لادا سمارة

**elghrory** · 03-05-2010 01:36 AM

انا كنت بفكر أشترى لادا سمارة ومحتاج مساعدتكم
من ناحية أسعارها وأسعار قطع الغيار وتقيمكم للسيارة؟

**waelms3** · 03-05-2010 02:54 PM

باشا العربية الادا سمارة عربية جميلة تجمع بين المتانة والقوه والتصميم الجميل فهى من حيث الصاج والمتانة فهى عربية تستحمل الجهد الشاق ومتطلبات شوارعنا والعربية انعم بكتير من الادا 2107 العادية المنتشرة لانها على كبالن ودريكسونها اسكاترا انعم بكتير من الاسكودا والشاهين مثلا بالنسبة لقطع الغيار انتشر عنها انه حاجاتها غالية او مش موجودة مش عارف ليه مع ان كل حاجاتها موجودة وفي منها الصينى والايطالى والروسي والتركى واسعارها اقل من الفئة بتاعتها يعنى مثلا الاكصدام ب 180 الصينى و ب 270 الايطالى و تيل الفرامل 40 تركى فى الشاهين ب 55 وعندك بلية العجلة 40 ايطالى فى الشاهين 60 تركى و جوز كبالن ايطالى 240 والصينى 180 يعنى قريبة من 128 وعندك سير الكاتينة الروسى الاصلى ب 55 و الفانوس صينى بس كويس 80 و جوز الطنابير 160 ايطالى والشاهين 320 تركى والشبكة ب 35 جنيه يعنى حاجتها كلها فى الرخيص والمحلات قلى بتبيع قطع غيارها

1 - عندك حمدى لادا فى التوفيقية وفى شارع دمشق
2- عندك سيد نصار فى التوفيقية
3- عندك احمد محرم فى عين شمس وامين جدا وانا بجيب منه كل حاجة ارخص واحد وانضف حاجة
4- عندك المركز الروسى فى التوفيقية برده وحاجتهم كويسة
5- اوتو لادا فى التوفيقية برده
6 - ربيع لادا فى جسر السويس

العربية دى بدات انتجها 86 لغاية 2003 طبعا فى اختلافات فيها من كل موديل
من 86 الى 91 نفس الموتور ونفس التصميم
من موديلالى92 اتعدل حاجات فى الموتور وزاد الهورس باور
من موديل 94 اتعدل جزء صغير من الهيكل الخارجى البودى وهو الجزء بتاع الكبوت
قلى معاه سمارة حيعرف الجزء ده
من موديل 2000 اتعدل الموتور من كربراتير الى انكيجشن

اخيرا المواتير بتاعتها رخيصة فى بورسعيد والوكالة و عزبة شلبى يعنى ممكن حضرتك تجيب ماتور كامل حالتة تمام 2500 بالفتيس بتاعه بكا مشتمالته
ياريت اكون وصلتلك اى معلومة صغيره عنها وانا فى الخدمة

**waelms3** · 03-05-2010 03:09 PM

ومن موديل 2003 اتعدل الفوانيس والشبكة الامامية و التابلوه مع تغيير فى هيكل العربية تماما ونزل منها فئة السيدان و تنتج الى الان
وعلى فكرة العربية دى منتشرة فى تركيا جدا زى الشاهين

**besoana** · 03-05-2010 05:03 PM

انا معايا لادا سمارا موديل 91
وبجد العربية مريحانى جداااااا
عيوبها تكاد تكون معدومة
وحاجتها منتشرة الحمد لله زى العضو اللى قبلى موضح
لو قدامك واحدة حالتة حلوة اتوكل على الله واشترى

**د.محمود صلاح** · 03-05-2010 05:47 PM

شكلها أشيك من اللادا 2107 في وجهة نظري ..

**waelms3** · 13-05-2010 02:20 PM

بصراحة يا باشا الموديل الجديد السيدان قطع غيارها قليلة اوى ومش منتشرة زى القديمة وغير كده شركة الامل دى شركة سيئة جدا وبتجيب الحاجة بعد ما العميل يكون صدا ممكن تزود السعر وتجيب حاجة كورى

**Superdriver** · 14-05-2010 04:48 PM

شكرا جزيلا على الإفادة.

**gebreel** · 14-05-2010 05:31 PM

معايا ال2004 اللي هي الشكل الجديد و تحت امر حضرتك في اي حاجة

العربية عاملة معايا حتى الان 84000 كيلو و بحبها جدا لأني بحس انها اصيلة

بالنسبة لقطع الغيار كان ممكن نقول انها قليلة من بتاع سنتين كدة لكن بحمد الله من ساعة ماجبتها في نص 2005 تقريبا مدختش على حاجة غير الموبينة بتاعتها لما باظت و ملقتهاش غير في التوكيل للأسف و دي كانت ب 660 جنيه في التوكيل لأنها مش موجودة في اييييييييييييييييي مكان برة لكن جبت فانوس اشارة كامل ب70 جنيه تركي
وش فانوس امامي 50 جنيه
فلتر هواء ب30 جنيه
فلتر بنزين 50 جنيه
فلتر زيت 30 جنيه
طقم دبرياج كامل 370
تيل فرامل بفيشة 80 جنيه
ده اللي انا فاكرو بس اللي معايا ال1500 مش ال1600 و اعتقد مفيش فرق بينهم يعني

العربية ما شاء الله موتورها ال1500 عزمو كبير و بيستحمل بس يعيبها مثلا ان مفيهاش تكييف و اكيد التوكيل التيييييييييييييييييييييي يييييييت بتاعها اللي مدخلتوش غير مرة واحدة و حلفت مانا داخلو تاني غير علشان تغيير سير الكاتينة و طرمبة المية اللي هية كل 60000 دي

صيانتها مش صعبة نهائي بالعكس بسيطة جدا و اي ميكانيكي فاهم يظبطلك الاداء فيها

محلات قطع الغيار:
حمدي لادا في التوفيقية
الفهد في التوفيقية
اولاد حسين في التوفيقية

دول اللي بتعامل معاهم