عملت عمليه الغضروف فى ظهرى والحمد لله
بسم الله الرحمن الرحيم
انا شاب عندى 27 سنه وكان عندى غضروف فى ظهرى فى الفقره 4و5 فقلت احكى القصه عشان الاخوه تستفيد
جالى من 5سنين وانا بلعب سله وعملت اشاعه طلع عندى غضروف من الالتواء الى حصل فى ظهرى وانا بلعب والدكتور النادى قالى عمليه قلتله لا وفضلت العب وبعد سنتين تعبت تانى اوى رحت لكذا دكتور كله يقولى مسكنات وعلاج طبيعى وتقويه عضلات الضهر وعملت كل حاجه بس لا جديد وفضلت تعبان ومن حوالى سنه جدى جاله نزيف فى المخ ودكتور كبير عمله العمليه شفط النزيف والحمد لله جدى كويس قلت اروحله رحتله قالى اعمل اشاعه جديده وشافها قالى ايه الى كان مسكتك المهم قالى بلاش مسكان وبلاش علاج طبيعى والعب سباحه بس واستحمل بقا الالم عشان انا مش بفضل العمليه دى اخر مرحله
ومشيت على تعليماته وكنت بلعب سله برضوا هو قالى بطل بس انا مسمعتش الكلام وبعد 6 شهور تعبت اوى ورجلى الاتنين مش قادر احركهم وحرقان ومش عارف انام ولا اقعد ولا امشى رحتله تانى قالى اشاعه جديده عشان نعرف التطورات وشافها قالى خلاص كده مش هتقدر تستحمل الالم غير بمسكنات ومش هتعالجك وهتبوظ معدتك لانك لسه صغير قلتله الى انت شايفه لانى كنت بعيط وانا قدامه مش قادر المهم
عملت العمليه مع انى كنت خايف جدا والناس بتخوفنى بس خلاص مش قادر وبعد مع عملتها راحه تامه لمده شهر نوم ومشى بس مفيش قاعده والحمد لله كانت بتعدى الايام وبحس بتحسن وعدى الشهر قالى راحه تانى لمده شهر مع العلاج ودلوقتى الحمد لله الف حمد والف شكر بقالى 8 شهور عامل العمليه وبقيت انسان طبيعى بمارس حياتى عادى مع الحرص فى عدم شيل حجات تقيله ودفع حجات تقيله تعليمات الدكتور
ولو اى حد عاوز اى خدمه انا تحت امره لانى مجرب الام الظهر وربنا يشفى كل مريض