خبطه فا كان عايز بطلع عليا مصلحة !

**MoToRiZeR** · 02-02-2008 02:58 AM

امبارح كنت معدي جنب قاعة المؤتمرات .. الشارع كان واقف شوية .. في ثانية كدة كنت ببص في الساعة تصادف ان العربية اللي قدامي وقفت فجأة .. فا خبطنا في بعض .. كانت النترا الجديدة .. هو طبعا وقف فجأة ولكن انا اعتبرت ان الخطا خطاي لأني مكنتش مركز 100% في الطريق .. و انا عموما مبحبش المشاكل و كل حاجة تخلص بالتفاهم

نزلت من العربية .. لقيت راجل في حدود 45 سنة كدة .. و كان راكب معاه واحد عربي فا فهمت ان دي عربية شركة سياحة و ان هو سواق عالعربية .. قلتله معلش يا استاذ انا اسف انا عارف انا اللي غلطان
هو (وبطريقة سوقية جدا) : و اصرفه منين اسفك ده يعني !؟
انا : يا سيدي مش عايزك تصرفه من حتة لو ليك حق هتاخده .. اركن علي جنب و نخلص الموضوع بالتفاهم انشاء الله
هو : اركن ايه .. دنا مش هتحرك من هنا .. لازم المرور ييجي !! يا اما تجبلي اكصدام جديد !!
انا : اكصدام جديد ؟! ليه هو ده حصل فيه ايه !؟ دنا ممكن ارده بأيدي !! و هو اصلا هيتعمل بميا سخنة و يرجع زي مكان و يترش لو عايز
هو : انا مالي انا بالكلام ده .. انا لو رحت التوكيل هيكلفني مش اقل من الف جنيه ! انا مش هتحرك الا يا تديني فلوسي يا تجيب رخصتك و تيجي معايا التوكيل يا اما المرور ييجي
انا : انت عايز تحل المشكلة ولا عايز تعمل مشكلة ؟
هو : يعني انت تخبطني و كمان مش عاجبك !
انا : طب انت مأمن عالعربية ؟
هو : لا مش مأمن عالعربية !

المهم حسيت ان الراجل عايز يطلع مصلحة عليا و اما شاف سني صغير قالك ده اهبل بقي و اهله بيدوله شئ و شويات كل يوم و مش فارقة معاه
قلتله طب بص .. هات المرور .. انا قاعد في العربية .. و دخلت العربية .. و كل ده و الشارع واقف (شارع رئيسي !) لانه مش عايز يتحرك

شوية و العربي ده جالي قاللي يا سيدي اعطيله 250 جنيه خلينا نمشي .. فا بقوله علي اساس ايه 250 جنيه !؟ هو انا اروح ارمي عربيتي ادام اي حد عشان يخبطبها و اقوله هات الف جنيه و مشيني ! و بعدين طريقته اللي بيتكلم بيها .. خليه يجيب المرور احسن

وقفنا شوية كدة لحد ما امين شرطة جه لوحده لأن الحتة دي قلق اصلا المنصة قريبة و ارض المعارض و قاعة المؤتمرات .. منطقة حيوية
المهم عمل محضر .. و سأله انت مأمن عالعربية ؟ سكت شوية و قاله اه .. قلتله يعني مكانش كلامك .. و بعدين طالما انت مأمن عليها حرام عليك بجد اللي انت بتعمله ده .. قاللي يعني هو التامين هيجبلي حقي ؟! قلتله و لو مش هيجيبه امال بنعمله ليه !؟ المهم امين الشرطة حس انه راجل نتن .. خصوصا انه كمان قاله ده خبطني فجأة و انا ماشي و مقالش انه فرمل فجأة ولا حاجة .. بس طبعا باين من الخبطة فنيا ان العربية اللي فدام وقفت .. المهم واحد ابن حلال ركن و قالنا انا عندي معرض تأجير عربيات و دي خبطة مفيهاش حاجة و كلها اربة ميا سختة الاكصدام هيفك و تتصلح بكلام فارغ يعني 70 جنيه ولا حاجة .. انا مرضتش ادفع ولا مليم .. مش عشان حاجة بس لأن حسيت ان الفلوس دي بشكل او بأخر رايحة لجيب الراجل مش لتصليح العربية .. و اللي عملته اني كلمت الشركة صاحبة العربية من النمرة اللي كانت محطوطة عالشنطة و خلصت الموضوع بشكل ودي

بس بجد الراجل ندمني اني اعتذرتله و قلتله انا اسف !
يعني غيري بينزل يزعق حتي و هو غلطان و بيمشي بمبدأ خدوهم بالصوت و محدش بيعرف يعمل معاه حاجة
انا عشان حاولت اخلص الموضوع بالمناقشة و كل واحد ياخد حقه .. الراجل طمع و كان عايز يطلع عليا مصلحة !

