بمناسبة موضوع (مشكلة الخوازيق الي في الطريق)
يوم الاتنين علي طريق السويس و انت راجع من السويس الساعه 9 باليل بعد يوم شاق من المحاضرات و السكاشن في كلية هندسة بترول ....
انا و 2 صحابي في عربيه واحد صاحبي و ماشين تقريبا علي 90, الطريق ده يا جماعة بنمشي عليه تقريبا يوميا مرتين , من اربع سنين , و بعدين بين بوابة بدر و الشروق 2 ماشين في امان الله و الاقيلك العربيه واقعه في حفرة في الطريق, و ده كان أخر حاجه دريت بيها في اليوم اللطيف ده...
صحيت لقيت نفسي علي الارض و ناس كتير حواليا و لقيت واحد من الاتنين الي كانوا معايا برضوا نايم علي الارض و الناس بتفوقوا , و التاني كويس الحمد لله , ببص علي العربيه لقيتها حاضنه عمود نور , طيب الكلام ده كلوا حصل امتي و ازاي؟؟؟
الي اتحكالي بعد كده (لان انا الوحيد الي غبت عن الوعي في الموضوع ده و مش فاهم لغاية دلوقت ليه؟؟) ان الحفرة اتسببت في فرقعة الكاوتش (هي زي فتحة بلاعه كده بس هيا طبعا مش فتحة بلاعه عشان مفيش بلاعات علي الصحراوي ) و العربيه قعدت تلف حوالين نفسها شوية و بعدين دخلت في العمود, طيب مين السبب في الي حصل ده؟؟ المفروض والله حد يتحاسب , طبعا ده قضاء و قدر بس لازم ناخد بالاسباب , طيب اسبابنا اننا نمشي علي 90 و بالهداوة و واحده واحده طيب اسباب البلد فين ؟؟ هي خلاص بلدنا بقت بتموتنا؟؟؟
انا رأي الحمد لله ان العمود ده منع ان العربيه تتقلب او تنزل في الرمل علي جنب الطريق , و نتايج الحادثه دمار العربيه و جرح قطعي في الدقن عندي و في الانف عند صاحبي و التالت نزيف في المخ:36_7_4[1]:الحمد لله علي كل شئ