يرودوا كيليسا .... عربيه ممتازه ... مش منتشره لية

نفسي أعرف يا جماعه العربية ده مش وخدا وضعها ليه في وسط العربيات إللي في نفس الفئه

1. كيا البيكانتو هيا أحسن من الكليسا بس بقت غاليه بطريقه مسنفيزة جدا ... 61.5 ألف هاف أوبشن (صناعه كوري)
2. ديهاتسوا شاريد و ديه أحسن من البكانتو و الكليسا .... بس خلاص بح مفيش منها تاني في مصر الموديل الجديد تحفه بس التوكيل من هيجيبوا تاني علشان هيعدي ال 80 الف (صناعه ياباني)
3. شيفروليه سبارك ... وديه عربيه تقفيلها ممتاز و 65 حصان و التوكيل بتهعا ناس محترمين ... أنما ضيقة جدا و عاليه عن الأرض قوي ... يعني كبيرك تمشي بها 90 و بعد كده شكرا مفيش ثبات على الطريق و مش بور و قطع غيارها غاليا في حين أنها في الأصل دايو ماتيز و في الأخر بتبتدي من 55 الف (صناعه كوري)
4. الهييونداي أتوس ... ديه بصراح أنا مش شايف فيها حاجه مميزه عن إلعربيات إلي فاتت ده غير أنها بتبتدي بي 55 ألف تقريبا تكيف و بور و كاسيت ... بعدين ده غير أن الناس كلها بشتكي من توكيل غبور.... (ملحوظه : البيكانتوا أكتسحت العربية ده في المبيعات بمراحل في حين إن الناس كلها شيفا الهيونداي منتشر إزاي في مصر) (صناعه كوري)
5. سوزوكي ألتوا 1.1 سي سي و ديه سعرها 56 ألف .. معرفش علي إيه ... الفنش بتعها وحش و العربية تحس أنها ورق يا حماعة الواحد يجييب ماروتي أحسن ب 36 الف ... ومبيعتها ضعيفة جدا ده غير أنها تقفيل هنـدي (مكونات ياباني تقفيل هندي)
6. سبيرانزا A1 زي مكتبين على الموقع الرسمي بتعهم ... و ديه لاحول و قوه إلا بالله ناس كتير جبتها و ند موا أنهم جبوها بس ده كافيه أنها صيني و معديه ال 50 الف بردوا (صناعه صيني)
7. أيديا .. العربيه وسعة جدا من جوا .. بس تقفيل سيء جدا و انا متوقع أنا هتبقي أسوء من السبيرانزا (صناعه صيني)

بيرودوا كيليسا ... ده بقي أنا حاسيس أنا مظلمة جدا العربيه ده و في ناس كتير متعرفش عنها حاجة

العربيه عامله 51 الف - ماينويل - تكيف و بور و كاسيت و سنتر - 1000 سي سي - 55 حصان

* الصالون واسيع و مريح جدا
* الناس بتوع الأتو كروس بينزلو بها لحد دلوقتي و كنت وخدا مركز أول سنه 2004
* العربيه بتمشي 475 كليو ب 20 لتر بنزين .... قريبه من الشاريد الله يعوض علينا فيها
* في دعمات فولاذ في الأبواب علشان الأمان
* أصلها العربيه الديهتسوا ميرا زمان
* في ناس جربتها و قالت ان الموتور من بتأثر بالتكيف جامد
* رأي تاني أنها صوت الموتور ناعم جدا قبل سعرة 90 كيلو و ثابته جدا في الملفات
* و في الأخر تجميع ماليزي مكونات ياباني

الأنا مش فهموا ليه العربيه مش منشره أكتر من ( السبارك - أتوس - ألتوا -سبيرانزا A1) ... أنا أن شاء الله هشتري العربية ديه ... فلو حد يعرف أي عيوب فيها أو مختلف معيا في الرآي يا ريت يقولي قبل مشتريها ... وجزاكم الله خيرا

