الموضوع: أزاى أروح كارفور من المرج الجديدة؟

انا اقدر اوصف لك الطريق لكن معرفش حاجة بخصوص الموبايالات

بص يا سيدى

لو معاك عربية ، من عندك فى المرج الجديدة تمشى على الطريق الموازى لمترو الأنفاق (أللى هو مترو الأنفاق يبقى على شمالك) لحد ما توصل للطريق الدائرى، تطلع الطريق الدائرى فى اتجاه (طريق الإسماعيلية الصحراوى،طريق السويس، مدينة نصر، القاهرة الجديدة،القطامية، المعادى، المنيب المريوطية، المنصورية ، الهرم) ، يعنى الإتجاه المشار اليه بأى كلمة من دول

تفضل ماسك الطريق، هيقابلك اولا نفق تحت طريق الإسماعيلية، انزله وكمل، وبعديه بحوالى 10 كيلومتر تقريبا كوبرى فوق طريق السويس، اطلعه وكمل فى نفس اتجاهك على الدايرى، وبعديه ب 3 كم نفق تحت مدخل مدينة نصر والتجمع الاول، برضه انزله وكمل فى نفس اتجاهك، بعديه بحوالى 4 كم، نفق تدت مدخل التجمع الخامس، انزله وكمل فى نفس اتجاهك، بعيده بحوالى كيلومتر نفق تانى على اليمين يدخل التجمع الخامس برضه، مالكش دعوه بيه وخليك شمال فى نفس اتجاهك، بعد كدة ب 10 كيلو تقريبا هتلاقى محطة بنزين موبيل على اليمين، وبعديها مبنى الوميتال ازرق مدور على اليمين ، وبعدين هتلاقى الدنيا بقت عمار ومليانه عمارات عالية، اول ما تشوف العمارات العالية بص على شمالك لحد ما تشوف يافطة كارفور، واول ما تشوفها هدى العربية خاااااااالص وخليك يمين، هتلاقى فتحة صغيرة تدخلك على نفق تحت الدائرى يعديك قصاد كارفور مباشرة

لو رايح بالمواصلات ، اركب مترو الأنفاق من المرج لحد محطة الزهراء (زهراء مصر القديمة)، المحطة اللى بعد مارى جرجس والملك الصالح، انزل هناك وخد تاكسى لحد كارفور، ممكن ياخد منك فى حدود 10 جنيه مثلا، او تنزل من المترو تتمشى لحد الطريق الدائرى واتخد اى ميكروباص رايح القطامية وتنزل عند كارفور