الار بي ام بيعلى ويوطي

**m10_10** · 29-01-2008 02:16 PM

السلام عليكم ورحمه الله وبركاته

الف سلام عليكم يا رجاله

انا يا جماعه في حاجه محيراني فعلا في العربية
اولا العربية (بونتو ٦٠ - موديل ٩٥ )

العربيه وهيا واقفه بالاقي الار بي ام بيعلي لوحدة كاني دايس بنزين وممكن يوصل لحد قبل ال ٣ بشوية والغريب ان الموضوع دة بحالات ، يعني ممكن يعمل كدة ساعات وساعات يبقي عادي جدا

هيا اساسا اول مابدور العربية بالاقية بيعلي لحد ٣ وبعدين ينزل علي طول ساعات ينزل علي ١.٥ وساعات علي ١ هيا ومزاجها... ( للعلم انا بدور العربية من غير مابزود بنزين)

اللي حصل معايا اني وديتها لشركة مصر الهندسية اللي في ابو رواش وكشفولي عالعربية وقالي سينسور الشكمان عايز يتغير. لو ماتعدلتش يبقي الاستب موتور ( طبعا انا لا فاهم يعني ايه سينسور شكمان ولا ستب موتور) قولتلهم بكام الفيلم دة قالولي السينسور حوالي ٦٠٠ - ٧٠٠ جنيه وانا فاكر انها تظبيطة كنترول يونت ومكانش معايا فلوس كفايا..

بلييل قلت لواحد صاحبي عالفيلم دة قالي تعالي نروح لميكانيكي . روحناله فك فلتر الهوا وبص وغير الخرطوم اللي بيغيذي بالبنزين عشان كان مسدود ونضفلي الانجكشن ومن بعدها والعربيه بقت زي الفل بس بعدها بشهر لاقيتها رجعت زي ماكانت...

للعلم انا من بعدها وبقيت بحط المحلول بتاع تنضيف الانجكشن مرة ومرة...

هل الحكايه علو صوت الار بي ام كدة يبقي بسبب الانجكشن وتنضيفه فقط؟؟ ولا كل مانضف هايرجع تاني ولازم اشوف حكايه سنسور الشكمان والاستب موتور دي ( ياريت حد يفهمني وظيفه السنسور دة والاستب موتور دة كمان)

اسف للاطاله بس بجد دي حاجة تحير فعلا

**MMamdouh** · 29-01-2008 02:27 PM

بص بشكل عام فيه حساس و كونترولر بيفرقوا في السلانسية

حساس الTPS او Throttle Position Sensor و دة بيقول للكونترول انت دايس برجلك قد ايه على دواسة البنزين و دة لو باض بتبقى الاعراض اما ثبات الrpm على لفات عالية او ارتفاع و انخفاض الrpm بشكل مستمر

كونترول الايدل IAC او Idle Air Controller و دة موتور صغير بيحرك صباع بيفتح او يقفل مجرى الهوا بتاع السلانسيح عشان يحدد سرعة دوران المحرك على السلانسية

الموتور دة بيتوسخ دايما و بيحتاج تنضيف و من اعراض تلفة او احتياجة للتنضيف هو اختلال فى الrpm عند السلانسية

هل لمبة التشك منورة؟ لو نورت يبقى الارجح ان المشكلة من الTPS لكن لو منورتش يبقى الارجح ان الIAC عايز يتنضف

MMamdouh

**m10_10** · 29-01-2008 02:37 PM

كمان ماقولتليش اعمل ايه برضه ماقولتليش...

واللي هاعمله دة هاعمله فين ؟؟؟

**zeyad1810** · 30-01-2008 11:37 AM

بص يا باشا انا عربيتى زى عربيتك بس موديل 94 وكل اللى انت بتقول علية بيحصل معايا وبردة بحالات وانا لما روحت للميكانيكى قالى ظبط الكميوتر بتاع العربية عند اى حد عندة الكمبيوتر بتاعها بس انا مش فاضى اليومين دول فعلشان كدة منفض فانت مكن تجرب تظبط كمبيوتر العربية وتشوف وهو مش مكلف حوالى 40 جنية انا واحد قالى كدة فانا مش متأكد لو حد تانى يعرف يا ريت يقول السعر كام
وابقى قولى عملت اية
وعلى فكرة الموضوع دة ماظهرش عندى غير فىالشتاء

**shosny** · 31-01-2008 02:39 PM

بوس يا باشا المشكلة ده حصلت معايا بس عربيتى بولو طلع المشكلة فى حساس الحرارة وغيرتو والمشكلة انتهت وده سعره 120 جنيه

**m10_10** · 01-02-2008 11:19 AM

اخر الاخبار...

روحت للميكانيكي ونضفت الانجكشن تاني وقلتله يشوف الحكايه دي.. المهم خدلو غطس جوا كبوت العربيه ولما طلع قالي الاقرب يكون حساس الهوا او حساس تاني كدة مش عارف اسمه بتاع السلانسية...

وخلاني ابطل العربية وادورها تاني وقعد يخبط عالحساس بتاع الهوا لاقيتها صوتها علي فعلاً ...

فانا اللي هاعمله هاشوف حساس السلانسيه والهوا دول فعلا واغيرهم وابقي اقولكو الاخبار بعد كدة...

بالنسبه للكنترول يونيت انا روحت قبل كدة للمهندس كار ومالاقتش عندهم الكمبيوتر اللي يركب عالبونتو وقالولي اروح الشركه الهندسية وانا بصراحه مش عايز اروحلها تاني عشان خنقوني في المرة الاولي - فياريت لو حد يعرف حد عندة الكمبيوتر بتاع العربية غير الشركة الهندسية يقولي ( انا من سكان 6 اكتوبر فياريت اقرب حاجه ليها )

اسف للاطاله والتاخير بس النت بقالو فترة زباااااااااااااااااله

**SEATLOVER** · 01-02-2008 01:08 PM

لو سحبت بالعربية فجأة و وقفت فجأة أو شغلت التكييف ولقيت موضوع ال rpm زاد اوى فى التذبذب لدرجة انة مع التكييف العربية بطلت او اوشكت انها تبطل هايبقى اكيد (وحدة حقن ) ..لآزم تتغير و كل الحاجات اللى عملتها قبل كدة هى عناصر مساعدة فقط و ليست السبب الرئيسى .

**m10_10** · 02-02-2008 10:31 PM

اخر الاخبار...

ماشاء الله العربيه حالتها اتنيلت اكتر وبقي الار بي ام بيوصل لحد 3.5 و 4 كمان

روحت للميكانيكي قلتله ياعم العربيه اتنيلت اكتر قالي بص روح للكهربائي فلان الفلاني عنده كمبيوتر يكشفلك عليها...

روحت لفلان خدلو غطس جواها ولما قب قالي هاتلي خرطوم مش عارف ايه وفك حساس اسمه حساس الصدر ولاقا فيه فردة مش متركبه وبعدها خدت لفه بالعربيه بقت 100 100 قالي جربها يومين وبعدين شوف لو رجعت تاني غيرلها الحساس دة...

بس وانا راجع كان فيه شوية حاجات كدة ربنا يسهل وتبقى تهيؤات...

قولوا يارب........