شوف يا رامي هيا عربية حلوة جدا ومعاك حق في كل اللي قولته بس الاختلاف الوحيد ان العربية 3 سلندر
زيها زي الشاريد
اكتر واحد يفيدك فيها هو زميلنا استاذ محمود حفناوي لان اخته جابت واحد اتوماتيك من اسبوعين ويقدر يديلك تقييم كامل ليها
وانا اخويا الصغير معاه البردوا الكانشيل ممتازة بس عيبها انها بتسخن دي كل مشكلتها بصراحة
بتسخن وقت السفر بس عشان 3 سلندر لاكن جوة البلد روعة
العربية دي روحت بيها اسكندرية وجيت ب 20 لتر بنزين بس انت مستوعب
والكليسا زيها تقريبا دي 850 ودي الف
لا ارشح سبارك نهائي
واتوس هيا هيا بيكانتو نفس الموتور ونفس الفتيس ونفس الشاسيهة واجهزة التعليق بس عفشة البيكانتو احسن شوية وشكلها احلى بكتير وبياعة جدا لاكن الاتوس مالهاش حظ في مصر وزميلي جابها وداخ على ما عرف يبعها وباعها قسط لواحد قريبة
سبارك انساها نهائي
ايديا واسبيرانزا كويس انك قريت عنهم
عيب الكليسا الوحيد اعادة البيع لو مش هاتبيع قبل 5 سنين اتوكل على الله

MrRami...أحب أقوللك اني بفكر بنفس الفكر اللي انت بتفكر بيه...و مبسوط اني لاقيت حد بيفكر زيي في الموضوع ده:)

أنا كنت خلاص مقتنع 100% بالإسبرانزا A113 و فرجتها لأبويا و حطيت في دماغي اللون اللي عاجبني..و قلت أول ما الفلوس تجهز هتكون ديه اختياري.....بس فجأه فقت من اللي أنا كنت فيه..حسيت بحاجة جواية بتقوللي بلاش...و اكتشفت أسفا اني كنت مخدوع و موهوم زيي زي غيري كتير اللي اشتروها و اتوهموا بالشكل الرائع و الكماليات اللي مش موجوده الا في الغالي و الوسع و كل حاجة ......بس بصراحة صعبانة عليا الكماليات اللي كانت فيها:D:D

رحت معرض فورميولا انا و والدي و والدتي و كان كل هدفي اني أتفرج علي العربيات الصغيرة اللي في الفئة دي...شفت الألتو و معجنيش شكلها من ورا و اما بشفها ماشية معايا علي الطريق بالقيها بتتنطط جامد و مش ثابتة...

و بعدها شفت البرودوا كليسا...و حسيت ان هي دي الصفقة الرابحة...موتورها ياباني 100% مش متجمع في ماليزيا قوي و مشهود له بالكفاءة و هو هو نفس موتور الشاريد..1000سي سي 55 حصان و وزنها 810 كيلو...(كانت مع واحد صاحبي و جاب بيها علي التاني 80)...استهلاك البنزين حوالي 22 كيلو للتر يعني الصفيحة بتعمل 440 كيلو..يعني التانك يعمل حوالي 800-850 كيلو:eek:...من جوة كويسة خامات و تشطيب..بس دايقة شوية من ورا..و الشنطة صغيرة طبعا...و فيها شوية كماليات ظريفة...زجاج كهرباء أمامي(بتاع السواق أوتو)..سنتر..تكيف..باور..كاسي� � و سماعتين..مساحة خلفية..فتح شنطة و تانك من جوه......واخدة ريفيوز عالية جدا في حتة الrelaiability و ال running costs..لأنها تكلفة تشغيلها رخيصة جدا...

في النهاية أنا شايف انها أنشب سعر مقابل القيمة في الوقت الحالي..حيث ان سعرها لا هو عالي قوي و لا منخفض جدا مقابلة بالامكانيات...


