الحمد لله .... زيارة للتوكيل فى العامرية موفقة جدااااا
الحمد لله النهاردة الساعة 10 كنت فى التوكيل سجلت كل الملحوظات بتاعتى وكان اهمها طبعا الفتيس وبعدين قابلت مهندس حسام حمدى وبصراحة انسان محترم جدا سواء فى تعامله او فى الشغل فعلا انا مروحتش النهاردة الا لما جرب معايا مرة واتنين وممشيتش الا لما اتأكد ان الحمد لله كل مشاكلى اتحلت وانى راضية عن العربية بجد
طبعا بشكل اساسى الفتيس بقى تمام جدا بجد فى كل النقلات بقى ناعم فى النقلات والمارشدير بقى مفيش فيه اى مشكلة الحمد لله .. وكمان كان عندى شوية ملاحظات كلها اتعملت برضه ومشيت من هناك الساعة 2.5 تقريبا وبجد وانا مروحة حسيت بالفرق فى الفتيس ونعومة العربية عموما والعفشة
كمان بقى انا اتكلمت مع مهندس حسام شوية فى كام نقطة كده
اولا الزنة اللى فى دواسة البنزين مع ارتفاع الاربى ام هو قالى ان ناس قليلة اللى اشتكوا منها فهم محسوش انها مشكلة قوى زى مثلا موضوع الفتيس كتير اتكلموا فيه بس عموما هو وعدنى انه ان شاء الله حيحاول يشوف القصة دى وربنا يسهل ... بس اللى لازم تعرفوه عموما انهم بالمنطق كده مبيدوروش على حل لمشكلة الا لما تبقى مشكلة اصلا بمعنى ان لو محدش اشتكى هم اكيد مش حيبقى عندهم معلومة ان فى حاجة مضايقة العملاء ..... بس طبعا مفهوم ان ممكن تكون فى حاجة مضايقة الواحد ويبقى فى امكانية لحلها وحاجة تانية ملهاش حل بس لو فى حاجة مضايقانا نعرضها وربنا يسهل بقى اذا كانت تتحل او لأ زى موضوع الفتيس كده
تانى حاجة انا لما حاولت ادى مهندس حسام فكرة عن راى الناس فى التوكيل قولتله ان فى ناس معجبة بالتوكيل وناس متضايقة كل واحد بحسب التجربة اللى مر بيها فهو تفهم ده تماما وحكتله على بعض الامثلة والمفاجأة بقى بدون الدخول فى التفاصيل قوى ان غالبا ياجماعة لما حد مننا بيكون فى مشكلة عنده متحلتش غالبا بتكون سوء ادارة من الاستقبال مش من الورشة يعنى اوقات الناس فى الاستقبال بيفتوا ويقولوا ده طبيعى وده مش عارفة ايه ولا ده حعملهولك وده لأ من دماغهم مش على اساس كلام المهندسين المختصين طبعا ده مش فى كل الاحوال لكن فى معظمها ... يعنى ابسط مثال لما بقوله موضوع التلات ثوانى قبل ما تجيب المارشدير وكده قالى لا طبعا ما دا كلام غريب ومش منطقى ومينفش يتقال اصلا قولتله ما للاسف الكلام ده بيتقال
اللى عاوزة اقوله فى الاخر ان القصة زى اى حاجة فى الدنيا بتعتمد شوية على الشخصيات اللى بيصدف انك بتتعامل معاها
طيب الحل ... الحل ان لو عندك مشكلة امشى فيها زى اى حاجة تانية بالترتيب الطبيعى حتكلم المسئول اتحلت ماشى متحلتش بتروح للى فوقيه وهكذا ... واهم حاجة عندهم توصيل ال
feedback لان ده هو اللى بيعرفهم ايه الوضع وايه المشاكل اللى موجودة علشان يحلوها
فى الاخر اللى عاوزه ااكد عليه بجد كل كلام مهندس حسام انه التوكيل وهم كمهندسين عاوزين يرضوا العملاء ويحلوا كل المشاكل وهكذا وبجد اللى شوفته قدامى انه مبيتأخرش على حد فى حاجة يقدر يعملها وحتحل للعميل مشكلته .. كل الحكاية ان ممكن يكون فى ناس بطريقة معاملة غلط او بسوء تفكير ممكن بتدى انطباع غلط عن مكان كويس
.....................................
اخر خبرين بقى ومعلش طولت عليكم
المرايات ان شاء الله ممكن ممكن احتمال ترخص شوية الفترة الجاية وربنا يسهل ... انا اتكلمت على قصة المراية دى بالذات
كمان انا كنت فاكرة ان اللوجان التوكيل مبريكبش لها وحدات رفع مهندس حسام قالى لا عادى وناس كتير ركبتها فعلا عادى ... وقالى ان فى نوع فى السوق بتشترى وحدتين الوحدة ب 45 جنية تقريبا وتركبيها فى التوكيل احسن علشان كهربة اللوجان متعبة شوية التركيب بالضريبة بكله حوالى 200 يبقى القصة كلها تقريبا ب 300 جنية ومبروك علينا وحدات الرفع
مهندس حسام وعدنى انه حيحاول يدخل على نايل موتورز ربنا يسهل ان شاء الله ويقدر فى ظل ظروف شغله ان شاء الله
كده ياجماعة رأى الشخصى المتواضع ... انا مش شايفة ان اللوجان فيها اى مشكلة خلاص يعنى نقدر نقول عليها كاملة والكمال لله وحده طبعا اللهم زنة دواسة البنزين بس ودى فى ناس اصلا مش حاسة بيها وناس انا منهم متأقلمة معاها ومش الحاجة اللى حتضايقنى من لوجى
شكرا رينو فرنسا على سرعة الاستجابة
شكرا مهندس عمرو ابو الفتوح
شكرا مهندس حسام حمدى جدااااااااااااااااا
وطبعا شكرا نايل موتورز :E_braces[1]:
شكراااااااااااااااااااااا ... واسفة على الاطالة
