في مصـــــــــــــــــــــــ ــــر فقط ...

أبو عبد الله*** · 22-05-2007 10:01 AM

حاجات كتير بتتميز بيها بلدنا .. منها اللي يزعل ومنها اللي يقهر .. ومنها اللي يشرح القلب .. وتشتاقله لو روحت فين .. زي طبق الفوووول المعمر اللي لازم أي بلد يحل فيها المصريين .. يحل معهم هذا الحارس الخاص وهذا المضاد الحيوي .. وتفتح المحلات والمطاعم لتلبية طلب المصريين في لندن والسعودية وأمريكا وبلاد الفرنجة فرنسا حاليا .. وإليكم بعض هذه المشاهد الحصرية.

* لم يذكر السجن في القران الكريم إلا في مصر (في سورة يوسف )

*في مصر فقط .. الأموات ينفقون علي الأحياء "الفراعنة والأهرامات والذي منه"

*في مصر فقط .. تجد شخصا أقل منك في المستوي العلمي وحصل علي 50% فقط في الثانوية العامة .. ولكنه يتنطط عليك أو بالبلدي يركب ويدلل رجليه لأنه ببساطة دخل بيهم شرطة .. اللي في خدمة قفا الشعب.

*في مصر فقط .. ينمو نبات البردي وورد النيل والجرجير والخبيزة والليف - حتة ثقافة -

*في مصر فقط .. توجد السلعوة وهي "مسخ" ناتج عن تزاوج الكلاب الضالة في جو العاصمة الملوث - حتة جيولوجيا -

*في مصر فقط .. تأكل الحواوشي والشكشوكة والكشك الأسيوطي والملوخية بالأرانب والمسقعة والكشري ومحشي الكرنب وطاجن العكاوي والكبدة الاسكندراني .. آه نسيت .. والفووووووووووووووووول اللي مش سوداني.

*في مصر فقط .. تعبر الكلاب الشوارع بطريقة أشبه بالتي يعبر بها الآدميون .. تقف الكلاب علي جانب الطريق تنظر يمينا ويسارا حتى تعبر في أمان .. وليت البشر عندنا يعبرون بالطريقة نفسها ينجون مثل الكلاب .. ولكن المواطن المصري والمصري فقط يجب أن يعبر الشارع كطائر البطريق أو البط البلدي.

*في مصر فقط .. يمتلك المواطن بالوقت والممارسة مهارات خاصة في ركوب الأتوبيسات المسرعة والتسلل إلي العمق أو الوقوف بأطراف أصابع القدم علي أخر درجة في السلم "اطلع من علي الباب يا فندي العربية فاضية أدام" .. طبعا ربنا ما يوريك بقى لو كانت مليانه.

* في مصر فقط .. تنشب الصداقة سريعا وفي اقل من ثوان في إشارة المرور أو في مصلحة حكومية أو في الأسانسير أو حتى في طابور العيش.

* في مصر فقط .. تجد منطقة سكنية بكاملها (سارقة كهربا ) مثل عزبة الهجانة - حتة تعداد سكاني -

* في مصر فقط .. ملك فرعوني بني لنفسه تمثالا ضخما لا تشرق الشمس علي وجهه إلا مرتين في السنة مرة يوم عيد تتويجه ملكا ومرة يوم عيد ميلاده هو شخصيا .. "صبح .. صبح .. يا عم الحاج"

* في مصر فقط .. وزير ( يسرطن ) الشعب ثم يرشحه الحزب الحاكم في انتخابات مجلس الشعب .. بس مش أي شعب .. ده شعب على أبوه.

* في مصر فقط .. ينادي وزير التعليم بإلغاء مجانية التعليم.

* في مصر فقط .. يتم إنفاق ملايين الجنيهات من أجل الحصول علي "صفر كبير" أمام العالم .. كانوا خايفين ياخدوا درجة بالسالب .. بجد الصفر أرحم.

* في مصر فقط .. يقدم الكشري ساخنا في أكياس بلاستيكية شفافة.

* في مصر فقط .. ادفع وبعدين اشتكي - لتحصيل أولا -

* في مصر فقط .. الاختيارات السياسية المتاحة أمام المواطن هي التصويت بـ "نعم " او "لا"

* في مصر فقط .. تم القضاء نهائيا علي ظاهرة "إدمان الهيروين" بعد أن أصبح "البانجو" في متناول الجميع .. ولم يعد لكوكو الضعيف (السجائر الغير محشية) الشعبية السابقة بين الناس.

* في مصر فقط .. رئيس حزب لازال مرتديا الطربوش حتى الآن.

