يا جماعة انا عندي فلولنس 2015 عاملة 3000 كيلو بس في طقطقة في الابواب، و صوت غريب عند الرجوع للخلف، و الشنطة بتقفل بالرزع، و دواسة الفرامل زي متكون ملخلخة شوية، هل ده طبيعي؟؟ و هل في صيانة ال 5000 كل ده هيتصلح في الضمان؟ شكراا
عرض للطباعة
يا جماعة انا عندي فلولنس 2015 عاملة 3000 كيلو بس في طقطقة في الابواب، و صوت غريب عند الرجوع للخلف، و الشنطة بتقفل بالرزع، و دواسة الفرامل زي متكون ملخلخة شوية، هل ده طبيعي؟؟ و هل في صيانة ال 5000 كل ده هيتصلح في الضمان؟ شكراا
join us Renault fluence club Egypt
53 لتر 95 ب اقل من 150 جنيه .... ذكريات
يا جماعة انا هبقي عضو جديد انشاء الله ، بس هل رينو فلوانس ٢٠١٦ الفئة e3 نازلة من غير ستاير في الأبواب ؟
عندي كذا استفسار بخصوص الفلوانس 2015 :
1-الفتيس الاوتوماتيك لو حد هزه برجله بيقلب مانيوال (هو ده طبيعي)
2-عايز اطفي نور العربيه الصغير الامامي بالنهار مش عارف
3-تنك البنزين بيفول بس المؤشر بيبقا فوق النص بشويه
4-لو حد يدلني علي احسن مركز صيانه يبقي ليه الشكر لاني كنت رايح فرع القطاميه وقالولي وحش اوي
الفتيس بيقلب مانيوال عند تحريكه لليسار. ده طبيعي. قد يدفعه طفلك بقدمه اذا كان يجلس مع والدته علي المقعد الامامي. تذكر هذا اذا فقدت العزم فجاه
اطفاء الليد لايت ممكن من الشاشه قبل تحرك السياره من settings علي ما اتذكر
صيانه ابو رواش و العبور جيده
المؤشر لا يصل للنهايه عند التفويل. . طلمبه البنزين لا تتوافق مع البنزين السئ عندنا.. يتم تغييرها في الضمان و دي مشكلة قديمه و معروفه و منتشره و حلها سهل. لكن الظاهر عاجبه الشركه.
الف شكر ياباشا علي ردك وفعلا طفيت النور الامامي وطمنتني علي موضوع الفتيس وانشاء الله ححجز في العبور وحشوف موضوع الطلمبه
بعد اذنك انا اتاخرت شويه في صيانة العشره بحوالي الفين كيلو هل ده غلط عليالعربيه او يعمل مشكله في الضمان
في سؤال تاني انا كنت بشغل لاولادي شاشتين عرض ورا وبعدين لقيت الولاعه مش شغاله ده يبقي فيوز ؟؟؟ ولو كده اغيره ازاي
وفي حاجه تانيه في زرار ورا حامل الطفايه الامامي ده بتاع ايه
اسف علي الاطاله وشاكر جدا اهتمامك
تعليق بسيط على موضوع مؤشر البنزين:
الموضوع ده موجود فقط فى الفلوانس موديلات 2010 و حتى 2013 اللى هى الشكل القديم
من ساعة الفيس ليفت، لا يوجد اى مشاكل فى المؤشر او العوامة و لا يوجد اى حساسية من البنزين
الكلام ده اكيد
بالنسبة لو كان علق مع حضرتك، تأكد من انك كنت بتفول و السيارة مطفية مش دايرة لان ده بيلغبط الكمبيوتر
غير كده، توجه لمركز الخدمة لان دى اول حالة نسمع عنها فى الفيس ليفت
تحياتى
لا شكر علي واجب يا باشا... بالنسبه للزرار ورا حامل الطفايه فاعذرني لا اعلم لاني لا اتذكر وجوده و سيارتي فيس ليفت 2013 و احتمال يكون مش موجود عندي.. للاسف السياره بعيد عني حاليا.
