المشاركة الأصلية كتبت بواسطة ahmeddarhos
مساء الخير يا شباب....
كل الناس طبعا عاوزة تعرف ايه اللى حصل فى أبورواش و بالتفصيل....
أولا ألف ألف شكر للناس الايجابية اللى حضرت معانا و الناس اللى كانوا فعلا عاوزين يحضروا ومنعتهم ظروف قهرية.. و احنا عارفينهم بالاسم...
والناس اللى ماحضرتش بسبب التردد أو الكسل صدقونى خسروا كتير.. و الناس اللى ماحضروش لأن عربياتهم تمام,, ربنا يبارك فى عربياتهم وتفضل زى الفل...
بس يا جماعة فى رجاء خاص جدا جدا من السادة الملاك.. ياريت لما نتصل بحد يكون موقفة واضح و صريح .. يعنى يا هيشارك معانا أو لأ.. و الموضوع مافيهوش زعل والله العظيم ..
لكن اللى يزعل اننا نكلم الناس فى التليفون ( و فى ناس هم اللى كلمونا) و يبقوا متحمسين جدا و تلاقى الواحد يقولك أنا معاكوا ان شالله الموضوع يوصل للمحكمة.. و نيجى ساعة المعاد نقعد نتصل علشان نعرف هم جايين ولا ايه.. تلاقى اللى قافل موبايله ,, و اللى مابيردش ...!!!!
يا جماعة عيب بجد.. حضورك مش هيفيد حد بحاجة.. ده حقك عاوز تيجى علشانه براحتك.. و لو متنازل عنه براحتك....
عموما اللى حصل مش سر ولا حاجة علشان الناس ماتزعلش... زى ما محمود قال : احنا قابلنا المهندس المسئول و طلبنا حل مشاكل العربية وديا... و المهندس بصراخة طلع محترم وصريح وقال ان السكة اللى فى الموتور مالهاش حل ..!!!!!
احنا بنعمل اجراءات قانونية فى أكتر من جهة و هنبدأ بعد 3 أو 4 أيام و ان شاء الله هناخد حقنا
بس فعلا لازم تعذرونا اننا مش هنقدر نقول كل حاجة بالتفصيل على المنتدى..
لكن نوعدكم كل لما نتقدم خطوة فى الاجراءات هنقولكم على طول .. زى مابنقول دلوقت..
فياريت زى ما الأخ محمود قال اللى عنده العربية و فيها مشاكل و عاوز يبقى معانا يبعت بياناته على الايميل.. بس بشرط انه يكون جاد جدا... و مستعد يضحى بوقت لو طلبنا منه حاجة يعملها لأن كل واحد فينا له دور محدد.. و ممكن كمان يكون فى شوية مصاريف.. الله أعلم هتكون كام.
و الناس المحترمة اللى ماعندهاش العربية و مهتمة بالموضوع ياريت يدعولنا بالتوفيق..
قال رسول الله "صلى الله عليه وسلم" ( المسلم للمسلم كالبنيان يشد بعضه بعضا) ...