ارجو المساعده

**ashraf_salama** · 05-05-2010 01:05 AM

مساء الخير عليكم جميعا :
لى استفسار وارجوا المساعده من حضراتكم
- انا باتعلم السواقه حاليا , والاسبوع الماضى ركبت عربيه شاهين مع احد الاصدقاء , ولاحظت علشان العربيه تتحرك لازم نرفع الدبرياج سنه سنه وندوس بنزين سنه سنه مع مشاكل ان العربيه تنط وتبطل .
- واليوم انا اتعلم مع مدرب على فرنا 2010 ، لاحظت ان العربيه بتمشى لوحدها بمجرد رفع الدبرياج سنه سنه بدون ان ادوس بنزين ثم بعد ذلك ندوس بنزين سنه سنه .
وسالت المدرب عن ذلك قال ان الشاهين فيها اسطوانه وديسك بايظين .
فهل الكلام ده صحيح ام جميع السيارات القديمه فيها نفس المشكله .

وشكرا جزيلا لحضراتكم ....

**د.محمود صلاح** · 05-05-2010 05:11 AM

لو الإسطوانة أو الديسك بايظين العربية ما تمشيش حتى ولو رفعت دواسة الدبرياج ودوست بنزين , أو تمشي متبرجلة وما تسحبش ,,
الفرنا تلاقي حساسيتها عالية عن الشاهين عشان جديدة

**Abdm** · 05-05-2010 09:14 AM

الموضوع دة بيكون مظبوط قوى فى العربيات الجديدة لآن الكربراتير أو الآنجكشن لسة جديد ومظبوط والكهرباء بتاعتها مظبوط . الحكاية كلها بتم عن طريق حاجتين :
أول حاجة تنظيف الكربراتير والبيكات بتاعتة كويس قوى مع فتح مسمار الهواء وتعليتة شوية هيظبط الموضوع دة 100 100
والآسلوب دة أنا أفضلة عن الطريقة الثانية

الطريقة الثانية .ثانى حاجة : تزود الكهرباء بتاعة العربية شوية ودية لو زادت عن اللزوم بتكون مش كويسة على العربية بتسخن العربية وتستهلك بنزين وتأكل بوجيهات

فالطريقة الآولى أفضل بس عايزة تظبيط الكربراتير وتنظيفة وصيانتة بحيث يكون مظبوط 100 100 مع تعلية الهواء علشان يخلى الموتور يعلى شوية هو عيبة أنة بيخلى صوت الموتور عالى شوية بس بيخلى الموتور أسرع فى الدوارة والعربية هتتحرك بالدبرياج فقط من غير بنزين
والله الموفق والمستعان

**أحمد كمال** · 05-05-2010 12:05 PM

رفعة الرجل من عالدبرياج مش واحدة في كل العربيات

سواء لاختلاف نوع العربية او لاختلاف حالة الدبرياج

فيه عربيات بتلمس اول ما ترفع شعرة صغيرة

و فيه عربيات لازم ترفع شوية حلوين عشان تمشي

بالنسبة لموضوع الحاجة للبنزين و لا لأ

دي حسب السلانسيه بتاع العربية عالي و لا لأ

فيه عربيات السلانسيه عالي يعني ممكن ترفع سنة سنة من غير بنزين خالص لحد ما تسيب خالص و تفضل ماشي من غير ما تدوس بنزين

و عربيات لو ما شعرتش البنزين تبطل

**omaroof** · 05-05-2010 03:53 PM

المشاركة الأصلية كتبت بواسطة د.محمود صلاح

لو الإسطوانة أو الديسك بايظين العربية ما تمشيش حتى ولو رفعت دواسة الدبرياج ودوست بنزين , أو تمشي متبرجلة وما تسحبش ,,
الفرنا تلاقي حساسيتها عالية عن الشاهين عشان جديدة

+1