الموضوع: رابطة حائزى الفلوينس

المشاركة الأصلية كتبت بواسطة Dr Dido

بسم الله الرحمن الرحيم والحمد لله رب العالمين والصلاة والسلام على سيدنا محمد سيد الخلق أجمعين ،
اما بعد
فأولا ببارك لجميع الاخوة الاعزاء اللى استلموا على خير بصفة عامة و الاستاذ bukla صاحب هذا الموضوع الممتاز بصفة خاصة وربنا يعطينا خيرها و يكفينا شرها اللهم آمين
ثانيا اسمحولى احكيلكم على تجربتى البسيطة مع صاروخنا المتميز
انا الحمد لله استلمت امبارح من عند محمد زكى وخدتها طلعت على البيت فى الرحاب و لفيت كام لفة فى الرحاب كدة ونزلت منها بالعافية وبعدين خدت عربية مراتى الجييلى ck2 الاوتماتيك الصينى و رحت الهرم فححكيلم على ملاحظاتى الاولية بكل حيادية
أولا الشكل الخارجى متهيئلى اى حد حيشوفها على الطبيعة مش حيقدر يغمض عينيه وربنا يسترها معانا و علينا من شر العين ثانيا اتزان العربية ممتاز انا عملت بيها مناورتين كدة على 110 انا كنت سرحت حبة كدة على الدائرى والتحكم فى العربية جيد جدا بالرغم من ابعادها الكبيرة و بعد شوية كلنا حنتعود على ابعادها لانى كنت عانيت المعاناة دى قبل كدة لما نقلت من لانسر 95 لالنترا 2007 وبالنسبة لطلعة العربية طبعا بطيئة جدا بالمقارنة مع الالنترا والموضوع ده مدايئنى شوية لانه لا يتناسب مع اسلوب سواقتى وما بيسعفش فى الزحمة ولو عايز تتجاوز عربية تانية بتبقى صعبة شوية ، فى حاجة مدايئانى كمان الفتيس بتاعها مش عاجبنى اوى ، تالت حاجة العفشة اللى ورا نشفة شوية برضو بالمقارنة مع الالنترا غير كدة كل حاجة جامدة جدا من عزل للاصوات الخارجية للخامات المستخدمة للتكييف لوسع العربية لراحة جميع الركاب فى العربية لكل الحاجات الجميلة اللى كلنا اتكلمنا عليها قبل كدة وفعلا العربية تستاهل كل جنيه فيها
وفى الآخر يشرفنى الانضمام لوحوش الرينو بصفة عامة ولربطة مالكى الفلونس بصفة خاصة

مليون مبروك على الاستلام زميل الكفاح فى انتظار الفلوينس ومرحبا بك عضو مؤسس فى الرابطة
و كمان الف شكر على مشاركتك المميزة
اما بقى بخصوص العربية فمقارنتها بالالنترا (من ناحية الطلعة فقط) انا بعتبرها مقارنة ظالمة لأكثر من سبب وهم كالاتى
الانترا الموتور 124 حصان الفلوينس 105 حصان
الانترا اخف وزنا و دة اساسى يفرق فى الطلعة
الانترا كورى و الفلوينس اوروبى و دة معروف بتقل طلعتة(لو جرت الفيكترا حتحس ان الفلوينس بورش فى طلعتها)
الانترا اكيد متلينة و ممكن كمان موتورها مفتوح الفلوينس لسة بتقول يا هادى
علشان احساسك بتقل الطلعة اللى مضايقك دة يروح كل اللى انت محتاجة
الصبر على اعربية مرحلة الاف كيلو الاولانى, استعمال بنزين 95 لو امكن
اما اذا احساسك دة استمر مع انى ان شاء الله متأكد انة حيروح يبقى ممكن تعتبر دة عيب مقابل مميزات اخرى زى الثبات و الامان اللى بتتمتع بيهم عن الانترا
اما شكل الفتيس فأنا معاك هو فعلا كان المفروض يعملوة شكلا احلى من كدة
العفشة بقى بصراحة محستش بالحكاية دى لكن جرب كدة تظبط الهوا فى الكاوتش زى ما مكتوب على الباب قدام 32 وورى 29 متهيألى حيروح احساسك بنشوفية العفشة الخلفية
عموما مبروك مرة ثانية و برضة مستنين مشاركاتك و ملاحظاتك بعد فترة من الاستعمال

المشاركة الأصلية كتبت بواسطة neversighs

الفين مبروك يا حاج بوكلا على الاستلام .. وربنا عوض صبرك خير .. وان شاء الله قريبا ننضم ليكم .. بس ليا عندك سؤال بصفتك رحت العبور وشفت كل الالوان .. ايه رايك في اللون الفيراني الفاتح .. انا حاجز فضي وبفكر أغير للفيراني الفاتح .

