الموضوع: تقيمي لمركز خدمة السبع – صيانة الألف كيلو

المشاركة الأصلية كتبت بواسطة aiman0173

في البداية معلش هتلاقوا التقييم كبير شوية بس أرجوا ما يكونش ممل وهتلاحظوا إني كنت بسأل على الحاجة الواحده أكثر من مهندس علشان أوصل للإجابة اللي تقنعني.
1. وصلت لمركز السبع في حوالي الساعة 11.30 صباحا وقبل الموعد المحدد لي بساعة كاملة وبصراحة بمجرد وصولي قام أحد الأشخاص التابعين للمركز بوضع كفر على الدركسيون وكرسي السائق والدواسة وبدأ في تجميع أغراضي داخل كيس وقام بتدبيسه وطلب مني التوجه لأحد مهندسي الإستقبال لتسليمه السيارة.


2. توجهت لمهندسة الإستقبال وقامت بأخذ ملاحظاتي وكتبتها صراحة كلها في التقرير وقامت معي لإستلام السيارة وأول ما لاحظته أنها قامت بفتح الكونتاك (بدون تدوير السيارة لفترة طويلة ) لأخذ قراءة العداد حتي أنها نزلت من السيارة وتركت الكونتاك مفتوح وعندما سألتها هو مش فتح الكونتاك لفترة طويلة غلط قالت لأ مفهوش مشكلة وعندما سألت نفس السؤال لمهندس تاني قالي طبعا غلط ونفس السؤال سألته للمهندس محمد عمر مدير الصيانة قالي مش مشكلة.
3. سؤالي التاني كان عن سعة تانك البنزين وإن مذكور في الكتالوج إن سعته 50 لتر لكن من ملاحظاتي عمرة ما يكون كدة فكلهم (4 مهندسين بما فيهم المهندس محمد عمر) أجمعوا إن سعته 40 لتر فقط وليس 50.
4. سؤال تاني عن الجير الأتوماتيك وإني بلاحظ إن لما السيارة بتكون على منحدر بسيط وإتجاهها للأمام وأنا واضع الجير على R بلاقيها بتتحرك للأمام وكأنها على N فكان رد 2 مهندسين إن ممكن العصاية متكونش جت على R أو معلقة بين الغيارين ومهندس تالت قالي لأ كده ممكن الجير يكون فيه حاجة وهبص عليه بس إجابة المهندس محمد عمر كانت إن دا طبيعي وخرج وجرب معي السيارة وبصراحة إقتنعت بكلامه.
5. المهم دخلت السيارة للصيانه ومعها طلب الإصلاح اللي مكتوب فيه ملاحظاتي وأحسن ميزة في المركز إن فيه إستراحة في الدور الثاني تقدر تشوف منها اللي بيحصل في العربية (وياريتني ما شفت).
6. لما العربية جي عليها الدور قام أحد الفنيين بإدخالها مكان الصيانة وأول شيئ فعله قام بتظيف فلتر الهواء ثم أحضر جركن واضح أن كان فيه صابون وقام بملئه بالماء ثم ملئ قربة المساحات منه (مفيش مشكلة) ، بعد شوية الفني اللي كان شغال في العربية اللي جنب عربيتي أخذ نفس الجركن وملئ منه قربة مساحات العربية التانية وكمان قربة مياه التبريد (كدا بقى فيه مشكلة) وبصراحة في الأخر قلت للمهندس محمد عمر على الموضوع دا قالي مش مشكلة دي قربة الفايز مش هتروح الردياتير فلما قلتله لأ طبعا هتروح فقالي دول شوية مياه صغيرين مش هيعملوا حاجة (بصراحة زعلت).
7. في الوقت دا الفني اللي شغال في عربيتي بدأ يرش إسبرية على زجاج السيارة الخلفي وفتح الباب وقفله كذا مرة (انا كنت مشتكي من مشكلة في الباب الخلفي) ثم قام برفع السيارة وقام بتربيط شوية مسامير تحت وضبط هواء العجل (مع أن العربية مش باردة زي الكتالوج مابيقول) وربط طاسات العجل بأفيز واحد في كل عجله (مع إني مسلمهم 8 لتركيب 2 في كل عجلة) وفك فلتر الزيت وطبة الزيت ولأني حسيت إنه بيشطب وإن ملاحظاتي محدش بص عليها روحت نازل من الدور الثاني ودخلت جوة المركز.
8. لما نزلت لقيت الفني اللي شغال في السيارة اللي جنبي بيقفل طبة الزيت علشان يأخذ الماكينة اللي بيجمعوا فيها الزيت للسيارة اللي هوا شغال فيها فطلبت منه يسيب عربيتي تصفي قالي مش مشكلة هي مش دي صيانة ألف الزيت بيبقى نظيف مع إن المفروض في الألف الزيت بيبقى مليان شوائب.
9. توجهت لأحد المهندسين وقلتله إن ملاحظاتي (وكنت كتيبها في ورقة) محدش بص عليها قام مشكورا بمناقشة الملاحظات معي وقالي حاضر هنشوفها (ملاحظه: دا تالت مهندس يقولي حاضر على ملاحظاتي) وطلب مني أطلع الإستراحة.
10. لما طلعت الإستراحة كان الفني بدأ ينزل العربية وكانت المفاجأة عند إضافة الزيت لقيته جايب جركن 4 ليتر واضح إنه مفتوح وحط كل اللي فيه وبصراحة النقطة دي ضايقتني جدا وقلتها للمهندس محمد عمر وأنا بحاسب قلتله يعني إنتوا بتحاسبوني في الفاتورة على 3 كيلو زيت فئة 1 ليتر بس اللي حصل إنكم حطتولي من جركن 4 ليتر وواضح إنه مكنش جديد يعني حطينلي بواقي قالي معلش أصل فئة 1 ليتر خلصت ومتخافش الزيت كله فريش قلتله أنا نفسيا مش مستريح والمفروض كان يتفتح جركن جديد لي وتحطولي منه 3 ليتر لأن مش مشكلتي إن فئة 1 ليتر خلص ، المشكلة إني لما روحت طفيت العربية لمدة ربع ساعة وقست الزيت لقيته فوق الH فإتصلت على المهندس محمد عمر وقالي دا طبيعي علشان الفليتر لسه جديد والزيت مدخلش جواه (رد غير مقنع لي).
11. المهم بعد كدا أخذوا العربية على الغسيل وبردة محدش بص على ملاحظاتي نزلت تاني وقلت لمهندس رابع على الملاحظات وقالي حاضر وبردة معملش حاجة والعربية إتغسلت وطلعت.
12. المهم وأنا بحاسب لقيتهم بيحاسبوني على 4 أفيزات بلاستيك لربط طاسات العجل ومع إن قيمتهم هايفة بس ضايقني الموضوع دا وقلت للمهندس محمد عمر يعني أنا جايب 8 من عندي وإنتم بتحاسبوني علي 4 من عندكم ، وإشتكيتله إن ملاحظاتي محدش بص عليها فقام الراجل مشكورا بركوب السيارة معي وتجربتها وناقش معي الملاحظات تاني وأقنعني ببعض الملاحظات وتبقى لي ضبط الأنوار وتقل الباب الخلفي وبصراحة الراجل مشكور دخل بالعربية داخل المركز وقالي أنا عملتهم بنفسي.
13. المهم وأنا بحاسب كان فيه عميل تاني مضايق جدا (مش عارف ليه) فمهندسة الإستقبال كانت بتعتذره وبتقوله معلش علشان النهاردة السبت بيبقز زحمة وعلى فكرة وأنا في الدور الثاني أحد العملاء بيتابع معهم من سنتين قالي إن الخدمة معدتش زي الأول وبدأت تقل.
14. على الرغم من صغر المركز لكنهم إهتموا وخصصوا مكان للمصلى بس ياريت يحطوا فيه ولو مروحة وياريت لو فيه تنبيه لوقت الصلاة.
بصراحة أنا كنت رايح الصبح وعندي إنطباع ممتاز عن المركز من خلال شكر الكثيرين فيه ولكن بعد التجربة الفعلية لم يعد هذا الإنطباع موجود وعلى الرغم من أن معاملة الناس في المركز ممتازة ودائما يقولون لكل ملاحظاتك وتعليقاتك حاضر لكن غالبا لا يتبع كلمة حاضر تنفيذ بمعني أدق بيقولوا حاضر من مبدأ كلمة حاضر بتريح وبصراحة لو أردت أن أقيم المركز بالدرجات فلن أعطيه أكثر من خمسة من عشرة