بالنسبه للكهربا فبخبره الهواه في جميع السيارات بصفه عامه دي بتكون فيوز. ولا انصحك تخلي حد يلعب فيها وانت في الضمان. نبههم ليها في الصيانه او عند فحص طرمبه البنزين
تاخير في الصيانه.. عاده هما متفاهمين جدا. اتصل بالتليفون و احجز معاد و قولهم انك كنت مشغول او مسافر مشوار طويل و ماعتقدش فيه مشكله
موضوع المؤشر معروف ان لو زودت بنزين من غير ماتطفي السياره ممكن المؤشر يدي قراءه غلط احيانا مش دايما.لكن المشكله مستمره الموضوع مختلف. انا سيارتي فيس ليفت 2013 ولسه مغير طرمبه البنزين في الضمان من اقل من شهرين لنفس السبب. التوكيل نفسه لما اشتكيت من المؤشر كشف عليها و غيروها من نفسهم للسبب اللي قولته في ردي الاول.
السياره جميله جدا خصوصا في السفر عزل وعفشه ممتازين . و التوكيل كويس.. مبروك عليك
الزرار ورا حامل الطفاية ده بتاع تثبيت السرعة وتحديد السرعة..عامل زى مفتاح النور له حركتين...اول ماتشغله على مثبت السرعة..تلاقى علامة خضراء ظهرت فى التابلوه والبزراير الشمال اللى فى الدريكسيون تقدر تثبت السرعة فى السفر وتزود وتنقص كمان. وبمجرد دوسة خفيفة على دواسة الفرامل بتلغى تثبيت السرعة. وده جربته فى السفر وممتاز
لو شغلت نفس الزرار فى الاتجاه التانى تلاقى علامة برتقالى ظهرت فى التابلوه لتحديد السرعة..لما تنشطه عند سرعة معينة مهما دست بنزين العربية ماتعديش السرعة اللى اخترتها وده ماجربتوش لغاية الوقتى.
مثبت السرعه بيريح رجلك في السفر مسافات طويله لانه يعطيك فرصه تشيل رجلك من علي البنزين و تستمر بنفس السرعه
محدد السرعه بيريح جيبك في نفس المشوار لانه بيحميك من تجاوز السرعه مهما دوست لزياده السرعه بدون قصد
طبعا ماينفعش الاتنين في نفس الوقت
المهم في الموضوع عن تجربه مفروض لو دوست جامد وبسرعه علي البنزين السرعه هتزيد حتي مع محدد السرعه وده علشان الطوارئ او للتخطي. لكن بالتجربه التسارع بيكون ضعيف و مايسعفش في التخطي في طريق اتجاهين زي طريق شرم مثلا. بطء التسارع ممكن يكلفك وقت في الحاره المعاكسه فيه خطوره.
الحاجه التانيه في مثبت السرعه لو انت مخزن سرعه و وقفت مثبت السرعه موقتا فنزلت السرعه. لو دوست تاني اشغله والفرق كبير بين السرعتين العربيه هتعمل كيك داون و هتتسارع بمعدل عالي للحاق بالسرعه المتخزنه.
لو ده في طريق مفتوح مافيش مشكله. لكن لو اخدت القرار ده و لقيت قدامك مطب او حد معدي و حبيت تفرمل في نفس وقت التسارع الفرامل ممكن ما تسعفكش لان قوه العزم بتكون في اقصاها.
علشان كده بافضل ارجع للسرعه المطلوبه بزرار + تدريجيا كل دوسه ب 2كم زياده.
النقطه الاخيره ال abs صحيح هوه تقدم في تكنولوجيا السيارات وصل لنا متاخر لكن هوه مش كله ميزه. هوه صحيح بيخليك قادر علي التحكم في السياره عند الفرمله من سرعه عاليه ويديك قدره علي المناوره اثناء الفرمله علي الهاي واي و العرببه ما تلفش
لكن داخل المدينه في طرق زحمه و ميكروباسات ممكن يدفعك تمن غالي لان مسافه التوقف بتزيد. ما ننساش ده عند تفعيل مثبت السرعه بعد ايقافه المؤقت.
ألف شكر دكتور محسن على هذه المشاركة و المعلومات القيمة جداً و لى بعد أذنك تعليقيين صغيريين:
1- "الحاجه التانيه في مثبت السرعه لو انت مخزن سرعه و وقفت مثبت السرعه موقتا فنزلت السرعه. لو دوست تاني اشغله والفرق كبير بين السرعتين العربيه هتعمل كيك داون و هتتسارع بمعدل عالي للحاق بالسرعه المتخزنه.
