الموضوع: فرامل البروتون وطريقه عملها وحل مشكله طول مشوار الدواسه

السلام عليكم،

ما شاء الله موضوع جامد جداً وربنا يجازيك كل خير على المعلومات الجميلة جداً دي. مع اني تهت في النص شوية بس فرحان جداً بيه.

أنا برضو عايز أفهم النقطه بتاعة أبو مريم واسامة.

اعتقد ان الموضوع ده مش مضر للتيل خالص
طالما رجلشت صح عالشعره وماخلتش الفرامل دايسه يعنى التيل مش لامس الطنبوره كده
وبالتالى نفس الهلك على التيل هو هو بس الفرق انك الاول كنت بتدوس مسافه بعدين تبدأ تستخدم التيل
لكن دلوائتى مابتدوسش المسافه دى

واعتقد لو ميكانيكى اللى عمل الرجلاش ده يبئى افضل عشان هايعرف يظبطها على الشعره احسن مننا (الا الماهرين اللى فينا طبعا)

المشاركة الأصلية كتبت بواسطة momopersona

ربنا يسامحنا جميعا يا رب
استاذ احمد
انا لو والدى بيشتغل فى اى مكان فى العالم ومابيتقيش الله فى الناس مش هازعل لو اتشتم
يعنى ايه ان واحد يشتكى من نفس العيب 3 او 4 مرات ويمشى بالعربيه بنفس العيب لمدة سنه على اساس ان المهندسين المختصين بيقولو ان فرامل بروتون كده وان مالهاش حل

وفى الاخر يطلع الحل بالبساطه دى
ويعنى ايه انهم ممكن يبئو سبب فى موت اشخاص بسبب اهمالهم وعدم معالجة العيوب
بالذمه دى مش حاجه مستفزه جدا
وعلى العموم انا ااسف على خروجى عن شعورى بالطريقه دى بس بجد الموضوع على قد ماهو مفيد جدا على قد مانرفزنى جدا وكرهنى فى المهندسين الماهرين اللى فى التوكيل
حتى ولو كان والدى منهم
وللاسف دى مش اول مشكله تقف قصاد مهندسين التوكيل و احد ملاك العربيه يوصل لحلها
وده يوضح سبب كرهى لفنيين التوكيل

وعلى العموم انا ااسف على خروجى عن النص
وبالنسبه لكلمة عيل صغير
ربما عيل صغير مخه يوزن 4 عقول رجال كبار منافقين
وشكرا

لو عربيتك مختلفه عن اي عربيه تانيه في مصر او ماليزيا يبقي دا عيب و تقصير من المهندس و حتي لو المهندس مقصر ميتشتمش لان دا عيب و والدك لو مهندس و غلط عيب اني اشتموا لانه راجل اكبر مني و ليه احترامه و الخطاء يحاسب عليه
انا مبنفيش ان فرامل البروتون مختلفه ودا مش عاجبني بس انا اشتريتها وهي كدا و انا عارف انها كدا و انقذتني كتير اوي وهي كدا لو في تعديل عليها يبقي نشكر الي عدل مش نشتم الي بيعمل شغله

رامي باشا انا اسف اني خرجت الموضوع عن سياقه بس كان لازم اخد موقف

بالمناسبه لو عرفت عيل مخه يوزن 4 عقول يبقي العيب في الميزان

المشاركة الأصلية كتبت بواسطة osama.shihata

شكرا يارامى على المجهود
بس يفضل سؤال طارح نفسه
ايه السر فى التصميم الى مخلى الدواسة مشورها بعيد
وليه عملينها كدة ؟
اكيد فى سبب علمى من وجه نظر بروتون ده الى محتجين نعرفه ان امكن
ومستنين نشوفك علشان نجرب الفكرة
وجزاك الله خيراً

+111 انا مقتنع ان في سبب بس اتمني ان حل رامي يكون صح

المشاركة الأصلية كتبت بواسطة ahmed.ali

لو عربيتك مختلفه عن اي عربيه تانيه في مصر او ماليزيا يبقي دا عيب و تقصير من المهندس و حتي لو المهندس مقصر ميتشتمش لان دا عيب و والدك لو مهندس و غلط عيب اني اشتموا لانه راجل اكبر مني و ليه احترامه و الخطاء يحاسب عليه
انا مبنفيش ان فرامل البروتون مختلفه ودا مش عاجبني بس انا اشتريتها وهي كدا و انا عارف انها كدا و انقذتني كتير اوي وهي كدا لو في تعديل عليها يبقي نشكر الي عدل مش نشتم الي بيعمل شغله

رامي باشا انا اسف اني خرجت الموضوع عن سياقه بس كان لازم اخد موقف

بالمناسبه لو عرفت عيل مخه يوزن 4 عقول يبقي العيب في الميزان

الكلام ده لما يبئى فى عيب اساسا
لكن ده رجلاش موجود فى اى عربيه فى الدنيا وعندى فى الصنى اتعمل تلقائيا فى صيانة الالف وظبطو الفرامل
وحتى لو فى عيب امال الضمان بيعمل ايه!!!
لو فى عيب يا استاذ التوكيل ملزم بحله حتى لو عيب صناعه واذا ماحلوش يبئى تقصير منه
ولو عيب صناعه مالوش حل يا بتاخد تعويض مادى يا اما العربيه بترجع المصنع وده لازم يكون بموافقة المالك
وبالنسبه للعيب فى الميزان حلوه والله ههههههههههههههه

