الموضوع: هو مافيش امل السلوكيات تتظبط في الشارع ابدا ؟؟؟؟

سلام عليكم
موقف سخيف جدا حصل معايا النهارده

موقف رقم 1
كنت ماشي في شارع النزهة , و داخل الشارع اللي جنب دار الدفاع الجوي , و انا ماشي اديت اشارة يمين , كان فيه على يميني حارة فاضية و قدام شوية فيه عربية واقفة صف تاني قافلاها , و انا قريب من العربية اللي واقفة لقيت عربية داخلة بسرعة من يميني و بتحاول تسبقني عشان تكسر قدامي قبل العربية الواقفة , بصراحة ما كانش مني الا اني شديت شوية و خليته اتزنق بيني و بين العربية اللي واقفة قدامه , و اضطر انه يهدي و يحترم نفسه و يدخل ورايا زي ما كان مفروض يعمل (هو اصلا كان عايز يجري و يرمي نفسه قدامي فانا افرمل و هو يكمل بالطريقة اياها اللي اغلبنا عارفها)

دي بتحصل كتير

موقف رقم 2 ( الأسوأ بقى)
دخلت الشارع اللي جنب دار الدفاع , الشارع يا دوب بياخد عربية رايحة و عربية جاية بالعافية , لقيته واقف رايح جاي , كان فيه عربية لانسر واقفة في المعاكس خايفة لا المساحة ما تعديهاش , شاورت للي سايقاها لحد ما عدت , و اتحرك المعاكس و كان صف طوييييييييييل , و وقفنا نستنا كلنا
خلاص كان المعاكس فاضل فيه كام عربية بيعدوا من حتة ضيقة قدام و جايين
و اذ فجأة ابص في المراية الاقي عربية افيو فيراني جاية من ورايا و ماشية في العكسي اللي ما صدقنا سلك ( سلوك سيء رقم واحد )
طلعت دراعي و شاورت له كذا مرة له عشان يقف (و زوجتي قالت لي اني لما كنت باشاور بدراعي كانت زوجته كما هو يفترض بترد بإشارات معناها "هش هش") و تجاهلني تماما و دخل ( سلوك سيء رقم اتنين)
لما لقى ان العكسي قدام فيه عربية جاية في وشه , راح رامي بوز عربيته في حتة كنت سايبها فاضية قدامي ( سلوك سيء رقم3)
اتنرفزت جدا بصراحة
و الحمد لله كان فيه حتة فاضية على اليمين رحت داخل فيها بسرعة و لفيت حواليه و دخلت ببوز عربيتي قدامه تاني , و حاول يقفل عليا لكنه ما لحقش ( سلوك سيء رقم4)
فضلت ماشي هادي مع الطريق و هو ورايا لحد اول تقاطع , مشيت انا طوالي , و يبدو انه كان داخل يمين - و بالتالي هايعوز يسيب طريقه عشان يواصل الخناقة - فسمعت سباب بذيء جاي من ورا ساعتها , و الظريف انه بيعمل كده و معاه أسرة فيما يبدو ( سلوك سيء رقم5)

انا نادر اوي لما باتنرفز على حد كده في الطريق , و مش باحب اكاسر مع حد , لكن بصراحة الشخص ده , مش عارف اقول عليه ايه , كل السلوكيات اللي عملها دي بتدل على حاجة واحدة بس في طبيعة الشخص ده , و الأظرف انه كان متغاظ جدا , تقريبا لأني كسرت عليه زي ما كسر عليا , بعد ما كان مشي في العكسي و تجاهل الحشرة اللي بتشاور له بدراعها عشان يقف و ما يقفلش الطريق