الموضوع: استفسار عن شراء دراجة

الاسعار قريبه
خصوصا ال 250 وال 400

الا لو حتشتري موديل عالي 2000 وطالع السعر بيفرق
عن هنا وكمان الحاله

روح هناك فى حته اسمها الاستثمار

ادخل الموضوع الي اسمه

موضوع جديد جدا

حتلاقي فيه تجار في بورسعيد

اوك متشكر جدا

للعلم ليس إلا
أسعار بورسعيد نفس أسعار مصر الـ 250 إفراج من 14 لغاية 15 والـ 400 من 17.5 لغاية 19 حسب الحاله والـ 954 موديل 2003 بتلعب من 38 لغاية 49 حسب الحالة والتعديلات الي فيها ودي نفس الأسعار الي في مصر عند جميع التجار
في ناس بتقولك أنا أروح أجيب موتسيكل من بور سعيد
هاتقع في إيد أشرف خميس أو حسام أو محمود ولو فكرت تدخل الإستثمار مش هاتعرف تخرج بمكنه من هناك ولا تتفرج أصلا لإنهم جوه الإستثمار هايقولولك البيع في المعارض الي بره الإستثمار والمكن الي بيدخل بور سعيد تبع المعارض فا ماتحاولش
ودي الحسبه الكامله بتاعت مكن بور سعيد
150 جنيه رسوم العقد المسجل ولوتوكيل عالبايع بس قابل مشاكل ورق
25 جنيه إكراميه للعامل الي في المعرض الي إشتريت منه
300 جنيه ناولون العربية النص نقل من بور سعيد لمصر قابله للزيادة
50 جنيه منفذ الجمارك قابله للزياده لغاية 150 حسب مزاج البهوات
25 جنيه إكرامية سائق النقل
100 جنيه مصاريف طريق رايح جاي
وصلت المكنه مصر بالسلامه
غيار زيت حسب المزاج عندك من 37 لغاية 235
بوجيهات حسب مزاجك عندك Dinso بـ 55 والـ NGK بـ 140
تنضيف كاربريتور من 60 لغاية 100 حسب الصنايعي
تعالا بأه وقابل لو البطاريه فيها حاجه عند بطاريات من 140 لغاية الياباني 375
أصل القصه دي عشناها كتير وإستوينا منها ومش أول مره نجيب مكن من بورسعيد لأ ده إحنا إستنصحنا كتير وخدنا على قفانا كتير لدرجة إننا حفظنا بورسعيد صم وأخر مكنه جبتها من هناك كانت ريبل 250 دايره وميه ميه إفراج
وصلت مصر وإتشقلب حالها
المكنه الله أكبر موتور وشاسيه فابريكه وحاله فابريكه بس وصلت مصر البطاريه إنتهت وورق الدبرياج إنتهى وتيل الفرامل إنتهى وأولسيهات المساعدين ضربوا زيت والكاربريتور هباب من ورا
والله العظيم زي مابقولكم
إتشقلب كيانها وعايز أقولكم إني ركبتها في بورسعيد مفهاش ولا غلطه وبتدور من لسعه
بس الظاهر تغير الجو بيجيب حموالنيل للمكنه
ومكنه تانيه 250 سي بي أر بطاريه بايظه وقطع في الديل
ومكنه تانيه 400 سي بي أر أولسيهات وجنوط لونها راح من أول غسله
الي عايز أوصلهولكوا إنك لو مش أوي في المكن إرجع لعقلك
بلدك بيك أولا
والله تتكلفت في ثانيه
أنا ياما إتكلفت ولغاية النهارده لو روحت هاتكلفت عشان مش هابيع الميه في حارة السقايين ولا أجدع ميكانيكي هايروح هناك هايعرف يبيع الميه عليهم من الأخر
وعايز أقولكم إنهم حبايبي قوي هناك وأنا أقدر أجيب من بورسعيد بـ 500 جنيه أقل من أي حد أشرف أو محمود أو حسام
أشكركم على طولة بالكم عليا
أخوكم في الله قبل ماكون أخوكم في المنتدى ( إ - أ )

اشكرك اخ نور على المعلومات الجامدة ال افدتنا بيها طب وياترا المكنة لو جت من مصر هتكون عايزة تغير نفس الحاجات دى بردو ولا المعارض هنا بتغيرها تلقائيا