لو ده في طريق مفتوح مافيش مشكله. لكن لو اخدت القرار ده و لقيت قدامك مطب او حد معدي و حبيت تفرمل في نفس وقت التسارع الفرامل ممكن ما تسعفكش لان قوه العزم بتكون في اقصاها.
علشان كده بافضل ارجع للسرعه المطلوبه بزرار + تدريجيا كل دوسه ب 2كم زياده. "
مع حضرتك جداً فى هذه النقطة، و فيه طريقة أخرى لتفاديها و هى إستخدام دواسة البنزين حتى الوصول للسرعة المخزنة على النظام ثم الضغط على زر ال " R " و بهذا نتفادى ال Kick down العالى ده.
2- " النقطه الاخيره ال abs صحيح هوه تقدم في تكنولوجيا السيارات وصل لنا متاخر لكن هوه مش كله ميزه. هوه صحيح بيخليك قادر علي التحكم في السياره عند الفرمله من سرعه عاليه ويديك قدره علي المناوره اثناء الفرمله علي الهاي واي و العرببه ما تلفش
لكن داخل المدينه في طرق زحمه و ميكروباسات ممكن يدفعك تمن غالي لان مسافه التوقف بتزيد."
أعتقد حضرتك تقصد نظام ال "ESP " ELECTRONIC STABILITY PROGRAM مش نظام ِABS " ANTI-LOCK BREAKING SYSTEM "....نظام ال ESP هو اللى بيساعد على التحكم فى المناورة فى الملفات القاسية أو عند خروج العربية عن مسارها عن طريق التحكم فى فرملة كل عجلة على حده لترجيع العربية إلى مسارها و هو غير متوفر حالياً فى الفلوانس للموديلات اللى بتنزل مصر.
أما بالنسبة لنظام ال ABS و وظيفته الأساسية المساعدة فى حالة الفرملة الحادة عن طريق تطبيق عشرات الضغطات المتتالية على بدال الفرامل فى أقل من الثانية بهدف منع السيارة من الإنزلاق مع الفرملة الحادة و بالتالى " تقصير مسافة الفرملة و التوقف بفرق ملحوظ ".
تحياتى
أنا متردد جدا اشنري العربية وعامل زي التايه ... عندي تجربة أمبارح مع محاولة التواصل مع خدمة العملا والصيانة للكشف عن سيارة كسر زيرو حابب اشتريها لكن بردو بفاضل مع 2016 E3
ده لينك تجربتي عالفيسبوك (مشكلة الكول سنتر)
السؤال، هل فعلا التعامل في خدمة عملاء وصيانة رينو فعلا سئ؟ ولا متاعب اعتيادية زي اي وكيل؟
و لو بشتري E3 أو E3s جديد مبلغ يفوق 170 الف وقدامي 2014 E3s ب 157 (عاملة 24 الف) فيه مجال للمقارنة والتفكير في كسب كسر الزيرو؟
هو محدش بيرد في المنتدى ده ليه؟؟
اهو دبست نفسي وحجزت E3s اوفوايت :B4_007: طالما مفيش مساعده :Copy of rfds:
بس انا عندي سؤال جديد .. هو طبيعي تبقى الفلوينس مابتتوزعش في اغلب دول اوربا ويمكن العالم؟؟ ده مش مبشر اعتقد ولا ايه؟
شكرا يا باشمهندس علي تعقيبك
بالنسبه للنقطه الاولي ده صحيح بس لو الفرق بين السرعتين كبير اعتقد الاوفر هيكون ليه السيطره حتي لو دوست بالراحه علي دواسه البنزين. محتاجه مني تجربه تاني النقطه دي.
النقطه التانيه لا طبعا انا عارف كويس الفرق بين نظم الفرامل و الاتزان. انا اقصد الفرامل زي ماذكرت سابقا طبعا. الانضغاطات السريعه المتكرره تتيح التحكم في السياره اثناء التوقف لكن تطيل مسافه التوقف وده معروف. وده مش خاص بفلوانس ده في جميع السيارات
انظمه الاتزان فعلا مش نازله في فلوانس رغم انها موجوده تحت مسمي تاني في الكتالوج ربما لتكلفتها او لعدم ضرورتها بالنسبه لسعرها في طبيعه بلادنا. النظام اجباري في امريكا الان و ربما اوروبا. و بصراحه السواقه في اوروبا و جبالها و مطرها و تلجها تخلي النظام ده مفيد بالنسبه لتكلفته.