اينعم شكلها الخارجي و الداخلي يعود للتسعينات...لكني أفضل كفاءة التشغيل عن الشكل و الكماليات

احب اقولكم بس اللي عايزها يلحقها عشان دي اخر دفعة واتوقف انتاجها وهاتنزل موديل جديد اغلى
دي معلومة مش متاكد منها

شكرا يا جماعه على ردكم جزاكم الله كل خيرا ... كده الحمد لله تعبي في البحث في المندايات و معارض العربييات جيه بفييدة و أنتوا أكدتوا النتيجه إلي وصلتها ... وديه كدة أحسن عربيه من حسيث السعر و القيمة في الفئه ديه ... ربنا ييسري الحال و أعرف أجبها في إن شاء الله في خلال الفتره الجايه و هبقي أقولكم رأي فيها بعد التجربه العملية ... شكرا

ربنا يوفقك يا رامي و تجيبها ان شاء الله :)

انا كمان كنت بافكر فيها، بس اللي خلاني مترددة هو اني شايفاها منخفضة شوية (مش عايزة أقول واطية احسن اتفهم غلط :D ) عشان يعني المطبات اللي مالية البلد.. يعني لو راكب ورا 3 مثلا متوسطي الحجم هايبقى ايه الوضع؟

و بالنسبة للأوتوماتيك منها، ايه أخبار أعطاله؟ عشان في اكتر من حد نصحني هنا في المنتدى اني لو ناوية على اوتوماتيك يبقى يا اما ياباني او ألماني.. ما رأيكم دام فضلكم؟

انسة علا دي فتيس وموتور ياباني تصنيع اليابان مش مجرد مكونات
هو نفس موتور الميرا القديمة وده موتور رائع وموتور الشاريد برضه ال 2007
عربية ممتازة فعلا واتوماتيك محترم بس عيبة 3 نقلات بس مش 4
عشان كدة افضل المانيوال فيها

اقتباس:

---

المشاركة الأصلية كتبت بواسطة karim_monir

انسة علا دي فتيس وموتور ياباني تصنيع اليابان مش مجرد مكونات
هو نفس موتور الميرا القديمة وده موتور رائع وموتور الشاريد برضه ال 2007
عربية ممتازة فعلا واتوماتيك محترم بس عيبة 3 نقلات بس مش 4
عشان كدة افضل المانيوال فيها

---

طيب معلش استحملني شوية لو أسئلتي غبية.. هو ايه الفرق بين 3 نقلات و 4؟ :confused:

تلات نقلات يعني الفتيس فيه أول و تاني و تالت بس...يعني القابلية لتسقيط النقلة هتقل جدا...ده غير اني أعتقد ان صوت الموتور هيبقي اعلي علي السرعات العالية عن مثيله الخمس سرعات مانيوال

انا جت لى فرصة الفترة اللى فاتت لتجربة الكيلسا بتاعة صديقنا محمود حفناوى ،

بالنسبة للكيلسا اول انطباع بالنسبة لى عنها انها صغيرة جدا، وده باين فى حجم الشنطة(مافيش تقريبا) وحجم غرفة المحرك، ضيق الصالون، كان بجانبى دكتور احمد سمير وكان كتفى فى كتفه طوال الوقت

الموتو 3 سلندر حقن الكترونى، والعربية اوتوماتيك

العربية مصممة بنسب تخفيض قليلة علشان تعوض المحرك الصغير وكماليات الكثيرة، وده مخلى للعربية ميزة وعيب، الميزن انها تسارعها ممتاز (بتجرى زى الطلقة) والعيب ان سرعتها القصوى قليلة ده غير ان الموتور بيجهد جدا على السراعت العالية،

بمعنى آخر الجير الأوتوماتيك 3 نقلات فقط (يعنى الجير بوكس لما تحطع على D بيغير اوتوماتيكيا بين اول وتانى وتالت فقط، مافيش رابع زىاللى موجود فى العربيات الأوتوماتيك الأكبر) والعربية على التالت (اعلى غيار) بيكون العداد قارى 4000 Rpm على 100 كيلومتر فى الساعة وهو رقم يعتبر عالى مما يجعل السفر لمسافات طويلة بشكل متكرر يمثل اجهاد للمحرك، ده غير ان الموتور صوته الى حد ما عالى حتى فى السرعات البطيئة
فيما عدا ذلك فإن عفشة العربية اكثر من ممتازة، التحكم فى العربية ونظام التوجيه اكثر من رائع، العربية مزودة بكثير من الكماليات مثل التكييف والزجاج الكهربائى، خامات الصالون جيدة جدا والتقفيل ممتاز وشكل التابلوه انيق الى حد كبير

