معروض عليا فورد فيستا 97 فاضية من غير كاسيت والحالة العامة كويسة جدا الراجل طالب 25
عايز اعرف دة كتير ولا كويس؟ممكن حد يساعدنى؟
عرض للطباعة
معروض عليا فورد فيستا 97 فاضية من غير كاسيت والحالة العامة كويسة جدا الراجل طالب 25
عايز اعرف دة كتير ولا كويس؟ممكن حد يساعدنى؟
1100 ولا 1300
و فين الكاسيت
العربية 1100 والكاسيت مش فيها هو بيبعها من غير كاسيت يعنى وكمان مافيش طاسات بس غير كدة العربية حلوة جدا
انا لسة معروض عليا العربية دى بالكاسيت وفيها حاجتها..بس لسة مكشفتش عليها ومش عارف الصراحة اساسا الفورد ايه نظامها فى السوق خالص تفتكروا سعرها لما تكون حالة جيدة جدا تعمل كام ؟؟؟ وايه مشاكلها كمان..
ياريت اللى مجربها يقولنا مشاكل الفورد فيستا 97 ايه بشكل عام مش مشاكل عربيته الخاصة :)
تحياتى ليك وربنا يوفقك ويوفقنا
هيا العربية الى معروضة عليك مكيفة ولا فاضية وقولنا الراجل طالب فيها كام علشان انا عايز اعرف 25 دة كتير ولا اية
شكرا
انا معايا العربية دي 1997 1100
بالنسبة للي بيسئل على مشاكلها
العربية بقالها معايا 4 سنين وعامل بيها حوالي 75000كم
الحمد لله مشفتش منها مشكلة ومعتقدش إني هشوف
العربية مفيهاش تعقيد وأي ميكانيكي وعفشجي كويس يشتغل فيها
لوعفشتها سليمة ثباتها على الطريق زي الفل
موتورها علشان 1100 مش وهمي في السحب وأخرة في السرعة 145كم لكن موفرة جداً في البنزين بتوصل ل 400كم في الصفيحة في السفر مع إنها كربراتير مش إنجكشن.
وقطع غيارها موجودة سواء جديد أو إستيراد ومتعتبرش غالية بالنسبة لباقي العربيات اللي زيها
أما بالنسبة للسعر بيعتمد على العرض والطلب محدش يقدر يقول العربية دي تسوى كدذا بالظبط لأن ده بيعتمد على حالة العربية وإعتناء صاحبها بيها على أساس كدة بيطلب رقم واللي عاجبة يشتري واللي مش عاجبة يدور تاني المهم تكون العربية كويسة وسليمة
عموما العربية دي أصلا مظلومة في السوق لأنها مش معروفة مع إن العربيات اللي في نفس الفئة بتاعتها زي البولو والإبيزا أسعارهم بتعدي ال 35,000 مستريح يعني اللي هيشتريها كسبان كسبان لأنه عمرة ماهيعرف يركب عربية في الفئة دي بالسعر ده
متشكرين يا باشا على المعلومات القيمة دى .انت وصفت وصف رائع هيا العربية دى كدة فعلا زى ما انت وصفتها وموفرة جدا فى البنزين
عموما لو عايز تبيع قول وانا عندى المشترى...شكرا
العفو ياباشا إحنا كلنا هنا علشان نفيد بعض
وانا فعلا بفكر أغير للأكبر وإن شاء الله هجيب إسكورت بس مستني أفضى شوية علشان أدور على واحدة كويسة علشان مش هينفع أبيع وأفضل فترة بدون عربية.
ربنا يوفق ويقدم اللي فيه الخير
واحد صاحبى باع الفورد اسكورت بتاعته وفيها كاسيت باوينير 6050
وصب وgm وسماعتين كينوود تقريبا و زينون عالى وديفل
والعربية 1300 سى سى ب 27.000 جنيه...ولو من غير الساوند سيستم كانت حتبقى ب 25.000 جنيه....
انا معرفش اسعار الفيستا بس انا شايف ان السعر غالى...