بالمناسبه الذوق الاوروبي لايستسيغ سياره متوسطهاو صغيره بشنطه. الهاتش باك مسيطر هناك والميجان اقرب للذوق الاوروبي بينما الفلوانس موجهه لينا و جنوب شرق اسيا و الخليج ويمكن امريكا اللاتينيه. علشان كده بتتصنع في تركيا و كوريا مش في فرنسا. ده غير و ده يخليها لا تستفيد من معامله منتج اوروبي في الرسوم عند دخولها اوروبا
وشكرا
حسام الدين
طبعا ال abs تقصر مسافه التوقف لو الاحتكاك بين الاطارات و الطريق غير جيد سواء لمشكله في الاطارات او في الطريق او لذوبان الاطارات من الاحتكاك الشديد - لكن هذا لا ينطبق على القياده داخل المدن المزدحمه على سرعات متوسطه
عموما التجربه العمليه اوضح و اصدق ال abs انقذنى على هاى واى بسرعه 170 و تسبب لى في حادثتين صغيرين لكن كلفونى دهان اكصدام داخل مدن في سيارات مختلفه ما كانوش يحصلوا مع الشاهين القديمه
رسميا في رابطة حائزي فلوينس :B4_007: وانتوا السبب :angelnot:
استلمنا والحمد لله ..
مبدئيا، لو حد من حضراتكم مر ويحب ويقولي بعض النصائح غير المعتادة و (البسيطة) اللي ممكن تفيد ومطلوبة عند استلام السياره ومع اول صيانة او اشياء يجب التدقيق فيها لحين وقت الصيانة او اضافات ممكن تكون متاحة للفليونس خصوصا ال E3s اكون شاكر ...
ثانيا، هل رفع الزجاج اوتوماتيكيا بمجرد غلق السيارة والابتعاد عنها غير موجود مثله مثل ضم المرايات؟؟
السيارة ابيض سن الفيل، هل لصق طبقة شفافة مط على الاكصدامات لا يغير من لونها ويحميها ولا ملوش لازمة؟ هل هي نوعيات؟
شكرا للجميع
السلام عليكم ورحمة الله
سؤال لو تكرمكم يا أفاضل:
هل يوجد مؤشر ضغط الهواء في الإطارات (tyre pressure sensor )في الفلوانس E3 ؟ أنا مش لاقيه في المواصفات بس حاسس إنه أكيد موجود في عربية فيها كل المزايا دي
ألف شكر مقدما :)
شباب
أنا شاري e3 2015 هاي لاين شهر 12 اللي الفات. يعني بقالي 7 شهور بس.
في الفترة دي العربية تعرضت لكم لا بأس به من الخدوش - كلهم وهي واقفة مركونة
المهم. أنا مضايق من شكل الخدوش دي وسمعت إن في قلم كدا بيمشي على الدهان ياخد من اللون ويحط على الخدش عشان ميبقاش باين. وفي حد قاللي على نوع دهان (زي الكريم كدا) بيتباع في محطات البنزين وقاللي أنه بيتحط على المنطقة المصابة وبيعالجها.
الكلام دا صحيح؟ وهل بيأثر على لون الأماكن السليمة اللي جنب الخدوش؟ لو نجح، بيبقى باين اختلاف اللون؟
أفيدوني لو سمحتم
الحمد لله تسلمت فلوانس 2016 - e3 نبيتي من معرض الليثي بمدينة نصر و الحقيقة المعرض ممتاز و منتظر الأوراق للترخيص
عندي حاجة غريبة مش فاهمها في لوك الأبواب لأن البصمة مش شغال بانتظام يعني مرة يشتغل و كذا مرة ما يشتغلش ... أرجو الإفادة و شكرا .
