الموضوع: استفسار بخصوص المشايات الكهربائية

المشاركة الأصلية كتبت بواسطة manalove

معلش انا غلسة شويا ممكن استفسار انا وزنى 82 عاوزة المشاية هل اروح الشركة وهما يقولة لى ولة اعرف كم حصان الاول ويعنى اية 4*1 والكلام دة و الضمان بتاع شركة الجوخ كام سنة على اية السير ولة المشاية بالكامل علشان بجد انا محتارة اوى وفيه شركة بيقولة انهم تايوانى وعندهم ضمان ممكن اعرف ضرورى

ليه الحيره دي كلها

متحتاريش ولا حاجه
بالنسبه للمشايه فدي مشايه
صيني
مش عارف مين وكيلها ولا اعرف قطع غيار بتتجاب منين
والواحد بردو عشان يكون امين

انا معرفش حاجه عن الصيني لاني متعاملتش فيه
بس كم الشكوي اللي بتجيلنا منه في شركتنا عن طريق مثلا
2 اصدقاء
واحد شاري من عندنا والتاني لا
الاولاني بيصلح الحاجه عندنا والتاني دايخ مع الصيانه في شركته
وكل شويه يماطلوا في قطع الغيار
اما دماغه بتوجعه ويزهق
بيجيلنا

طبعا احنا بنرفض لاننا توكيل نوع واحد بس وتيواني وقطع غياره اصلا متركبش عالصيني

بس من كميات المواتير اللي انا شفتها محروقه

كنا احنا جايبين مشايه 4 استخدام
وكلمه 4 استخدام يعني فيها 4 لعبات غير المشايه

وكانت صيني
هيا هيا نفس المواتير
نفس الحجم
بتاعنا يتكتب عليه 1 وربع حصان
وبنبيعه علي انه 90 كم
وهوا ييجي يقولي ده 2 ونص
وملزوق عليه ستيكر بكده
وومكتوب عليه الصناعه كوري

طب انتي قوليلي الناس تعمل ايه
اما الغش التجاري وصل لحد كده

فخلينا في المضمون
اتعبي بقي نفسك شويه
وروحي تكنو لايف
وهاتي ماركه المشايه وكل البيانات عنها
وصوريها بنفسك
وخصوصا الماركه

ونخش عالنت
نقلبه
وندور

انا مش برد عالموضوع هنا عشان اعمل دعايه عشان تشتروا من عندنا
مكنت ريحت نفسي وعملت موضوع اعلاني عن شركتنا وبس
الموضوع مفتوح عشان كلنا نتشاور واقول رأيي كواحد في المجال
عشان محدش يروح يشتري حاجه ملهاش اصل ولا فصل
ويبقي مطمن انها كوري ولا تيواني وتطلع في الاخر واقع في بياع معندوش ضمير يقولك انها صيني

والله حتي عندنا فيه عملاء بتقتنع اننا صادقين
وفيه واحد يقولي ماهي تيوان هيا الصين
ايه اللي يثبتلي انها تيواني

يعني ايه اللي يثبتلك

هوا انتا عشان عامل ناصح فتروح تقع في بياع من بتوع ال3 ورقات
جايبين مشايه
ملزوق عالموتور بتاعها انها تيواني
ومكتوب عالكرتونه تيواني
وممكن كمان يحفروا عالمشايه تيواني

كده انتا حتفرح
انا مشايتنا اسمها american motin fitness
دي ماركه
لما ادخل عالانترنت واكتب الماركه
يظهرلي اي حاجه عن الصناعه بتاعتها
ساعتها حتـأكد انها تيواني

نعمل كده مع اي ماركه نشوفها
ونشوف
انا دخلت دلوقتي لقيت ماركه jada دي
صيني

بصراحه لو انا حشتري مشايه مش حجيب صيني
لانه خلاص سمعته في السوق بقت وحشه

وخللي بالك ان لو فيه مشايه في السوق صيني محترمه
كانت حتعمل سمعه كويسه
وتحسي كده ان توكيلها ظاهر وليه سمعه طيبه
مش سمعته في السوق تبقي عن سؤء الصيانه والمشايه تبقي وحشه وخاماتها وحشه

نيجي بقي لموضوع الضمان
كلمه ضمان عندنا في الشركه مكتوبه علي ورقه الضمان كده
الضمان لمده عام ما عدا سوء الاستخدام

بقولك تعليمات تشغيل
المفروض نمشي عليها

حصل حاجه في المشايه
وطلع عيب صناعه

بنصلح علي حسابنا
وممكن تتغير المشايه كمان كلها

انما لو سوء استخدام
حتتصلح علي حساب العميل
وبنراعي بقي ان العميل واخد الجهاز من قريب
بنعمل خصم في قطعه الغيار
بنركبله ببلاش

كده يعني

يكفي ان عملاء شاريين اجهزه من بتاع 7 سنين
ولسه الحمد لله قطع غيارها موجوده لحد دلوقتي

صعب جدا تلاقي الكلام ده في شركات تانيه بره
وان لقيتي قطعه الغيار حتلاقيها غاليه جدا ومبالغ في سعرها
ويظل بردو الجهاز عندك صيني والقطعه اللي ركبت صيني
وحتاخد وقتها وتبوظ تاني

ارجو اني اكون شلت شويه من القلق اللي عندك والموضوع مش سهل والله
الموضوع محتاج لف وتدوير عشان تبدي تاخدي خبره باللي موجود في السوق

وانا موجود لو فيه اي استفسار

المشاركة الأصلية كتبت بواسطة mr_kenawy

استاذ ميكى , انا نصحت واحد صاحبى يشترى من عندكم و راح بالفعل اول امبارح و اشترى و انتوا هتشحنوهاله على اسيوط , و هو اتصل مخصوص يشكرنى و يمدح فى الشخص اللى باعله و كان بيفهمه , انا حاسس انه حضرتك , هو انت اسمك الحقيقة ايه , الشخص اللى تعامل مع صاحبى اسمه طارق.

لا طارق ده شغال معايا في المعرض انا وهوا بنبيع
انا اسمي صبحي

بس انا قابلته فعلا والمشايه اتشحنت بالفعل