انا حرمت اروح التوكيل..ابو غالي وتجربتي..ضروري جدا.....!
السلام عليكم
انا هحكيلكم تجربتي مع ابو غالي جسر السويس وياريت تنصحوني اعمل ايه ضروري عشان انا رايحلهم تاني بكرة ان شاء الله
انا رحت اعمل صيانة سنة ونص لاني مبقتش احسب الصيانات بالكيلومتر
المفروض كانوا يغيروا زيت فرامل مغيروش.....مش مهم؟
اتصل بيا مهندس الاستقبال يقولي التيل باقيله 2000 كم ويخلص تحب نغيره ولا تسيبه شوية( انا عامل 15500 كم بس)
قلت اغيره احسن عشان مجيش تاني
انا كان عندي التيل اصلا بيصفر في العجلة اليمين مع السخونة ومش عارف ليه
المهم غير التيل واكيد محتاج يطبع فبقيت امشي بيه وادوس فرامل كتير عشان يطبع بسرعة
وفجاة اليوم التاني بدا يصفر تاني في نفس الناحية اليمين (الشمال مبيصفرش ولا مع القديم ولا الجديد) وحسيت ان الفرامل مش بتمسك بسرعة زي القديم (بتاع الفبريكة)
فكيت العجلة وقلت ابص لاقيتهم مركبين تيل لونه اسود ومكتوب عليه
Non Abs
Made in Korea
حساب التيل (100 جنيه التيل و10% ضريبة و30 جنيه تركيب يبقي 140 جنيه)
انا عارف وانتوا بردو اكدوا عليا ان التيل الاصلي بيبقي اخضر ومش مكتوب عليه غير شوية احرف وارقام......معني كده ان جوا التوكيل بيغيروا تيل مش اصلي.......(وب 140 جنيه كمان)
اذا كان الكلام ده صحيح تبقي مصيبة
انا رايح بكرة يا جماعة انصحوني اعمل ايه ضروري جداااااااااااااااااااااا
انا عايز اروح اتخانق معاهم
وايه المشكلة ان ناحية تصفر والتانية لا مع التيل القديم والجديد........ممكن تكوني مشكلة في الطنابير؟