عملت حادثه انهارده

**cyborg_ift** · 02-05-2010 09:47 AM

الساعه 7 الصبح وأنا ماشي على فيصل ومعايه مراتي وبنتي وماشيين في أمان الله

لقيت حاجه بتقول ددددددددب من الجنب الشمال وبتزق العربيه للرصيف ناحية اليمين طبعا وقفت قدامه ونزلت من العربيه بسرعه لقيت زباله راكب عربية زباله النقل الكبيره راشق في الباب اللي ورا شمال وطبعا متدمر هوه وجزء بسيط من الرفرف وحمدت ربنا انهه جت على كده لإن بنتي الصغيره كانت لزقه في الباب علشان بتحب تبص من الشباك.

لما نزلت الباشا قعد يتأسفلي ويقولي أنا غلطان وإعمل اللي انت عاوزه حتى لو عاوز تعمل محضر أنا تحت أمرك ونزله سواق اتوبيس وقاله بصراحه إنت حمار ده لولا إنه زود وكسر منك كنت دخلت موتت البنت الصغيره.....

المهم أنا مشيت ومعملتش محضر ولا حاجه لإني متأكد إني مش هيجيلي حقي وعن تجربه بس أحب أستفسر منكم تكلفة السمكره والدهان للباب والرفرف كام بالتقريب... وشكراً

**ZALABANY** · 02-05-2010 09:53 AM

ربنا يعوض عليك يا باشا وحمد الله على سلامتك انت والمدام والأمورة الصغيره وفداك أي حاجه ممكن تصورلنا الخبطه عشان نقلك تقريبا القصه دي تخش في كام

**N.a.j.d** · 02-05-2010 10:01 AM

الحمدلله ع سلامتكو ياباشا خير ان شاء الله ميهمكش
عموما الشباب ح ترد عليك

**hobaz** · 02-05-2010 10:09 AM

الف حمد الله على سلامة حضرتك...

**mrwho1982** · 02-05-2010 10:10 AM

اهم حاجة ان انت والعائلة كويسين والف حمدا لله علي سلامتك

دي كفاية الرعب اللي انت عيشته

وده لينك ممكن يساعدك

http://www.nilemotors.net/Nile/118993-a.html

وفداك الف عربيه والف حمدا لله علي سلامتك

**بحري** · 02-05-2010 10:56 AM

قدر الله وما شاء فعل..وربنا يخلف عليك بالخير
المشكلة فعلا إن واحد زي ده حتى لو حاول يعوضك أكيد مش حتلاقي معاه تكاليف الإصلاحات..والمفروض إن لو البلد فيها قانون إنه ياخد عقوبة تعزيرية..لكن حنقول إيه..وللأسف في النهاية لما اللي بيغلط مش بيتعاقب بيبقى عنده من السهل جدا إنه يغلط تاني وتالت ورابع وعاشر