ياريت اللى بعد كده مرسيدس اس 350
عرض للطباعة
ياريت اللى بعد كده مرسيدس اس 350
يمكن ظروف قريبه قوى لدى فى شرا الفيكترا
ربنا يبارك لك فيها .. الاهم من الصاج والصفيح دة معاملة الناس مع بعضها
فكرتنى بالراجل اللى اشتريت منة عربيتى , حصللة ظرف يوم ماروحت اتفرج على العربية ادانى المفتاح وقالى عربيتك جرب براحتك واكشف فى المكان اللى انت عايزة - مع ان مفيش ادنى سابق معرفة ولا عمرى شوفتة ولا شافنى قبل كدة - , طيب نحدد معاد تانى تكون فاضى قاللى لأ وعلى اية جرب العربية واكشف عليها براحتك فى المكان اللى انت عايزة
ويوم مارحنا نسجل العربية طلعت مشكلة فى الورق فاقال خلاص ان هخلصها وهبقى اكلمك نحدد معاد تانى نخلص فية وسابلى العربية ومرضيش ياخد اى حاجة من الفلوس نهائيى غير لما يخلص الورق .. طب خد العربية , بردة لأ , مرضيش لا ياخد العربية او ياخد الفلوس , قالى بس هستأذنك توصلنى الشغل !!
يومها بليل لقيتة بيكلمنى بيقولى انة هيحتاج العربية علشان هتدخل فحص قلتلة خلاص هجيبهالك قالى لأ هعدى عليك , طيب نتقابل فى مكان فى النص بدل ماتيجى المشوار دة كلة , قاللى لأ خليك انا هعدى عليك
وقد كان جالى مع واحد صاحبة من الزمالك لمصر الجديدة علشان ياخد العربية !!!
بصراحة انا مكنتش مصدق ولغاية دلوقتى ان فى ناس كدة !!!
انا بامانه متخيلتش اللى حصل
و خاصة انه مخدش منى لغاية دلوقتى جنيه و لا حتى ورقة يثبت حقه بيها
طيب على الاقل دة راجل عارفة بقالك سنين
انابقولك واحد اول مرة فى حياتى اشوفة ويشوفنى ولا حتى جاى عن طريق معرفة ولا حاجة و سابلى العربية يوم الكشف من غير لما ياخد منى ورقة حتى ولا اى حاجة تثبت انة شافنى وشوفتة اصلا !!!
ويوم الشهر العقارى كان معايا الفلوس كاملة ورفض انة ياخدها واصر انى اخد العربية ومفيش اى اثبات انى شوفتة ولا كلمتة اصلا ولا حتى وصل امانة
الحاجة الوحيدة اللى خدها رخصة العربية علشان موضوع الورق بسسسس
ويوم ماجة ياخد العربية تانى جالى بليل متأخر كان حوالى 12 او بعد كدة كمان وجالى من الزمااااالك لمصر الجديدة واصر ان هو اللى يجى مروحلوش انا او حتة اقابلة فى نص المشوار هو اللى جة لحد باب البيت خدها
ولما لقى ان قصة الورق هتاخد كام يوم اتصل بيا تانى بيعتذرلى ويقولى انا عارف انك محتاج العربية عموما شوف لو عايز تاخد عربية تانية من معايا كام يوم عبال لما دى تخلص مفيش مشكلة عايز تشوف عربية تانية وتصرف نظر عن دى براحتك شوف ولو لقيت حاجة احسن وعجبتك كلمنى اجيبلك فلوسك ( ال 1000 جنية العربون اللى خدهم)
يعنى هو سابلى العربية ب 1000 جنية ... يابلاش فكترا 98 ب 1000 جنية بس !! :049:
وبعد ماشتريت العربية بفترة لقيتة بيتصل بيا يطمن عليا ويشوف اية اخبار العربية ويقولى كل سنة وانت طيب علشان العيد !!!
انا كل لما احكى لحد الموضوع دة مش مصدق ..... انا نفسى مش مصدق لغاية دلوقتى ومستغرب ان فى ناس كدة !!!
الاهم من العربية تعامل الناس مع بعضها
والله فيه ناس محترمه
انا بقى مدفعتش ولا جنيه
الطيور على اشكالها تقع
The Birds With The Same Feather Fly Together
المحترم بيلاقى محترم
و المش محترم بيلاقى مش محترم
بأمانة انا اكتر حاجة كانت مريحانى ويمكن اكتر من العربية اللى مكشفتش عليها - مش اكتر من كان معايا سمكرى رفعها وجربت العربية على الطريق بس , لا روحت توكيل ولا بتاع - معاملة الراجل واخلاقة
والحمد لله مندمتش ابدا عليها ولا شوفت منها حاجة مش تمام ولا مشاكل الحمد لله (بسم الله ماشاء الله ربنا يبارك فيها)
الخلاصة زى ما بتعامل الناس هتتعامل
ايام ماكنت ببيع المازدا الراجل اللى اشتراها منى شاف العربية عجبتة قال هنروح نكشف قلتلة حقك تكشف فى المكان اللى انت عايزة انت هتدفع فلوس
الراجل طلع يجرب العربية واحنا رايحين نكشف مكنش مصدق نفسة من حالتها وثباتها ونعوميتها وهى ماشية بالرغم من موديلها - 1982 -
لقيتة بيقولى دى عربيتى وبيطلعلى 10,000 جنية ..
اية دة ؟؟ ... دة عربون وانا خلاص شارى من غير لما يكشف ولا ميكانيكى ولا سمكرى يبص على العربية
( طبعا عشر تلاف جنية عربون زى الفل) قولتلة فلوسك معاك وعربيتى معايا لما نبقى نخلص العقد ابقى اخد الفلوس كاملة مرة واحدة ومخدتش منة جنية ... الراجل مبقاش مصدق
وفعلا يوم مخلصنا شرحتلة كل حاجة فى العربية واديتة كتالوجاتها
والحمد لله لما جيت اشترى بالرغم من انى لفيت كتير وشوفت ناس كتير منهم الكويس ومنهم النصاب وشوفت عربيات كتير منهم الخردة ومنهم الكويس بس الحمدد لله ربنا وقعنى فى واحد محترم وعربية حالتها حلوة