الموضوع: مصر اصبحت ساحة ضخمة للهبوط بالباراشوت

"فن الهبوط بالباراشوت"

الشعب المصرى اصبح عنده موهبة غريبة جدا هى موهبة الإنحداف، او الهبوط بالباراشوت ، اصبح كل فرد يفكر فى قضاء احيتاجاته بيفكر ازاى يتحدف على حد يقضى احيتاجاته على قفاه:

امثلة:

1- واقف بتغطى عربيتك فى امان الله تلاقى كناس من الشارع اتحدف عليك علشان يساعدك فى تغطيتها بشكل سيؤدى فى النهاية الى تمزيق الغطاء وخربشة بوية العربية ويطالبك بفلوس على خدمة انت ماكنتش عايزها اصلا

2- نازل من بيتكم فى امان الله تلاقى جارة قررت انها تهبط بالبارشوات على بير السلم وتحوله الى مغسلة سجاد، والأرض كلها مية بصابون وانت بعد كدة تتزحلق ولا تنقصف رقبتك مش قضيتها خالص

3- داخل محطة البنزين تشترى وقود لعربيتك تلاقى شاب ضارب شعرة جيل ولابس بدلة واسعة عليه وكرافته عاملة زى المشنقة نازل بالباراشوت عليك يحكيلك حكاية طويلة عريضة عن مسابقة تتضمن سؤال عن عاصمة مصر لو عرفتها تكسب شاليه فى اورانوس او عطارد بس تدفع 10 جنيه اشتراك المسابقة

4- ياويلك يا سواد ليلك لو فكرت تفتح نشاط تجارى، محل فول وطعمية او ادوات صحية او ملابس، كدة يبقى انت انشأت ساحة تدريب لكل انواع القفز بالمظلات، هتلاقى باراشوتات اشكال والوان نازله عليه، براشوت من القسم وباراشوت من الحى وباراشوت من التموين وباراشوت من الصحة وباراشوت من الدفاع المدنى وباراشوت من مكافحة المخدرات وممكن تكون محظوظ وتلاقى باراشواتات من السى آى إيه او ال إف بى آى

5-تغلط وتذهب الى اى زيارة عائلية، تلاقى احد اقاربك اللى انت عارف كويس جدا انه ميسور ومستور يتحدف عليك بالباراشوات ،يطلب منك اى حاجة، سلفة، مشاركة فى مشروع، توصيلة بالعربية،حاجة قديمة عندك كنت ناوى تبيعها يطلبها منك عشم، المهم فى الآخر انه لازم يطلع منك بأى سبوبة او نحته

6- نوع تانى من انواع الباراشوتات العائلية اللى ممكن تحصل فى نفس الزيارة، تلاقى فلانة بشتكيلك من جوزها اللى عمل وسوى وشال وحط، وجوزها بيشتكى من انها مبتعملش ومبتسويش ولا بتشيل ولا بتحط، ولازم تحكم فى القضية وتبقى طرف فى مشكلة مش بتاعتك اصلا ولو حاولت تخلع نفسك تبقى إمعة ومالكش رأى

8- طبعا باراشوتات المرور والكمائن وشحاتين الإشارات وبتوع الفوطة الصفرا والأطفال الذين يلصقون افواههم بزجاج سيارتك لحد ماتزهق وتشترى منهم كلينيكس ، وباراشوت الراجل اللى بيلم حق التذكرة الى بلدهم كلها باراشوتات بنقابلها كل يوم

9-الراجل اللى بينزل بالباراشوت قدام عربية ماشية بالراحة فى شارع زحمة، وغالبا ما بتكون سايقاها واحدة ست ، ويعمل فيها متعور ومتكسر وطبعا الست درءا للمشاكل ومنعا للبهدلة تديله اللى فيه القسمة والغريبة انك تلاقيه قام وطلع يبرطع ولا حصان السبق بعد ما ياخد اللى فيه النصيب

10- باراشوتات المصالح الحكومية ، وان كانت هذة تتم بالعكس، يعنى انت اللى بتروح لهم علشان تقضى مصلحة ليك، وطبعا انت فى هذة الحالة بتتعامل بطريقة "انت وقعت وللا الهوا رماك"

12-حتى التليفون تحول الى ساحة للهبوط بالمظلات، يرن الموبايل من نمرة غريبة، ترد وتقول الو تلاقى بنوتة امورة تعرفك بنفسها انها فلانة الفلانية من شركة كذا(ودايما تلاقى اسماءهم شيك جدا ، يعنى الأسم الأولانى لازم يكون على الموضة واسم العيلة لازم يكون حاجة فخمة جدايعنى مثلا تلاقى المتصلة اسمها ريهام لاظوغلى او رانية طبوزادة او ماهيتاب البيدرقدار، لكن محصلش مثلا مرة ان اتصلت بيا مندوبة اسمها سيدة بيومى او فتحية جمعة مثلا) المهم ان دايما نشاط شركة المندوبة سليلة الحسب والنسب ينحصر فى شئ من ثلاثة، التأمين، او بيع اشتراكات سنوية فى فنادق، او انه يكون بنك بيبيع بطاقات ائتمان، وعبثا احاول اقنعها ان انا راجل على باب الله لا بعمل داى يوز فى فنادق ولا امتلك ما يستحق التأمين عليه وعامل كرت ائتمان يتيم فى البنك التابع للشركة وحدى الإئتمانى لا يسمح بالمزيد، ومافيش فايدة لحد ما ازهق واقفل السكة فى وشها

11- حتى وانت قاعد فى بيتك عازل نفسك عن ساحة الهبوط بالمظلات الضخمة اللى بقينا عايشين فيها ،تلاقى اللى نازل عليك بالباراشوت يخبط لك على باب البيت ، يشحت او يضيع من وقتك ساعة يحاول يبيعلك حاجة انت مش عايزها

فعلا منطق الكسب عندنا بقى غريب جدا، الناس فى الدنيا كلها بتفكر فى العمل كوسيلة للكسب، لكن عندنا الناس بتفكر فى الكسب بطريقة فيه الحتة اللى فيها سبوبة انزل عليها بالباراشوت

لدرجة انى فعلا بصحى كل يوم الصبح قبل ما انزل من بيتنا ادعى ربنا واقول، يارب اكفينا شر الطريق وحوش عنى البارشوتات اللى بتنزل من السماء، وعدى عليا اليوم من غير ما حد يتحدف عليا، ده غير انى اتربت عندى حاسة رادارية بتلقط اى طيارة ناوية ترمى عليا باراشوت ، تلاقينى جريت واستخبيت فى اى حتة امان لحد ما الباراشوت يعدى

بس فعلا بفكر جديا انى اسأل عن الأجراءات المطلوبة لتحويل بيتى وسيارتى المساحة التى اشغلها من الطريق ومقر عملى الى منطقة آمنة اقدر احط عليها يافطة مكتوب عليها "ممنوع القفز بالمظلات" ، يا ترى حد فيكم عنده فكرة الإجراءات دى ممكن اعملها فين؟