المشاركة الأصلية كتبت بواسطة funnymickey
مستر بيبو وماجد
ربنا يخليكو عالكلام الحلو ده
بالنسبه للاوربت تراك فمش بيجيب خشونه ولا حاجه
انما لو انتا عندك خشونه متلعبش عليه عشان حيزودها
وخصوصا لو وزنك تقيل اوي
120 مثلا
ده غلط لان ده تحميل علي مفصل الركبه
بالنسبه للصيانه
فالاوربت تراك من الاجهزه السهله في الصيانه
بس لو جايبه كوالتي وحش حتعاني من صيانته
لان الميكانيك بتاعه بيكون علي جلب بلاستيك او حديد من جوه
وده تلاقيه بيعمل صوت كده اثناء اللعب
والحل بتاعه انك تعمله جلب اسمها جرافيت ودي ماده بتزيت نفسها اما تسخن
وده بيمنعها من التاكل
تاني حاجه واهم حاجه
لازم تراجع علي الماسمير بتاعت الاطراف والمفصلات
زي ما موضح في الصوره
وده عشان الاوربت متتحركش حاجه فيه وتلاقي بعد فتره الاوربت اتقطم بسبب ان مسمار فك حبه صغيرين فعمل تبويش
دي اهم الحاجات اللي تقدر تعملها بنفسك
غيركده بتضطر تروح للتوكيل بتاعك او المحل اللي انتا شاري منه الاوربت تراك
بس هوا غالبا اكتر مشكله بتقابل العملاء هيا مشكله تأكل الجلب
وطبعا شريط المقاومه بيتقطع لو زودت المقاومه جامد عشان الاحتكاك
ونصيحه متزودوش المقاومه عشان متتعبش بسرعه وتنزل من عالجهاز
لان الغرض من الجهاز التخسيس مش تقويه العضلات
وبالتالي لما تقعد وقت اطول تحرق سعرات اكتر
بالنسبه بقي لموضوع الاوربت تراك احسن او المشايه او الكلام ده
فالموضوع يتلخص في الاتي
جسم الانسان عشان يبتدي يحرق سعرات حراريه
بناء علي كلام دكاتره كتير
بيتراوح الموضوع من 20 دقيقه ل 30 دقيقه
طيب يعني مينفعش اني اطلع عالجهاز العب 10 دقايق واقول انا كده حخس
هوا انا حخس
بس مش بمعدل كويس ويرضيك
يبقي المهم بقي انك تختار الجهاز اللي يفيدك ويخليك تعمل الساعه او النص ساعه مجهود متواصل عشان اقدر احرق سعرات حراريه بمعدل كويس يخليني انزل في الوزن
ايا كان بقي الجهاز اللي حتختاره سواء اوربت سواء عجله عاديه سواء مشايه
اللي تقدر عليه حتي لو كان حبل وحتنط بيه ساعه يبقي حتخس طالما فيه حركه ومجهود رياضي
بس اهم حاجه يكون يوميا او يوم بعد يوم
مش اجيب الجهاز اسبوع وانام بعد كده
ترتيب بقي الاجهزه وده من وجهه نظري
1- طبعا المشي او الجري في الشارع عالتراك وده احلي واجمل حاجه في الدنيا
وارخص بكتير هههههههههههه
بس طبعا بما ان بلدنا الجميله فاضيه ومفيهاش حد بيعاكس حد ولا بيقل ادبه
فطبعا احنا مفتريين وستاتنا مدلعه ولازم نجيبلهم حاجه في البيت
2- مشايه كهرباء ودي اللي بتدي اثر المشي في الشارع واحسن جهاز يحرق سعرات حراريه
يعيبه سعره العالي طبعا بالمقارنه بباقي الاجهزه
3- الاوربت تراك صراحه انا لو امكانياتي الماديه متسمحش اني اجيب مشايه كهرباء يبقي اول جهاز حفكر فيه هوا الاوربت لانه شامل ورائع من ناحيه حركه الجسم لانه بيشتغل وانا واقف ووانا قاعد يعني الجسم كله شغال فوق وتحت تعبت اقعد عالكرسي
3 - العجله الثابته ودي كويسه جدا بس عاوزه شغل كتير لان الجسم بيكون قاعد وبتبدل فالمجهود تحسه انه عضلي اكتر منه بدني
4 - واخيرا المشايه المانيوال ودي انا بكرهها واي عميل بيدخلي بقعد اكرهه فيها لحد ما يسيبها خالص
لان ملهاش فايده خالص ورخمه
تطلع عالمشايه تقعد تزق في السير وخلاص علي كده
طب متشوف اي عربيه عطلانه وروح زقها وخلاص
علي ايه وجع الدماغ
عيبها اللي الناس متعرفوش وبعد ما تشتريها بتكتشفه
انها بتتقل بعد فتره
وملهاش حل
يعني متتصلحش
ولا تخف
تجبيلها سبراي وترش تخف شويه وخلاص علي كده
تبقي جايب المشايه وفاكر نفسك حتقطع الدنيا
تطلع تلاقي نفسك 5 دقايق بالكتير وتعبت
تاني يوم كذلك
تالت يوم وهكذا لحد ما يجيلك اكتئاب من المشايه من المعاناه اللي بتعانيها
ويحصل حاجه من الاتنين
ياحتبيعها وتجيب كهرباء
ياحتقلبها شماعه تحط عليها هدومك
وساعتها حتبقي اغلي شماعه جبتها في حياتك
وكمان ممنوعه لاكتر من 45 سنه عشان السن والمجهود بتاعها غبي
ومتعبه
ولو حد عنده استعداد للخشونه وميعرفش حتجيبله خشونه
يعني دي بعض مميزات المشايه المانيوال
وده رأيي الشخصي
ناس كتير بتاخد المشايه المانيوال وتلعب عليها عادي
بس دول قله قليله مندسه
يعن المهم تختار الجهاز اللي يريحك نفسيا وترتاح عليه بحيث تلعب عليه اكتر وقت ممكن يجيب معاك نتيجه
واي استفسار انا في الخدمه
المفضلات