الله يبارك فيك يا باشا و ان شاء الله ربنا يعوض صبرك خير اما بانسبة للالوان بصراحة انا اكتشفت حاجة غريبة و انا هناك فى العبور وقدامى تقريبا كل الاوان اللى بتنزل اكتشفت ان كل الاوان حلوة على العربية حتى الابيض اللى انا عمرى ما اقتنعت غير انة يبقى لون ثلاجة مش عربية لقيتة تحفة على الفلوينس علشان كدة لو انت عاجبك الفيرانى الفاتح ممكن يكون من رأيى افضل مش علشان الفضى وحش بالعكس دة تحفة دة كان اختيارى الثانى بعد الفيرانى الغامق لكن علشان فى بلدنا للاسف كل ما تغمق لون العربية يبقى احسن لسوق الاحوال الجوية و الاخلاقية عند معظم الناس
وربنا يوفقك ان شاء الله لما فية الخير ليك

المشاركة الأصلية كتبت بواسطة sephian

يا جماعه انا عايز حد يقنعنى جامد ويقولى الفرق بين ال 125000 وال 135000 لانى لو اقتنعت بال 135000 ححاول اجيبها لكن هى حتزنقنى جامد فى الفلوس بس لو الفرق فعلا يستاهل ده مع ملاحظة انى خايف جدا من الاوبشن العالى لو حاجه فى باظت خايف يكون تمن تصليحه باهظ التمن فيا ريت تنصحونى لله لو الفرق مش مستاهل يبقى بلاش عشان كمان ابدا احجز واشتنى دورى

بص يا باشا دى حاجة الواحد لازم يحكم عليها بنفسة بس يبقى حاطط فى اعتبارة ان كل ما الرفهية بتزيد دة بيبقى لة ثمن انا حديك ملخص الفروقات و انت احكم بس لو سألتنى عن رأيى حقولك تستاهل و نص كمان لانك بتجيب عربية المفروض ان شاء الله تقعد معاك فترة طويلة فلأحسن تكون فيها تكنولوجيا متقدمة ماتحسش مع مرور السنين انها بقت موديل قديم و متخلف خصوصا ان التطور بقى سريع جدا و اللى كنا بنسمع من سنين قليلة انة فى البى ام و مرسيدس انهاردة بقى فى عربيات صينى
فى الاخر الخيرة فيما اختارة الله
اسيبك مع المقارنة
اتوماتيك Expression A - 125000.00
- جنوط عادية 15 بوصة
- تكييف هواء عادى
- مساند رأس يمكن تعديل ارتفاعها وميلها ٤ أوضاع
- فوج لايت امامى
- الكنبة الخلفية يمكن امالتها 1/3 و 2/3

اتوماتيك - Dynamic 135000.00

كل اللى فات و تزيد عنهم:
- جنوط رياضية ١٦ بوصة
- تكيف هواء أوتوماتيك " Bi-Zone" يمكن ضبط كل جانب عل حده
- مخرج خلفي للتكيف
- مفتاح كارت - ستارت بوتن " رينو كارد "
- نظام تشغيل التلقائي للمصابيح -Auto lighting sensor
- نظام التعرف على الأمطار وتشغيل المساحة تلقائياً - Rain sensor
- نظام تأخير غلق الإضاءة - Follow Me Home
- نظام تشغيل الأضواء عن بعد
- مصابيح ضباب
- مراية جانبية يمكن ضبطها و طيها كهربائياً مع تدفئة ذاتية
- راديو CD MP3 و بلوتوث و عدد ٦ سماعات
- مقبس ١٢ فولت بصندوق التخزين بمسند إليد الأمامي
- درج تبلوه مزود بإضاءة وتبريد مع التكيف