أنا برد حصلت معايا نفس المشكلة في صيانة ال-1000 كم لسة عملها من 3 اسابيع تقريباً بس كانت في مودرن موتورز إلي عند مقار و قلت أروح التوكيل إلي في زهراء المعادي في صيانة ال-5000 كم بس شكلها كدا مفهاش فيدة...مشكلة مودرن موتورز إن مينفعش تشوف العربية و هي بتتعمل

http://www.nilemotors.net/Nile/143769-1000.html ده حكيتي معاهم

فرق كبير بين الراحة النفسية اللي كنت عليها وانا ماشي بعد ما عملت صيانة ال 1000 عندهم وبعد ما عملت صيانة ال 5000.. طب انت شوفت عربيتك قدامك بيحصل ايه فيها .. انا قاعد 5 ساعات ونصف او 6 وماشفتش عربيتي (لان المكان ما يسمحش ان كل الناس تشوف عربياتها ) .. وقبل كدة كان بيطلع واحد للاستراحة اللي فوق ينادي على اسم صاحب العربية اللي خلصت .. لا دلوقت لازم تنزل كل شوية تسأل .. بصراحة لما م/ حاتم فوزي مشي (رغم انه كان مهندس استقبال فقط وليس مدير مسئول ) تحس ان الخدمة مستواها تراجع عن الاول