكا ما تعرف عن شغلك اكتر كل ما تنمك يزيد في شغلتك
ربنا يسعد أيامك .. ويحقق أحلامك
=======
أشكرك على مرورك
ألفي بشرى

**shaddadfalcon1** · 29-04-2010 09:42 AM

انا الحمد لله متميز جدا في شغلي وبنسبة 90% بحقق احلامي
بس زي مابقول لحضرتك انا احلامي بتفتح قوي وساعات دي بيجيلي احباط

في الشغل انا تقريبا بحقق معظم احلامي والحمد لله

**MTAK** · 29-04-2010 11:23 AM

كنت احلم بحلم كبير
و مع الوقت بدأ يصغر
و كل شوية يصغر اكتر
لحد ما بقى من صغره
انا مش شايفه و مش عارف افسر ملامحه

**alf2boshra** · 29-04-2010 11:45 AM

المشاركة الأصلية كتبت بواسطة mtak

كنت احلم بحلم كبير
و مع الوقت بدأ يصغر
حلمك ابتدى يصغر لأنك ماغذيتوش بالعمل
و كل شوية يصغر اكتر
بص ده لأنك إكتفيت بالحلم وبس
لحد ما بقى من صغره
استسلمت جامد للحلم وحاولت تستمتع بالحلم لأنه ألذ م الواقع
وما حاولتش تصحصح وتكافح وتتحمل المسئوليه
انا مش شايفه و مش عارف افسر ملامحه

عموما طالما حلمك غاب وما بقاش قدام عينيك
فده مالوش غير معنى واحد ان مش ده اللي مناسب ليك
بمعنى إنه مش بس صعب التحقيق لكن ( سامحني ) وهم مش حلم
الأحلام الحقيقيه ( الأمنيات ) كلها حتماً ستتحقق .. شرط أن تكون مقترنه بالنهوض للعمل وأن تكون أنت لديك العزم على أخذ فرصتك في الحياة
=======
أشكرك على مرورك
ألفي بشرى

**FunnyMickey** · 29-04-2010 12:43 PM

انا كان حلمي زمان اطلع مبرمج كمبيوتر
حاجه كده من الناس اللي بتقبض الالافات كل شهر دي
وكان نفسي اخترع حاجه او نظام سيستيم اسهل من الويندوز
واعمله بالعربي قصد
ويبقي العالم كله محتاجه
وساعتها يتضطروا يتعلموا لغه عربيه عشان يعرفوا يواكبوا التطور اللي عمله واحد عربي
زي ماهما مخليينا مش عارفين نعيش من غير الانجليزي

ياااااااااااااااااااااااا ااااااه
كان حلم جميل
ولحد دلوقتي والله الحلم عندي
بس نصه بس
نفسي اتعلم حاجه صعبه اوي في الكمبيوتر
تخصص قوي
اللي يتعلمه وياخده يتخطف في شغل كده ب10000 15000 الف جنيه في الشهر
طموحي مش في الفلوس
طموحي في اني معايا حاجه مش مع كل الناس
احساس بالتميز والانفراد انك تعبت في حاجه ومحدش عارف يوصلها
يلا اهي احلام

**shaddadfalcon1** · 29-04-2010 01:40 PM

المشاركة الأصلية كتبت بواسطة funnymickey

انا كان حلمي زمان اطلع مبرمج كمبيوتر
حاجه كده من الناس اللي بتقبض الالافات كل شهر دي
وكان نفسي اخترع حاجه او نظام سيستيم اسهل من الويندوز
واعمله بالعربي قصد
ويبقي العالم كله محتاجه
وساعتها يتضطروا يتعلموا لغه عربيه عشان يعرفوا يواكبوا التطور اللي عمله واحد عربي
زي ماهما مخليينا مش عارفين نعيش من غير الانجليزي

ياااااااااااااااااااااااا ااااااه
كان حلم جميل
ولحد دلوقتي والله الحلم عندي
بس نصه بس
نفسي اتعلم حاجه صعبه اوي في الكمبيوتر
تخصص قوي
اللي يتعلمه وياخده يتخطف في شغل كده ب10000 15000 الف جنيه في الشهر
طموحي مش في الفلوس
طموحي في اني معايا حاجه مش مع كل الناس
احساس بالتميز والانفراد انك تعبت في حاجه ومحدش عارف يوصلها
يلا اهي احلام

انا مبرمج كمبيوتر وبرده عندي الأحلام اللي عند حضرتك دي
بس الحياة بتبقي صعبه ولازم تشتغل عشان تعرف تعيش
الحاجات اللي بتقول عليها عايزه حد فاضي او يكون معاه فلوس ومش محتاج يشتغل في البيت

**أبو إياد** · 29-04-2010 01:53 PM

تقريبا 90% من احلامى حققتها بفضل الله وبمساعدت بعض الناس بالاضافه الى مجهودى
لكن فى فتره معينه وبعد ان اصبحت مسئول عن عائله كامله لقيت عندى حلم واحد وادعى الله وباسعى انى احققه
نفسى فى بيت عيله كبير يجمع كل عائلتى فيه ومحدش منهم يشيل هم اى شىء مهما كان صغير واحقق حلم شوفته فى عيون والدى قبل وفاته وهو ان اولادى واولاد اخواتى يعرفوا دينهم كويس اوى من صغرهم لانه كان دايما يقول انت لما تتجوز وتخلف مالكش دعوه بالعيال سيبهملى بقا انا هاكون طلعت معاش وهابقا فاضى ليهم علشان احفظهم القران واخليهم يصلوا فى الجامع مع كل اذان (نفسى لما ازوره فى مدفنه احكيله انى عملت كده ) وحققت ليه اقل حلم كان بيطلبه رغم ان الحلم مش ليه كان دايما بيحلم لغيره وشايل هم غيره
وفى حلم نفسى يتحقق فى الدنيا >>>>>>>> العدل