*في مصر فقط .. لا يتم وضع الملصقات إلا تحت لافتة "ممنوع لصق الإعلانات"

* في مصر فقط .. لا يمتلك المواطنون زيا رسميا موحدا ويصعب أن تعرف المصري من مجرد ملابسه ( إلا لو كان لابس تي شيرت مكتوب عليه بالأخضر "فكر جديد")

*في مصر فقط .. يوجد نوع من المسكنات علي هيئة مصطلحات يتم تقديمها للشعب بجرعات مكثفة مثل ( الشفافية) ,( التمثيل المشرف) , ( إشادة البنك الدولي بمصر),( أهمية الدور الذي يلعبه شباب النيل .. جيل المستقبل).

أخيرا فإن ما يوجد في مصر فقط وحصريا على أرض الواقع أكثر بكثير مما نستطيع حصره في مجرد سطور .. ولكننا نقولها وبكل شاعرية ودراماتيكية وحنية:"عظيمة يا مصر يا أرض النعم"

والآن نترككم مع الفنان الشعبي شعبان عبد الرحيم – اللي مفيش منه برضه غير في مصر – مع نشيد بلادي بلادي .. لك حبي وفؤادي.

منقول

**وائل عطية** · 22-05-2007 10:06 AM

في مصر فقط .. لا يمتلك المواطنون زيا رسميا موحدا ويصعب أن تعرف المصري من مجرد ملابسه ( إلا لو كان لابس تي شيرت مكتوب عليه بالأخضر "فكر جديد")

ربنا يرحمنا بقى من الفكر الجديد ده..
ياراجل داأنا كرهت اللون الأخضر..
ومع كده ياأبو عبدالله شكراً على الكلام الجميل ده وباأهديك أغنية عايزينها تبقى خضرا

**Dr Ahmed** · 22-05-2007 11:16 AM

كلام رائع وشر البلية ما يضحك

أضيف لكلامك: مصر البلد الذى يتلذذ أصحاب السيارات فيه بالركن تحت لافتة: "ممنوع الإنتظار" حتى أصبح شئ أساسى أن أجد سيارة راكنة تحت كل لافتة عليها هذا التحذير.

**أبو عبدالله** · 22-05-2007 01:01 PM

والله في لسه حاجات كتير برضه مش موجوده على الكوره الأرضيه الا في مصر بس
وشكرا على هذه المعلومات

**Nader** · 22-05-2007 01:05 PM

مصر البلد الوحيد اللى تلاقي عواميد الانارة منورة الصبح ومقفولة بالليل!!

22-05-2007 03:28 PM

والانجر والكورة الشراب والسجاير الفرط والبقشيش والفهلوة وتفتيح المخ -والجدعنة والروح الحلوة وكلة كوم ولحظة اذان المغرب وانت فى رمضان والناس واقفين فى الشارع بيوزعوا بلح ناشف على المارة --والله العظيم انى فوجئت بالمنظر دة ومش قادر انساة --بس يمكن انة رمضان الوحيد الى حضرتة فى مصر من 19 عام --الشعب المصرى --اطيب شعوب الارض--اللهم احفظ مصر و أهل مصر،--واحفظ شريف المصرى كمان :lol:

**sab3aawy** · 22-05-2007 03:54 PM

في مصر فقط .. لا يمتلك المواطنون زيا رسميا موحدا ويصعب أن تعرف المصري من مجرد ملابسه

وهل يمتلك الناس زيا موحدا فى قبرص او بلجيكا او استراليا او كندا او تركيا او تونس او غيرها من معظم بلاد الله؟

إذا كنت تقصد الزى الوطنى القديم الذى تنازلت عنه معظم شعوب العالم لصالح شكل موحد من الازياء(القميص والبنطلون وما يتبعهما) فبالطبع مصر تمتلك زيا وطنيا لا ينافسنا فيه احد هو الجلابية المصرية الجميلة ذات فتحة الرقبة الواسعة بدون ياقة ولها فتحة على الصدر بدون ارزار والاكمام الواسعة بدون اسورة والمتسعة من اسفل والتى يحرص على ارتدائها الوجهاء من ابناء الريف المصرى وابناء المنطق الشعبية وارى فيها مظهرا من مظاهر شياكة ابناء البلد وخاصة لو اجتمعت مع كوفيه انيقة

اما لو كنت تقصد بموضوع الزى الموحد ان يكون لنا نوع من الملابس نختلف به عن سائر خلق الله مثل تلك الاشياء التى يلبسها الإخوة الخليجيون او يضعونها على رءوسهم، فانا اتمنى ان يحين اجلى قبل ان اضطر لارتداء مثل هذة الأشياء