بجد نفوس الناس بقت .. مش لاقي كلمة توصف !

**mat7oon** · 02-02-2008 03:37 AM

معلش انا لسه حاصلى نفس الكلام النهاردة بس انا اللى اتخبطت ونزلت لقيت العربية سليمة رحت قلت للخبطنى حصل خير و مشيت لانى حسيت انى كنت فعلا غلطان و كابس فرامل جامد.
و متزعلش نفسك حصل خير.

**temoo_110** · 02-02-2008 05:06 AM

واللهى انت عندك حق انا على طول لما اتكلم مع ناس بادب القيهم ناس زبالة بس فى ناس بتتفاهم وبتقدر الكلام انا مش عارف اقولك ايه لانى على طوول بمر بنفس التجربة و لما بدخل فى الناس شمال بصراحة بضايق جدا وبحاول ارضى اللى دخلت فيه شمال باى طريقة فبحاول على قد ما اقدر ابقى هادى واتعمل بهدؤ بس بصراحة هما اللى عاوزين كده
ومتزعلش نفسك كله بيطلع فى الغسيل

**kamalantivirus** · 02-02-2008 05:18 AM

حسبي الله و نعم الوكيل

**Nile_Storm** · 02-02-2008 09:33 AM

المهم عربيتك انت عامله ايه
مش عارف ايه اللي بيحصللك ده من ساعه ماجبت العربيه

**CryptonX** · 02-02-2008 09:35 AM

خذوهم بالصوت يا اخي
انا كنت ماشية في امان الله وواحد لف U-turn من اوسع واحدة و دخل في اخر حارة في الشارع ... دخلت في من الخلف .. و نازل يفولي اني كنت ماشي بسرعة :)

بصراحة لولا اني مش بحبذ ذلك .. بس انك تنزل تاكل الي قدامك في اي حالة هو احسن حل في مصر ز

**memo_hefnawy** · 06-02-2008 11:58 AM

إنت إتصرفت صح و ماتخليش واحد قليل الذوق يقنعك إنك لازم تكون قليل الذوق مع الناس كلها

إنت صح خليك صح

أنا أول ما جيبت عربيتى الحالية - لسه زيرو فى أول إسبوع واحد خبطلى الباب الشمال بتاعى فى ملف يو تيرن و هو سرح جوه الملف هو كان ظابط جيش و راكب لانوس و كنا الصبح الساعه 7

تخيل عربيتك لسه زيرو و عمرك ما عملت أى خبطة حتى و أنا بتعلم سواقه ماخبطش ولا خبطة و يوم ما أجيب زيرو تتخبط ..... فى أول إسبوع ... طبعا شعور زفت على الصبح كمان :(

اللانوس ماحصلوش حاجة و أنا حتة من الباب و حته من الرفرف إتطبقوا

كل إللى عملتوا نزلت و أنا متعصب بس متمالك نفسى و قولت له حرام عليك على الصبح مش تاخد بالك

الراجل قالى أنا آسف و الله و حقك عليا ...رديت عليه قولتله حصل خير إتوكل على الله و مشيت كل ده حصل فى دقيقتين و يمكن أقل - أنا مأمن على العربية فقولت مالهاش لازمة آخد من الراجل أى حاجة ربنا يسهله

مرة تانية قدام بيتى كنت لسه بركن عربية 128 كانت بتاعت أختى جات واحدة راكبة نوبيرا على ما أفتكر كسرتلى الفانوس الخلفى و حكت فى الإكصدام و حكت الرفرف

إكصدام 128 جاب جنب عربيتها كله - كانت بنوته بتاع 24 سنه وقفت و أنا آسفه ماخدتش بالى

أدبها و ردها ذى أدب الراجل و رده خلونى أرد أنا كمان كويس

قولتلها حصل خيير قالتلى أصلحها و أنا آسفه ...قولتلها إتوكلى على الله مش مستاهله

فى كلا الحالتين لو البنت أو الظابط كانوا نزلوا و طبقوا مبدأ خدوهوم بالصوت و الله ماكنت هارحم حد منهم لكن التصرف بأدب و تحضر يجبرك إنك تعاملهم بنفس الأدب و التحضر

**MoToRiZeR** · 06-02-2008 08:01 PM

شكرا لكل ردودكم ياجماعة هي الحمد لله جت سليمة و لكن حرقة الدم
يعني ليه الخروج للشارع بقي مغامرة الواحد ميعرفش هتخلص بأيه و بكام خناقة و بكام خبطة !

يعني لو كان الراجل اتكلم بذوق و منطق من الاول كان ريح نفسه و ريحني .. انما الفهلوة و الاستعباط و قلة الذوق خلتنا وقفنا شارع رئيسي لمدة ساعتين و ضيعنا يوم كامل في الخناق ..