الموضوع: ما هي معايير تغيير مقاس الجنوط ؟

.

متابع باهتمام......

متابعين كلنا بأهتماااااااام

السلام عليكم و رحمة الله و بركاته,

ردا على سؤال حضرتك الأول ... لا يوجد إرتباط بين مقاس الجنط و وزن السيارة.

تغيير مقاس الجنط لمقاس أكبر بيكون الهدف منه الحصول على ثبات أعلى للسيارة ... إزاي ... إطار السيارة عبارة عن جزئين الجنط (حديد أو ألومنيوم) و الكاوتش المطاط ... قطر إطار السيارة = قطر الجنط + (2 * بروفايل الكاوتش) ... البروفايل هو الجزء من الكاوتش إللي بيكمل الجنط في القطر الكلي للإطار ... طبعا خصائص الكاوتش إنه مطاط و كمان منفوخ هواء و بالتالي غير ثابت في الشكل (بياخد ويدي مع أي قوة تأثر عليه زي الملفات, مطبات, أو حتى لو ضغط الهواء مش متساوي على الإطارت الأربعة) كل ده ضد الثبات الكلي للسيارة ... إنما الجزء المعدن (الجنط) ثابت في الشكل وبالتالي ده مع الثبات الكلي للسيارة ... هندسيا لما بتكبر مقاس الجنط لازم تحافظ على إجمالي القطر الكلي للإطار (جنط + كاوتش) إنه لا يزيد ولا يقل عن القطر الكلي الأصلي ... وهقول لحضرتك ليه بعد شوية ... وبالتالي تكبير الجنط بيكون على حساب تقليل بروفايل الكاوتش ... وبالتالي ثبات أعلى + إحساس أعلى بخشونة الطريق ... حاجة قصاد حاجة.


أسباب لزوم عدم تغيير القطر الكلي للإطار:

• عداد السرعة بيحسب السرعة من عدد لفات الإطارات في الساعة وبالتالي لو القطر الكلي للإطار أصبح أصغر من الأصلي (الستوك) للسيارة عداد السرعة ها يقرأ سرعة أكبر من الحقيقي (يعني مثلا العداد ها يقرأ إن السيارة ماشية بسرعة 100 كم/ساعة إنما فعليا السرعة 90 كم/ساعة) ... والعكس هيحصل لو تم تكبير الإطارات عن الأصلي.
• لو ٌقطر الإطارات زاد عن الأصلي ممكن يتسبب إنك متعرفش تكسر الدركسيون على الآخر الطبيعي بتاعه نتيجة إن الإطارات الأمامية بتخبط في الرفرف من جوة وده لو حصل خطر جدا خصوصا على سرعات عالية شوية ومع المطبات ممكن لاقدر الله تتسبب فب إنقلاب السيارة ... نفس فكرة واحد بيكعبل نفسه ...أما لو القطر قل عن الأصلي العربية هتبقى واطية وده يبهدل الشاسيه والعفشة.
• لو ٌقطر الإطارات زاد عن الأصلي ومع المطبات المساعدين مبيلحقوش يكملو المشوار بتاعهم لأن الكاوتش بيخبط في أعلى الرفرف من جوة ... إللي هو تحت ركبة المساعد و بالتالي مع كتر الخبطات دي ممكن الركبة إللي راكب فيها المساعد تتعوج سنة وديه مبتتصلحش ولا في التوكيلات وبتتسبب إن فردة الكاوتش إللي تحتيها تحصل عليها نقاط ضعف (تتمسح من ناحية قبل التانية بسرعة) ...... أما لو ٌقطر الإطارات قل عن الأصلي ده بيخلي المساعدين برضه ميكملوش المشوار بتاعهم بس لسبب تاني وهو إن العربية بقت أوطى من الأول وبالتالي لازم تحك في الأرض قبل ما المساعدين يعملو المشوار كامل.

بالنسبة لسؤال حضرتك الثاتي علشان توصل إنك تحتاج تغير المساعدين ده معناه إن القطر الكلي الإطار الجديد هايكون أكبر من الأصلي (الستوك) ... يعني العربيه تعلى عن الأرض ... و ده بيحصل بس لازم تاخد بالك إن عداد السرعة هيحتاج يتعاير على المقاس الجديد للإطار و ده غير متوفر يمكن في مصر كلها و الخدمة دي غير متاحه عند توكيلات السيارات بأنواعها مع إنهم طبعا يقدرو يعملوها لأنها عربياتهم في الآخر ... وبرضه خد بالك إنك لما ترفع السيارة عن الأرض الثبات بيقل أولا بسبب بعد مركز ثقل السيارة عن الأرض و ثانيا زيادة كمية الهواء إللي هتعدي من تحت السيارة في السرعات العالية.


بالنسبة لتغير مقاس الجنط مثلا من 17" ل 16" (زي مثال حضرتك عن ملاك السيراتو) فا ده مبيأثرش على العفشة طلما هايحافظ على القطر الجديد إنه يكون نفس القطر القديم ... بس هم بيعملو كدة علشان إحساس خشونة الطريق يقل شوية و غالبا إللي بيعمل كدة مش هدفه الجري و الشد والغرز ... بيكون هدفه الراحة داخل السيارة وخصوصا لو بيسافر كتير.

أرجو أن أكون قدرت أوضح بشكل سليم ولو جزء من إستفسار حضرتك ... و شكرا.

متشكر على المشاركة
انا بتكلم على تغيير الجنوط مع المحافظة على قطر الاطار
يعني هل هذا يكفي؟
من مشاركة حضرتك عرفت ان ده يكفي
ووزن العربية مش مشكلة لو صغر الجنط
والعفشة مش مشكلة لو اتغير الجنط طالما حافظنا على القطر الاصلي للاطار
وملخص كلام سيادتك

لا يوجد إرتباط بين مقاس الجنط و وزن السيارة.

بالنسبة لتغير مقاس الجنط مثلا من 17" ل 16" (زي مثال حضرتك عن ملاك السيراتو) فا ده مبيأثرش على العفشة طلما هايحافظ على القطر الجديد

هل يوجد رأي اخر ’’’’’’’’’’’نرفع الجلسة ولا نستنى شوية؟