محتاج تشجيع يا بروتوناويه

**returner** · 06-05-2010 01:22 AM

السلام عليكم ورحمة الله

معايا تقريبا 80000 ونفسي أجيب البرسونا
بس كل اللي حواليا بيقولولي إن الياريس استعمال فيف أو الصني كسر زيرو أحسن
أنا ساكن في فيصل ومتجوز ومخلف يعني عائلة صغيرة يعني عايز عربية عائلية وعاليه عن الأرض بشكل كبير ومش متعبه في صيانتها
أرجو الأفادة وشكرا

**returner** · 06-05-2010 01:57 AM

نسيت أقول إن شغلي في مدينة نصر يعني 80 كم بالميت كل يوم يعني استهلاك البنزين لازم يبقى قليل

**jisso82** · 06-05-2010 09:07 AM

شوف يا باشا أنا معايا البرسونا هى عربية تحفة ماشاء الله و هتعجبك جدا و هى طبعا أحسن من الياريس بكتير لأن الياريس مش فى ثباتها تماما و كمالياتها و عوامل الأمان لا تقارن بين الاتنين لصالح البرسونا طبعا و نفس الكلام ينطبق عن النيسان و لو إنى ما سمعتش حد اشتكى من ثبات النيسان أوى يعنى بس طبعا برده فرق الكماليات و عوامل الأمان لو إن بعض منها موجود فى النيسان إنما توتال الفرق لصالح البرسونا أما عن موضوع استهلاك البنزين فمش هضحك عليك البرسونا استهلاكها مش قليل بس ما تختلفش كتير عن النيسان لكن فى فرق كبير بينهم و بين الياريس أولا لأنها 1300 cc مش 1600 ثانيا هى التكنولوجى بتاعة تويوتا فى استهلاك البنزين قليل عموما عن عربيات كتير موفرة فعلا و ده بأمانة الفرق الوحيد اللى لصالح الياريس. بس نصيحتى الشخصية البرسونا و مش هتندم إن شاء الله و استخير و ربنا يوفقك

**dreslam** · 06-05-2010 09:15 AM

اعتقد ان الرأي في الاول وفي الاخر ليك لكن انا بعرض وجهه نظر بس.وجهه نظري ان الجين 2 احسن من الياريس الزيرو كمان ومن الصني الزيرو مش استعمال.وانا سقت الثلاثه.كان عندي صني 2005 ياباني اوتوماتيك.مريحه وموتور وتكييف بس كل المشكله شكلها القديم نوعا ما وضعف الاكصدامات والصاج.بعتها وجبت جين 2 استعمال وظبطتها والحمد لله اكثر عربيه عمرت معايا ومريحاني بقالها سنتين ومش ناوي ابيعها لمده زيهم ان شاء الله.والياريس جبتها فول اوبشن اوتوماتيك للمدام بقالها ست شهور وبتفكر تغيرها رغم انها مكملتش 4000 كيلو عشان ساقت الجين 2 وعجبها الرسيان وقوه الاداء مع جمال الشكل طبعا والكماليات العاليه جدا.عشان كده انا رديت الرد ده.لو دخلنا في موضوع مقارنه الياريس تكسب عشان سياره مدينه ونعوميه بس.انما جوده وخامات وكده مع احترامي انا شايف ان الجين 2 احسنهم.مع احترامي لرأي الكل انا بنقل تجربه فقط.انا عارف ان ده كلام "كان" بيزعل كتير لكن معظم الناس دلوقتي رايها اتغير تماما في الجين 2 وبدل ما كان بيتقال عليها "ايه دي.وياراجل حد يركب ماليزي.ودي زي الصيني....الكل دلوقتي بيقول اه دي عربيه حلوه..او اه سمعت انها جامده"

**romioramy** · 06-05-2010 01:45 PM

المشاركة الأصلية كتبت بواسطة returner

السلام عليكم ورحمة الله

معايا تقريبا 80000 ونفسي أجيب البرسونا
بس كل اللي حواليا بيقولولي إن الياريس استعمال فيف أو الصني كسر زيرو أحسن
أنا ساكن في فيصل ومتجوز ومخلف يعني عائلة صغيرة يعني عايز عربية عائلية وعاليه عن الأرض بشكل كبير ومش متعبه في صيانتها
أرجو الأفادة وشكرا