الخلاصة: سيارة ممتازة لاستعمالات المدينة تحتوع على كل ما يمكن ان احصل عليه من سيارة كبيرة وتتميز بسهولة المناورة والحركة داخل المدينة بسرعات لا تزيد عن 80-90كيلومتر فى الساعة فى الأوقات العادية، طبعا العربية بتجيب سرعات اكتر من كدة لكن تصميم السيارة غير مناسب للتشغيل على هذة السرعات العالية طوال الوقت، لذلك لو حد مشاويره كلها سفر لازم يدور على محرك اكبر ونسب تخفيض اوسع شوية

أنا عرفت من أخويا محمود حفناوى ان وكيلها هو هاشم اللى فى اول طريق اسماعيلية، ياترى ليه فرع او معرض ناحية الهرم او المهندسين؟

على حسب معلوماتى يا حسام مفيش ليه فروع تانية :( و ذى ما قولتلك أى وقت عايز تشوف العربية قولى و نسق سوى إن شاء الله

انا شايف يا جماعه ان سبب عدم انتشار العربية دى
ضعف التسويق من التوكيل
مش عيب من العربية

اقتباس:

---

المشاركة الأصلية كتبت بواسطة memo_hefnawy

على حسب معلوماتى يا حسام مفيش ليه فروع تانية :( و ذى ما قولتلك أى وقت عايز تشوف العربية قولى و نسق سوى إن شاء الله

---

ربنا يخليك يا محمود، المشكلة انى عاوز اودى خالى يشوفها علشان نجيبها لبنته، بس علشان ظروف مرض جدتى و زحمة الشوارع ما بيحبش يبعد عن المستشفى، يوم الجمعة لما كلمتك، ركبته العربية من غير ما اقوله على مكان التوكيل و لما عرف خلانى ارجع من العباسية، ربنا يسهل و اعرف اوديه الجمعة الجاية.

انسة علا مهندس خالد شرح اللي كنت عايز اقولوة خاصة ان هو اللي جرب العربية
بس هيا ممتازة قوي فعلا جوة البلد

حسام الف سلامة على جدتك وشفاها الله وعافها من كل سوء
التوكيل مالوش اي فروع تانية فعلا غير اللي عندي في اول الاسماعيلية الصحراوي

توكيل العربية البرودوا فى مصر " هاشم باص "
وده الموقع بتاعه على النت
http://www.hashimbus.com/

السلام عليكم
انا قريت انهم وقفوا الانتاج بتاع الكليسا و استبدلوها ب
Viva

A few days after the launching of the latest model, the Viva, Perodua announced it was stopping production of the Kelisa

المصدر:
http://en.wikipedia.org/wiki/Perodua_Kelisa

فازاى هى لسه بتتباع فى مصر؟

ماهو اللي لسه بيتباع في مصر ده أخر دفعة جاية من المصنع هناك و فيها تقريبا 100 سيارة....يعني اللي عايزها يلحق يشتريها دلوقتي

شكرا يا نادر على الرد
بس هو مش كده معناه انه مش حيبقى فيه قطع غيار متوفرة؟
انت هندسة القاهرة دفعة 2002؟:)

المفروض هيبقي فيه لأن التوكيل لسه موجود...ده غير ان قطع غيارها هيه هيه بتاعت الدايهاتسو ميرا القديمة في كل حاجة ما عدا الفوانيس اللي قدام...

أنا ولا جامعة القاهرة ولا هندسة أصلا :) و لسه هاتخرج الترم اللي جاي:)

كلامك منطقى فعلا, انا كنت فكر اجيبها
معلش تشابه اسماء و سكن:)

عارفين يا جماعه الكليسا دي منتشرة جدا بدمياط مع ان 50 الف مبلغ عالي في حجم سيارة زي دي وممكن اللي شاريها يدفع ضعف التمن ده في عريية كبيرة لكن اللي بتقدمه العربية دي من توفير عالي جدا في البنزين واقتصاديات صيانة ملهاش مثيل
فتوكل عى الله واشتريها وانا ان شاء الله لو توفرت فوس هاشتريها مفضلها على الاسبرانزا 1300cc