انت طمنتنى بكلامك عنها ربنا يبارك فيك..وياترى بتحطلها بنزين 80 ولا 90 ولو انت من اسكندرية بتتعامل مع انهى ميكانيكى عشان لو جبتها ان شاء الله اتعامل معاه
وبالنسبة لاخى اللى بيسأل عن سعرها فهى معروضة عليا من واحد يعتبر قريبى من بعيد ب 22 ألف ومن غير تكييف ومفيهاش اضافات خالص
وشكلها حتحتاج شغل دهان ..وانا خايف يكون سعرها قليل لعيوب داخلية بها ولسة حكشف عليها عشان اتأكد اذا كانت من جوه بايظة ولا لا ..ولسة مش عارف اكشف فين ومحتار والله
اخى الفاضل جزاك الله خير عالمشاركة ولكن دعنى اقول لك من باب الحب والاخوة..انت تقول انك لا تعرف اسعار الفيستا ؟؟
فلمااذا تقول انا شايف ان السعر غالى؟؟؟؟؟؟؟؟؟؟؟؟؟؟؟؟؟
اخونا يوسف فى حيرة من امره ولابد ان تكون ردودنا شافية وافيه عن علم راسخ
فلا مجال اخى فى هذا الوقت لكى نشتته ونقول غالى ورخيص واحنا بنقول مش عارفين سعرها
ربنا يكرمك واسف على ردى ولكن انا استغربت من ردك جدا فسامحنى
مش عارف يا يوسف انا كنت بدور على عربية في عز ما كان السوق عالي و شوفت الـ 1100 الي كانت تحفة و كان مطلوب وقتها 25 بس كان صاحبها انسان غتت جدا علشان كدة البيعة ما تمتش
بس عموما كاسيت العربية الفورد انا بحس انه من التفاهات الي ممكن تدينا انتطباع عن معاملة صاحب العربية ليها
و عموما ادخل على كونتاكت انا شايف ان فيه 1300 بارقام مقاربية للتمن بتاعك رغم فرق الاداء الكبير بين الاتنين و من هنا انا شايف ان 25 كتير
انا وصلتها معاة ل 23 بس وكمان خد بالكو انها مش مكيفة .اما بالنسبة ل 1300 فا انا الصراحة ميال ل 110 علشان المكيانيكا بتاعتها سهلة وكمان كاربتير مش انجشكن هحط 80 يعنى
لو حطيتلها بنزين 80 هتسقف معاك جامد لأن العربية وحدة الإشعال فيها إلكترونية يعني مافيها إسبراتير ومش هتعرف توطي الكهرباء علشان متسقفش
لو عايز ممكن تحط نص التانك 80 ونص 92 هتكون معقولة معاك
إذا كان على الدهان الخارجي ده مش مشكلة بالعكس انا شايف إنه أحسن لما الواحد أول مايجيب العربية مستعملة لوفيها حكات أو خرابيش يرشها علشان يحس إنه راكب عربية جديدة وشكلها حلو ومش هتفرق 1000 ولا 2000 جنية على تمن العربية
وبالنسبة للكشف عليها الموضوع بردة مش صعب قوي لأن العربية مافيهاش خبايا كتير يعني لو الموتور حالتة كويسة ودواخل العربية سليمة يبقى مفيش مشاكل ودول أي ميكانيكي وسمكري كويس يعرفهم ولو عايز تتطمن أكتر روح كمان لبتاع زوايا يشوف أخبار العفشة إيه ولو فيه عجل مفتوح ولا مقفول وكدة يعني
قبل كل كدة إستخير وإن شاء الله ربنا هيوفقك للي فيه الخير
انا معايا فورد فيستا 1999..ما مشيتش غير 40 الف كم.بجد اصحابى اللى عندهم مرسيدس بيحلفوا انها اخف و اسرع واقوى منهم...انا عشان كده مخليها للنزاهة والسفر الطويل و عندى عربية تانية..و كمان تكييفها قوى مبيتأثرش بالسحب..وقطع غيارها متوفرة و اسعارها ارخص من اليابانى.عندنا فى طنطا عند نشأت فوزى..و كلة موجود...توكل على الله واشترى ومش هتندم.رقم تليفونى 0115029940