السلام عليكم ورحمة الله وبركاته ... عندي مشكلة في الشيفروليه لانوس 2009 وبصراحة دخت

**MIMIC** · 11-05-2010 12:18 PM

السلام عليكم ورحمة الله وبركاته ... عندي مشكلة في الشيفروليه لانوس 2009 وبصراحة دخت ومش عارف اعمل ايه .... انا يا جماعة عملت حدسة بالعربية دخل فيا نص نقل من ناحية السواق المهم انا اتخرشمت وهوا طبعا محصلوش شيء ... وبعد كده ... لاقيت الخسائر كالآتي :
العجلة الشمال اتلوحت خالص والكوبلن ملص من الفتيس ولاقيت زيت مغرق الأرض .. المهم انا وديت العربية لواحد معرفة فجبت الحاجات الآتيه :
رفرف شمال + مساعد شمال + مقص شمال وقالي ان الركبة كان فيها شرخ او قطع في الودنة بتاعتها واتلحم .. طبعا انا لا افقه اي شيئ من اللي كان بيقولو ..
المهم صلحت العربية ومشيت بيها فترة حوالي 20 يوم امبارح 10/5/2010 روحت اعمل صيانه ال 35 ألف في اوتو مستر بتاع الحي السابع وعملت شيك اب كامل على العربية ومطلعوش فيها الهوى .. وانا انبصت جدا بس وللأسف النهارده وانا رايح الشغل جي على طريق مصر السويس سمعت صوت كأن فيه حد بيخبط في اسفل السيارة من الناحية الشمال اللي اتعملت فيها التصليحات بشكوش يعني صوت خبطه مش مستمره بس هيا بتروح وتيجي وانا بركن العربية عند الشغل وبلف سمعت نفس الخبطة وبصراحة انا محتار ومش عارف اعمل ايه ؟؟ لأني خايف وانا ماشي ألاقي العجلة او المقص اتقطم مني وبقيت بسحف على الأرض زي ما بنشوف العربيات اللادا بيحصلها ... وانا خوفي كلو أني بيكون معايا زوجتي وبنتي وانا باجي من مدينة الشروق فبخاف من الطريق ده لا يحصل مع الواحد حاجة فيه فأرجوكم حد يدلني اعمل ايه ..
بالمناسبة انا لما رحت اظبط زوايا عند اشرفكو اللي في السابع قالي العربية دي كان فيها شغل في الناحية الشمال والكاوتش عايز زرجينه سنتي إلا ربع بس الزرجينة دي مش عندي انا .. فهل لهاذ الموضوع علاقة بصوت الطقة اللي بسمعها مع المشي او مع اللف وبالمناسبة هيا مش صوت مستمر هيا كأن طوبة او زلطة رزعت في الناحية الشمال على غفلة . أرجوكم افيدوني لأني لا افقه شيئ في السيارات.. يعني ايه الحل أروح لمين او اعمل ايه ..

**alaasaid** · 11-05-2010 12:43 PM

السلام عليكم و رحمة الله و بركاتة ,

انا برضة ساكن فى الشروق و شغلى فى العاشر من رمضان , و الحمد الله انك بخير بعد الحادثة و ان شاء الله الزملاء هيردوا عليك رد وافى .

**khalid9411** · 11-05-2010 12:45 PM

اولا / حمدا لله على سلامتك وفداك اى شئ واى شئ يجى فى الحديد مش مهم
ثانيا/من رائى ان مدام فى شرخ فى الركبة تبقى لازم تتغير لان اللحام فى الاماكن ده مش مضمون وممكن يفك فى اى لحظة نظرا للحمولة عليه
وننتظر اراء خبارئنا الاعزاء

**ahmed_mido1889** · 11-05-2010 12:57 PM

هو الصوت بيجي معاك في الكيرفات والمطبات؟؟؟
ده لو كده يبقي الكوبلن فيه حاجه وعايز يتغير

**MIMIC** · 11-05-2010 01:05 PM

الف الف شكر ليكم يا جماعه والحمد لله على كل شيئ .. بس المهم ان انا خايف اني اغير الركبة لأن لسه متصل بالتوكيل وسمعت ارقام فلكية : بيقولولي الركبة عبارة عن شمعدان وبلي ومساعد والشمعدان بس بحوالي 620 جنيه والبلي بي 180 جنيه..

انا غيرت خلاص المساعد .. وبصراحة خايف اغير الشمعدان .. لأني كان عندي عربية هيونداي قبلها وبرضو عملت يها حدسة ههههههههههههه شكلي موعود ولله الحمد طلعت سليم فغيرت برضو الشمعدان بس للأسف غيرت بعدها 6 مرات البلي اللي بيتكبس ومره وانا ماشي على الدائري لاقيت الكاوتش الشمال برضو بالعربية الأكسنت الي غيرتلها الشمعدان قفش وحجر بعد تغيير البلي وكأني ضربت فرامل والعربية مبقتش عايزة تتحرك من مكانها ..واتقالي ان البلي فرط فأنا خايف ومش عارف اعمل ايه ...
ويا ترى اجيب الركبة منين واجيب معاها شمعدان ولا لأ ؟؟ وكمان مين اللي يركبها ميكانيكي ولا عفشجي ؟؟ وكمان انا والله ما عرفش حد كويس كل لما اروح عند واحد اطلع زبون يعني بيتضحك عليا جدا جدا فلو ممكن حد يفيدني اروح عند مين راجل يكون عندو ضمير وايدو كويسه ...

**MIMIC** · 11-05-2010 01:07 PM

لأ الكوبلن يا جماعه لما ملص من الفتيس طلع سليم ومفيهوش الهوى هوا الصوت بيحصل في اوقات مختلفة صوت الطقة دي جه معايا في ملف واحد ولما جيت احرك العربيه واركنها مع لف الدركسيون ناحية اليمين وكمان لما اخدت بيه الفواصل الأسمنت اللي بتكون محطوطه على الأرض الرفيعه دي ..

**MIMIC** · 11-05-2010 01:28 PM

دي صورة للعربية يمكن حد يقدر يوصل للي انا اقصده وهتلاقو في الصورة دي شكل الكوبلن اللي واقع على الارض

**MIMIC** · 11-05-2010 03:13 PM

يا جماعة من فضلكم حد يرد عليا الله يبارك فيكم

**Sherif Khalifa** · 11-05-2010 06:09 PM

حضرتك اشترى الركبة من برة ممكن تكون ارخص
ابعد عن اللحامات الى معمولة دى علشان خطر جدا
هتعمل زى اللادا فعلا

سعر الركبة بمشتملاتها انا شايفة معقول بالنسبة لسعر توكيل
اكيد برة ارخص

لو انت بتتعامل مع توكيل هوا يركبها
لو ملكش ضمان اى عفشجى او ميكانيكى يركبها