الرجاء من الاخوة الافاضل عدم الجدال

و جزاكم الله خيراً

المشاركة الأصلية كتبت بواسطة momopersona

الكلام ده لما يبئى فى عيب اساسا
لكن ده رجلاش موجود فى اى عربيه فى الدنيا وعندى فى الصنى اتعمل تلقائيا فى صيانة الالف وظبطو الفرامل
وحتى لو فى عيب امال الضمان بيعمل ايه!!!
لو فى عيب يا استاذ التوكيل ملزم بحله حتى لو عيب صناعه واذا ماحلوش يبئى تقصير منه
ولو عيب صناعه مالوش حل يا بتاخد تعويض مادى يا اما العربيه بترجع المصنع وده لازم يكون بموافقة المالك
وبالنسبه للعيب فى الميزان حلوه والله ههههههههههههههه

عيب الصناعه من الاخر هو عيب في بعض الوحدات و اختلاف ادائها عن باقي الانتاج و الحمد لله دا مش موجود
لو في اختلاف بين عربيه حضرتك واي عربيه تانيه في العالم دا عيب صناعه و برضوا دا مش موجود

العيب دا اذا اقتنعنا انه عيب يبقي عيب تصميم وحله الوحيد انك تبيع العربيه و الحل دا هيريح ناس كتير اولهم انت و اخرهم انا
ملحوظه انا مكنتش بحاول اضحك حضرتك

استاذ رامي سامحني اوعدك دي اخر مره هخرق الموضع عن سياقه ياريت تقبل اعتذاري

تم عمل التعديل ولكن

ركزو معايا عشان شكلى مش هاعرف اشرح اللى حصل بوضوح
روحت للميكانيكى بتاعى (شاب فاهم وبيركب عربيات جديده ايجار فى المناسبات كتير جدا)
حكيتلو الكلام بالظبط
فنزل فى الدواسه ونزلت معاه وبصينا فعلا ولقينا المسمار وكل حاجه
يلا يا باشا اشتغل
قالى خلى بالك دى هاتتعبك اكتر
قولتلو ازاى َََ!!؟؟
قالى الدواسه اللى هاتنزل للفرامل مش الفرامل اللى هاتطلع للدواسه
قولتلو يعنى ايه ؟؟
قالى يعنى مش الماستر اللى هايجيلك ده البدال اللى هايروحلو
قولتلو نعم !!
قالى بوص الدواسات التلاته فى مستوى واحد المسمار ده بئا بيطلع وينزل دواسة الفرامل
فهنزلهالك اخليهالك على الشعره مع الماستر
قولتلو قشطه
قالى بس هاتتعبك اكتر هاتيجى تدوس مش هاتلائى الدواسه فتنزل برجليك لحد ماتلمس الدواسه تقوم العربيه ماسكه فرامل جامد
هاتعد تقلقك اكتر
قولتلو لا قشطه ده اللى انا عايزه بس خلى بالك مش عايز العجل يقفش قالى ماتقلقش

عملناها فعلا
تبوص بعينك تلاقى دواسة الفرامل اوطى من البنزين والدبرياج بحوالى 2 سم
يلا اركب وجرب يا معلم
ركبت وسوقت فعلا المسافه راحت بس الدواسه اللى نزلت
بشيل رجلى من عالبنزين واعد ادور على الفرامل فعلا وبتخض كل مره (يمكن عشان مش متعود)
وكمان الفرامل بتهرب بردو احيانا
قولتلو الفرامل بتهرب قالى ازاى طب المس وسيب وامسك تانى بسرعه قولتلو ااه اتظبطت
قالى طب انزل اجرب
ركب وطلع وجرب وانا جنبو
فعلا المسافه راحت بس نفس مشكلة (الهروب) موجوده اللى هى تيجى تهدى لمطب تلاقى الدواسه بتنزل معاك جامد ولو سيبت ومسكت بسرعه تلاقيها مسكت كويس
يعنى جرب المس وسيب وامسك سنه تلاقى الفرامل تمام
جرب تهدى عادى وانت رايح لمطب مثلا تلافي الدواسه عماله تنزل معاك

وكده هو مرجلش صح لان لما كان بيزود الرجلشه سنه كان الكاوتش بيتقل فى اللف بالايد

قولتلو ده ايه بئا ده (الهروب)!!
قالى ده ماستر عام بيفوت
قولتلو مش فاهم
قالى ده الماستر عايز يتغير
سألنى انت من ساعة ماجبتها وهى كده قولتلو اه قالى لازم يغيرولك الماستر فى الضمان
(مش عارف الصراحه نقطه الاحساس بهروب الفرامل دى عندى بس ولا لا)
(يا جماعه جربو المس الفرامل وسيب ودوس وقولى مسكت احسن ولا لا)
نفس النقطه دى كان اسلام ويجا بيقولهالى كان بيعد يقولى نبه الفرامل انك هاتدوس وبعدين دوس ويدحك

لكن بالنسبه لنقطه ان فى مسافه فاضيه
فعلا اتلغت لكن الدواسه اللى نزلت فقولتلو رجعهولى زى الاول تانى احسن
وطبعا رامى مشكور جدا على المجهود جربو اعملوها كده ممكن تريحكو
لكن انا قولت خلاص اتعودت وخلاص احسن من الخضه دى