الموضوع: انا كاره شغلي

ربنا يوفقك

حب ما تعمل حتى تعمل ما تحب

ياعم محدش مستريح فى شغلى أنا بعمل كل يوم 350 كيلو رايح جاى للشغل - بس هعمل إية الحمد لله - وكويس انك شغال إصلا - ركز فى شغلك وبس لغيرك إللى قاعدين من غير شغل وقول الحمد لله

المشاركة الأصلية كتبت بواسطة araberphilosoph

انا ليه كاره شغلي
عشان مش بتاعي
انا بتاع كتب وترجمه
علم ومقارنات
انا مش بتاع سياحه
وكفايه الاستعباد اللي انا بشوفه
مديرك تاج راسك يديك اي عقوبه هو شايفه حتى لو حاجه تافهه محدش بيراجعه
بتتعامل في مصر بلدك علي انك مواطن درجه تالته والاجنبي حياته بل وراحته اهم من حياتك كلها
ليه الموظفين في مكتب استقبال الفنادق مش مسموح ليهم بالجلوس
يعني shift 8 ساعات لازم يقضوهوا وقوف وليه؟؟ الا عشان ستادرد سرفيس!!! (والله في الاردن مش هاقول اوروبا مفيش كلام من ده)
ليه موظفين الفنادفق مش مسموح ليهم ياكلو من المطعم الرئيسى ليه يبقلهم مطعم درجه رابعه؟؟ زي الفيران ليه ميخصصوش ليهم مثلا ربع ساعه بعد مواعيد المطعم ياكلو اكل محترم؟؟
ليه مش مسموح لي ادخل اسرائيل؟؟ (بغض النظر عن موقفي منهم) هم بيخشوا من غير تاشيره وبيعملوا اللي هم عايزينه والمصيبه اللي بيمنعنا مصر مش اسرائيل؟
ليه الاجنبي بيخش مصر من غير تاشيره ومن غير فلوس ؟ ولو حب ياخد تاشيره شهر يدفع 15 دولار بس ؟؟ 15 دولار حرام والله
ليه اسهل حاجه في مصر ان الاقي شغل لاجنبي وباضعاف اضعاف مرتبي لمجرد انه اجنبي؟؟ مع اني باقوم بشغلي احسن منه كتنيير اووي
ليه في اماكن في مصر ممنوع دخول المصريين فيها اه والله ممنوعه علي المصريين (grand casino sharm) علي سبيل المثال وقال ايه عشان القمار حرام فممنوع علي المصريين ومسموح بس للاجانب!!!
ليه وانا بعدي اي كمين لازم يفتشني ويجيب الكلاب تشم العربيه هو انا ايه ؟؟ والاجنبي ميقدرش يفتح بقه معاه
ليه كل شغلتي كدب في كدب وضحك على الدقون وفهلوه
ليه لازم استحمل قرف مدير مبيفهمش حاجه وكل همه اني اقفل زرار القميص اللي فوق عشان standerd
نفسي اربي سكسوكه صغيره بس ممنوع ؟ ممنوع ليه ؟ مزاجه كده بقه
ليه وليه وليه الف ليه
كرهت نفسي مش شغلتي بس

يا باشا اهدى شوية، لازم نبص للأمور نظرة موضوعية، لو سمحتلى هعقب على كام نقطة:

1 - يعني shift 8 ساعات لازم يقضوهوا وقوف وليه؟؟ الا عشان ستادرد سرفيس!!! (والله في الاردن مش هاقول اوروبا مفيش كلام من ده)

موظف الأستقبال ممكن يتعامل مع اكتر من شخص فى نفس الوقت و بيبقى احيان كتير فى تسكين المجموعات قدامه 20 - 30 بنى أدم و لو قعد يبقى لازم كلهم يقعدوا، تخيل بقى كل موظف قادمه 10 - 15 كرسى علشان الظروف.

2 - ليه موظفين الفنادفق مش مسموح ليهم ياكلو من المطعم الرئيسى ليه يبقلهم مطعم درجه رابعه؟؟ زي الفيران ليه ميخصصوش ليهم مثلا ربع ساعه بعد مواعيد المطعم ياكلو اكل محترم؟؟

أولا حكاية درجة رابعة دى تختلف من فندق لفندق، بس المفروض مستواه ميقلش عن الأكل بتاع البيت، بالنسبة للمطعم الرئيسى فى أغلب الفنادق، بيبقى مفتوح 24 ساعة تقريبا و الوقت المتاح بيت تغيير الوجبات اللى بتتقدم من فطار لغدا لعشا مخصص للتنظيف و التجهيز و كمان ما ينفعش تخصص ربع ساعة أو حتى ساعة لأكل الموظفين علشان مش هينفع كلهم يطلعوا راحة الغدا فى خلال نفس الوقت.

3 - ليه مش مسموح لي ادخل اسرائيل؟؟ (بغض النظر عن موقفي منهم) هم بيخشوا من غير تاشيره وبيعملوا اللي هم عايزينه والمصيبه اللي بيمنعنا مصر مش اسرائيل؟

مين قال انك مش مسموح لك تخش اسرائيل، روح السفارة و هيدولك تأشيرة بسهولة و الأسرائيلين اللى بيخشوا سيناء من غير تأشيرة ما ينفعش يدخلوا باقى مصر الا بتأشيرة و دى شروط اتفاقية السلام


4 - ليه في اماكن في مصر ممنوع دخول المصريين فيها اه والله ممنوعه علي المصريين (grand casino sharm) علي سبيل المثال وقال ايه عشان القمار حرام فممنوع علي المصريين ومسموح بس للاجانب!!!

كل الكازينوهات فى مصر كده و دى حاجة متزعلش.


5 - ليه وانا بعدي اي كمين لازم يفتشني ويجيب الكلاب تشم العربيه هو انا ايه ؟؟ والاجنبي ميقدرش يفتح بقه معاه

المفروض كله يتفتش، بس التركيز على المصريين مش غلط، عارف ليه، علشان ميجيش واحد ارهابى يفرقع بمبة و أقعد أنا و أنت و غيرنا من اللى بيوتهم مفتوحة من ورا السياحة نغنى ظلموه، المفروض نشارك الشرطة فى تحمل المسؤولية مادام لمصلحتنا.


6 - ليه لازم استحمل قرف مدير مبيفهمش حاجه وكل همه اني اقفل زرار القميص اللي فوق عشان standerd
نفسي اربي سكسوكه صغيره بس ممنوع ؟ ممنوع ليه ؟ مزاجه كده بقه

أنا مقدرش احكم المدير بتاعك بيفهم و لا ما بيفهمش، بس هو من الأخر مديرك، يعنى كلمته ليها احترامها و خصوصا الموضوع بتاع ال standerd و السكسوكة، لأن مظهر العاملين فى صناعة الضيافة لازم يكون موحد، مش فى اللبس بس، كمان فى عدم وجود صفات تميز اى حد عن التانى زى السكسوكة و السوالف الطويلة و الشعر الطويل او الزيرو .... الخ الخ الخ، لأن الضيف او العميل المفروض انه ما يتعاملش مع افراد، بل بيتعامل مع مؤسسسة، يعنى حسام و أحمد و محمد و هانى مالهمش وجود، كلهم اسمهم شركة (....) للسياحة أو فندق (......) و علشان كده لو نقدر نخلى كل العاملين توائم، هنعملها.