اشترى كيا بيكانتو ؟

**MARTINY** · 07-05-2010 04:11 AM

السلام عليكم ورحمه الله وبركاته

اخوانى واخواتى الاعزاء
انا عضو جديد فى المنتدى لكن من زمان متابع بعض المواضيع
وبجد اعضاء فى منتهى الجمال والذوق
استفسارى بخصوص الكيا البيكانتو 2010
الموضوع ببساطه انا مكنتش بعرف اسوق خالص وجيبت 127 اتعلمت عليها وتمام التمام
بعد كدة فكرت اجيب زيرو بالتقسيط
بصراحه من وقتها وانا فى حيرة ووجع قلب
فى الاول عجبتنى الكيا البيكانتو وقلت اتوكل على الله
بس فى ناس كتير قلتلى مش كويسه وكمان عايزة استعمال حريمى وناس قالتلى الخليجى احسن من الوكيل بس المكشله فى الضمان
المهم قلت اشوف الهيونداى الاى 10
روحت لابو غالى واتكلمنا فى التفاصيل لكن لقيتها صغيرة جدا وشنطه شبه مش موجودة
المهم اخر حاجة وصلتلها مع معرض تالت واللى هتناسب مرتبى والقسط هى حاجة من الثلاته _ اما فيرنا او شيفورليه افيو او رينو لوجن
بالله عليكم افيدونى اعمل ايه بالظبط
واجيب ايه فيهم
انا مليش فى العربيات ولا الفنيات ومش عايز اجيب حاجة تتعبنى بعد كدة خصوصا انى هشترى بالتقسيط
وما ادراكم ما التقسيط لكن الظروف تحكم

**htaha** · 07-05-2010 10:03 AM

اشترى بيكا واتوكل على الله

**MARTINY** · 07-05-2010 10:20 AM

بيكا اللى هى ايه ؟

**MARTINY** · 07-05-2010 12:00 PM

يا جماعه ياريت حد يفيدنى
انتم ناس اصحاب خبرة وانا محتاج رايكم فى الموضوع دة
لانه موضوع مهم ومصيرى
افيدونى افادكم الله

**Samir_Adel** · 07-05-2010 12:19 PM

اولا اهلا وسهلا بيك معانا,
مبدئيا, ابعد عن اي عربية تقفيل مصري زي الأفيو و الفيرنا. (مع احترامي الكامل ليهم و لراكبها) بالنسبة لموضوع الخليجي عشان الضمان و كدة, حضرتك لو بتعامل العربية معاملة راقية و بتصونها و بتعمل صيانتها في مواعيدها و بتابع تغيير الزيوت بالفلاتر الأصلية يبقي مش هتشوف اي مشكلة! نص الأعضاء هنا راكبين خليجي و العجلة ماشية نحمد ربنا يعني! و بالنسبة لموضوع انها مش بتستحمل دة كلام عار من الصحة دي كيا مش ماركة جديدة مجهولة متقفلة تحت سلم و بخامات رديئة! اتوكل علي الله و هاتها خليجي.
علي الأقل البويا اتقل و العفشة اقوي و كماليات اكتر.
ملحوظة: ياريت بعد اذنك تغير اللون الأحمر عشان دة مخصص للمداخلات الأدارية فقط.

**A.Saad** · 07-05-2010 11:09 PM

قارن اللوجان او البيكانتو وبس

**n_i_t_e** · 08-05-2010 09:02 AM

شوف يا سيدي هو الi10 و البيكانتو كويسين بس أنا لاحظت انك بتتكلم عن شنطة الi10...شوف لو عايز حاجة هاتشباك و أوسع و الشنطة أكبر سنة من الi10 بص على الهيونداي جيتز
لو عايز حاجة عائلية عربية سيدان من الخيارات اللى قولتها أرشحلك اللوجان عربية معمولة أساسا عشان تكون عربية عائلية شعبية لطرق صعبة زي طرق مصر و أنا شايفها الأنسب فى سعرها و هى انتشارها رهييب بصراحة و حسب ما سمعت قطع غيارها نزلت كتيييير.
فى ملحوظة على فكرة: الi10 و البيكانتو مواتيرهم صغيرة يعنى عربيات مدن شويه و لو بتسافر كتير دي هتكون نقطة مش فى صالحهم لكن الفيرنا و اللوجان مواتيرهم كبيرة 1600CC