**محمد المرسي** · 22-05-2007 04:24 PM

اما لو كنت تقصد بموضوع الزى الموحد ان يكون لنا نوع من الملابس نختلف به عن سائر خلق الله مثل تلك الاشياء التى يلبسها الإخوة الخليجيون او يضعونها على رءوسهم، فانا اتمنى ان يحين اجلى قبل ان اضطر لارتداء مثل هذة الأشياء

في مصر فقط .. رئيس حزب لازال مرتديا الطربوش حتى الآن

في مصر فقط .. تأكل الحواوشي والشكشوكة والكشك الأسيوطي والملوخية بالأرانب والمسقعة والكشري ومحشي الكرنب وطاجن العكاوي والكبدة الاسكندراني .. آه نسيت .. والفووووووووووووووووول اللي مش سوداني

هذا هو المفيد من الموضوع السلبيات ... والسلبيات دى بتتقال علينا من خارج مصر ...
أ.جنيدى فعلاً اللى يعيش برة ميعرفش حلاوة جوة ... وعلى ذكر رمضان انا ساعات كتير بقطر فى الشغل وبقول نفسى أفطر فى بيتى فى السويس ... ولما أفطر فى السويس بأقول نفسي أنزل القاهرة افطر هناك ...
طبعاً السلبيات التى ذكرت لن تحل بين يوم وليلة .. ولن أقول أنها غير موجودة ..
لكن معلش أعذرونى انا متفائل أكتر من اللازم ولهذا التفائل أسباب ومنها :
أولاً : أن هناك أحساس جديد بقيمة الأنسان المصرى .. بمعنى أننا بقينا بنتكلم عن الحكم ومدته (طبعا التطبيق غلط) وشكل الحكم وبقينا نتكلم فى حاجات مكناش ممكن نتكلم فيها من زمان ..
ثانيا : الوضع الأن أصبح مختلف من حيث النشاط الملحوظ قى القضايا الأثتصادية والأجتماعية ..
ثالثا : كلنا الأن بنتكلم فى السلبيات والفساد وهذا لم يكن موجودا من قبل .. وفيه مننا من يعرض هذه السلبيات أو الفساد على الملاء ..
رابعاً : إذا كنا نتكلم عن اللى مش هتلاقيه إلا فى مصر فهذا ليس معناه أننا سيئين لهذه الدرجة ... واللى عايز يشوف أننا أحسن من غيرنا يبص على غيرنا ... ومش هاقرن بالبلاد الأفريفية لآ هتكون مقارنة مثلاً مع الهند أو باكستان أو أيران ...

هذه بعض مواضيع التفائل بالنسبة لى ..
وآسف على الأطالة ..
وتقبلوا تحياتى ...

**PRO-DRIVE** · 22-05-2007 08:33 PM

:lol:

المشاركة الأصلية كتبت بواسطة sab3aawy

في مصر فقط .. لا يمتلك المواطنون زيا رسميا موحدا ويصعب أن تعرف المصري من مجرد ملابسه

وهل يمتلك الناس زيا موحدا فى قبرص او بلجيكا او استراليا او كندا او تركيا او تونس او غيرها من معظم بلاد الله؟

طيب ما ايرلندا و انجلترا و اسكتلندا و امريكا و اليابان و الصين و الخليج عموما و على فكرة تونس عندها لبس رسمى

إذا كنت تقصد الزى الوطنى القديم الذى تنازلت عنه معظم شعوب العالم لصالح شكل موحد من الازياء(القميص والبنطلون وما يتبعهما) فبالطبع مصر تمتلك زيا وطنيا لا ينافسنا فيه احد هو الجلابية المصرية الجميلة ذات فتحة الرقبة الواسعة بدون ياقة ولها فتحة على الصدر بدون ارزار والاكمام الواسعة بدون اسورة والمتسعة من اسفل والتى يحرص على ارتدائها الوجهاء من ابناء الريف المصرى وابناء المنطق الشعبية وارى فيها مظهرا من مظاهر شياكة ابناء البلد وخاصة لو اجتمعت مع كوفيه انيقة

كام واحد فى مصر ماشى فى الشارع لابس الزى الى انت حكيت علية دة ( مش عاوز اقول القاهريين بيقوالوا عليهم فلاحين او صعايدة و بيعتبروهم فئة اقل من الناس )

اما لو كنت تقصد بموضوع الزى الموحد ان يكون لنا نوع من الملابس نختلف به عن سائر خلق الله مثل تلك الاشياء التى يلبسها الإخوة الخليجيون او يضعونها على رءوسهم، فانا اتمنى ان يحين اجلى قبل ان اضطر لارتداء مثل هذة الأشياء

و اية العيب فى الملابس دى ؟؟ يا راجل فى كل لبس وطنى لكل دوله انا ذكرته فوق ليهم غطاء على رءوسهم برضة