باشا , عليك باليـــــــــــــــــــار يـــــــــــــــــس ... طبعا

استهلاك بنزين مافيش - قوة تكييف زي الفل - و العربية لا يعيبها شيئ و لو كانت اصغر سنة من البيرسونا .
و علي فكرة انا معايا جن 2 ، بس بقولك الصراحة ياريس جامدة جدا و 1300 مش عيب و مش مقصر عليها خالص .. لكن البرسونا حلوة بس لو شغلك قريب انها استهلاكها في الصفيحة 200-220 كم بس لكن الياريس علي الاقل 300 كم و بعدين حنينة في الترخيص و الضريبة .

YARIS YARIS YARIS YARIS go >> GO >> GO >>> GO

**m.3abdel3al** · 06-05-2010 02:38 PM

المشاركة الأصلية كتبت بواسطة romioramy

باشا , عليك باليـــــــــــــــــــار يـــــــــــــــــس ... طبعا

استهلاك بنزين مافيش - قوة تكييف زي الفل - و العربية لا يعيبها شيئ و لو كانت اصغر سنة من البيرسونا .
و علي فكرة انا معايا جن 2 ، بس بقولك الصراحة ياريس جامدة جدا و 1300 مش عيب و مش مقصر عليها خالص .. لكن البرسونا حلوة بس لو شغلك قريب انها استهلاكها في الصفيحة 200-220 كم بس لكن الياريس علي الاقل 300 كم و بعدين حنينة في الترخيص و الضريبة .

yaris yaris yaris yaris go >> go >> go >>> go

الياريس اوحش عربية من تويوتا من وجه نظري

**jisso82** · 06-05-2010 03:55 PM

المشاركة الأصلية كتبت بواسطة m.3abdel3al

الياريس اوحش عربية من تويوتا من وجه نظري

مش من وجهة نظرك لوحدك يا ميدو و الله أنا سمعت مهندس ميكانيكا مرة فى شركة صيانة لكرايسلر كان بيرد و هو بيتسأل عنها قال بالحرف: إن تويوتا هزأت نفسها و بوظت سمعتها كشركة لما قررت تعمل عربية زى الياريس لمجرد إنها تنافس فى الفئة السعرية دى

**aselim** · 07-05-2010 10:00 PM

السلام عليكم يا باشا
انا شاري برسونا من شهر يناير والبركة في شباب المنتدى اللي كان ليهم دور كبير في رأيي ده بنصايحهم.. وهاقولك بصراحة

انا جارك بس في الهرم.. وشغلي في أكتوبر والعربية بصراحة شغاله معايا تمام اوي الحمد لله مفيش فيها مشاكل (غير مشاكل العربية اللي كل الشباب هنا قالوها وهي تزييق العفشة وده ربطته في التوكيل- وتزييق الدريكسون وبرده اتظبط في اول صيانة الحمد لله).

وفي ميزة جميلة جدا في العربية وهي انها عالية يعني امشي على المطبات وانت مطمن مفيش نظام التعابين زي بقية العربيات التانية.. واحد صاحبي معاه النترا وركب عربيتي وعند مطب لقيته بياخده بالجنب قلت ليه العربية عالية قال لي انا متعود كده بسبب الالنترا اللي طلعت عيني.

معلش طولت عليك بس انا بصراحة استخدمت اليارس وكمان 1600 مش 1300 لمدة اكتر من 6 شهور وشايف ان البرسونا افضل منها بكتير جداااااااا هي أينعم تويوتا بس معلش البرسونا اعلى منها بكتير.
وبصراحة وسعها كويس وخصوصا ان برده معايا اسرة صغيرة بنت وولد.. وبتشيل معايا...

رأيي تصلي استخارة وتتوكل على الله ان شاء الله :)

أحمد سليم