ألف مبروك العربية و إن شاء الله هتنبسط منها جداً
راجع الموضوع ده هتلاقى فيه إجابة لموضوع البصمة:
http://www.nilemotors.net/Nile/471116-a.html
تحياتى
سؤال للاخوه في الرابطه --هل يمكن اضافه esp او esc للفلوانس في التوكيل بمصر وهل تمت اضافته للموديلات الحديثه-علما بانه موجود في السياره خارج مصر من فتره و مشروح في كتيب السياره من عده سنوات
السلام عليكم،
اشكر هذا الجروب الجميل على كل المعلومات القيمة التي استفادتها منه، هذه أو مشاركة لي في هذا الجروب، لقد قررت بأذن الله تعالى أن اشتري فلوانس e3، ولكني لاحظت أن هناك بعض الاعضاء يتكلمون عن بعض الـ options التي تم الغاءها من العربية، برجاء الافادة عن الفروق فيما بين موديل الموديل المعروض للبيع حاليا في المعارض والموديلات السابقة بالنسبة لـ e3.
كذلك ارجو الافادة عن أفضل معرض يمكن الشراء منه وافضل خصم ممكن احصل عليه، وما هي الاشياء التي يجب علي البحث عنها عند استلام الفلوانس.
وألف شكر على المساعدة
للأسف لم يتم إضافة خاصية ال ESP فى الموديلات الحديثة (2016) للسيارة حتى الأن
النظام يتكون من أربع حساسات على الأربع عجلات ثم توصيله بنظام ال ABS المتوافر فى السيارة ثم تركيب Control unit أو Logic unit علشان تقرا من الأربع حساسات و توصل الأوامر لنظام ال ABS و هذه ال control unit هتتوصل بال Master control unit بتاعة السيارة و طبعاً دفيرة الكهربا الخاصة بها.....
النظام سعره فى حدود 2500 دولار أمريكانى، مع مكسب التوكيل و مصنعية التركيب ده فى حالة القدرة على تركيبه و ضبطه من قبل فني التوكيل هيكون مبالغ فيه جداً
تحياتى
ألغيت الستاير الجانبية في كل الفئات و ما يسمى حساس الاوكرة (فوتو سيل Photo Cell ) التي كانت ببعض الفئات قبل سنتين ... تم اضافة نيكل خلفي للاسم بعرض الشنطة و زاد عرض الكاوتش في الفئة اقل من S3 إلى 16 بوصة و اضيفت اضائة ليد للاشارات و ليد امامي وخلفي لبعض الفئات "كما اعتقد" ... والله اعلم ...
انا اشتريت 2016 E3SR ولم انتبه للستاير الجانبية وتغاضيت عن المبالغة في بعض التفاصيل في مقابل كماليات كثيرة للغاية في سيارة محترمة فعلا .. اتكل على الله مع العلم ان التوكيل ومركز خدمته لا يهتمون بشكل كافي بك وبسيارتك ;)
[QUOTE=nolimits;3875991234]ألغيت الستاير الجانبية في كل الفئات و ما يسمى حساس الاوكرة (فوتو سيل Photo Cell ) التي كانت ببعض الفئات قبل سنتين ... تم اضافة نيكل خلفي للاسم بعرض الشنطة و زاد عرض الكاوتش في الفئة اقل من S3 إلى 16 بوصة و اضيفت اضائة ليد للاشارات و ليد امامي وخلفي لبعض الفئات "كما اعتقد" ... والله اعلم ...
انا اشتريت 2016 E3SR ولم انتبه للستاير الجانبية وتغاضيت عن المبالغة في بعض التفاصيل في مقابل كماليات كثيرة للغاية في سيارة محترمة فعلا .. اتكل على الله مع العلم ان التوكيل ومركز خدمته لا يهتمون بشكل كافي بك وبسيارتك ;)[/QUOTE
يا باشا ألف ألف شكر على الرد والاهتمام، وان شاء الله هاخد بنصيحتك
ممكن حد ينزل صور للتابلوه بتاع اول فئة اوتو وهل التكييف بكر عادي ولا زي الفئات الاعلي والكاسيت هو هو ولا ايه وشكرا مقدما
لو عايز اشتري الفئة الاول من بنك ابوظبي ايه الاجرائات اللي المفروض تتعمل وعايز القسط يكون 2750 في الشهر يبقي المقدم كام ؟
م. هاني او أحد الأعضاء القدامى،
فين اقدر الاقي كتالوج المستخدم لفلوينس فيس ليفت وخصوصا 2016 .. حاولت مواقع كتيرة و اكتر من بلد أولربي وعربي لم أجده .. عربي أو انجليزي ان كان احدهما متوفر
شكرا جزيلا