الموضوع: استفسار بخصوص المشايات الكهربائية

بص ياسيدي
قدره الحصان والكلام ده انا مليش فيه ده شغل فيزياء

انما اللي اعرفه في شغلي

1 حصان بيشيل 90 كجم حد اقصي
1ونص يشيل 100 كجم حد اقصي
2 حصان يشيل 120 كجم حد اقصي
2 ونص يشيل 150 حد اقصي
3 حصان يشيل 170 كجم

الكلام ده للاستخدام المنزلي
واعتمادا علي ان الاستيكر فعلا يبقي بجد
وده عمرك ما حتلاقيه
حتي عندنا

لان الشركات بتكتب العزم الاقصي للموتور اللي بيتسمي في شغلنا Peak

يعني مثلا ال2 حصان بيتكتب عليه 2.75
وهكذا

انما مش جهاز صيني يتكتب عليه 5 حصان ويبقي ب4000 جنيه
هوا ده اللي تبدأ تقلق منه

طبعا كمان بتفرق في نوع الموتور بتاع المشايه

ان كان AC او DC

الاجهزه المنزليه اغلبها DC
اختصار DIRECT CURRUNT
تيار مستمر يعني

وال AC اختصار ALTERNATIVE CURRENT
تيار متردد

ايه الفرق بين التيارات والكلام ده بردو معرفش ولا عاوز اعرف
هههههههههه

بس المهم ان الALTERNATIVE CURRENT بيشتغل وقت مستمر اكتر

بمعني ان صالات الجيم بتحتاج الاجهزه ال AC عشان بيشتغلوا ساعات اطول
ممكن توصل ل10 ساعات
بس ده طبعا بيفرق في السعر جدا
يعني اجهزه ال AC
تبتدي من 7000 وانتا طالع

نرجع لل DC اللي هوا بيت القصيد
المنزلي اعلي حاجه فيه 3 حصان
وده بيشيل اوزان تقيله 170 زي ماقلت

بالنسبه بقي لموضوع 2 موتور وواحد موتور ده
عشان الناس بس تبقي فاهمه
2 موتور مش اقوي ولا حاجه

كل الحكايه في زاويه الميل
لو عاوز تصعب علي نفسك الموضوع ويبقي مايل كأنك طالع مطلع

بيبقي فيه موتور متوصل بحاجه زي المساعد كده
ترفع المشايه وتنزلها بالكهرباء
وده ملوش دعوه خالص بكفاءه المشايه اصلا

اما الاجهزه الواحد موتور بيكون فيها مستويات مانيوال يدويه تقدر تعملها بايدك عادي جدا

فانتا براحتك بقي

ملحوظه : بعض الاجهزه الصيني مليانه حركات من دي
والموتور الحصان بتاعه قليل
فمتتغرش بالحاجات دي عن الاساس اللي هوا الموتور الاساسي بتاع المشايه