الموضوع: هل يمكن اصلاح عوامه البنزين

العوامات غالبا فى العربيات القديمة باظت ارمي و هات جديد بالنسبة للتصليح معتقدش ان ممكن صنايعى يعملهالك ( دة لو عرف اساس )
.
طب ما تدور على السبب الى بيخلى العوامة تبووظ مش ممكن يكون عندك مشكلة بتخليها بتبوظ!

العوامات الجديده بتبقى شغاله بره اجى احطها فى التنك وامشي بيها واجى افول القراءة تعلق اما تدنها معلمه على ال 3/4 او تعلم على الربع فاظن دى مشكله ف تصميم العوامه نفسها (انحنائتها) فعاوز اركب العوامه الاصليه اللى كانت فيها وانا فكتها علشان باظت
فهل ينفع اصلحها
فيه واحد قال لى ان السلك ده متعاير وصعب جدا تجيب زيه او تلحمه لان له مقاومه محسوبه و معايرة محسوبه

الحمد لله يا جماعه الجمعه اللى فاتت عرفت اهرب من الشغل شوية واخيرا اخدت يوم جمعه اجازة وقولت لازم مش اضيعه على الفاضي فقولت لازم اهتم شوية بالعربية فكان عندى عوامه البنزين شغاله (بس مش بتعلم صح ) مع ان الكهربائي كان مركب واحده جديده وكنت رحت للكهربائي تانى علشان يضبطها وفكها و ركبها تانى وبرضه نفس النتيجه المهم قولت لازم احط حد للموضوع ده بنفسي (يعنى بصفتى خبير نووي ههههه) نزلت بعد الجمعه فكيت العوامه ورفعتها فى الهوا جنب العوامه القديمه و فحصتهم مع بعض و بنظرة ثاقبة ( مقتبسها من ادهم صبري) عرفت فين العله اتاري العوامه الجديده تصميمها مش زي العوامه القديمه العوامه الجديده نفس طول العوامه القديمه اه والعلبه بتاعتها مكتوب عليها بالعربي انها تركي ( اقطع دراعى انها صينى) و انها لفيات 131 بس فيه اختلافين جوهيرين بينهم هما الاتنين
اول اختلاف ان اماكن اخرام المسامير اللى بتستخدم لتثبيت العوامه فى التنك مختلفة عن اماكن الاخرام فى العوامه القديمه ( اختلاف مش باين قوى ولكنه مع الاختلاف التاني يأكد ان الناس اللى بيصنعوا دول ناس ولاد حلال )
ثانى اختلاف هوا فى تكسيحه العوامه نفسها و اتجاهات لوى الماسورة اللى فيها مختلفة تماما عن العوامه القديمه ( ربنا يرحمنا من الصينى والغش والغشاشين)

وبجمع الاختلافين مع بعض نشوف ان بتسقيط العوامه الجديده فى التنك و ادخال اخرام العوامه فى مسامير التنك فان اتجاه العوامه هنا جوه التنك يكون مختلف عن مكان القديمه ان سقطناها مكانها و كمان اختلاف اتجاهات لويات ماسورة العوامه فكده نلاقى ان بالونه العوامه بتخبط فى جدران التنك ومش واخده راحتها فى الصعود او النزول وعلشان كده القراءة ثابته عندى

فكان الحل انى كسحت ماسورة العوامه الجديده وخليت اتجاهات ثنى الماسورة اشبه بالماسورة فى العوامه القديمه وظبط حركه البالونه واتاكدت ان مفيش حاجه من اللى عملته واقفة فى سكتها وهيا طالعه او نازله و توكلت على الله وركبت العوامه
والحمد لله اشتغلت وقرأت بس مديه قراءة زياده شوية و رحت فولت العداد رفع معايا وكله تمام الحمد لله مستنى لسه بقى لما امشي بيها والبنزين يقل من التنك واشوفها هتفضل شغاله ولا ايه

موضوع العوامه ده رحت فيه ل 2 كهربائية والاتنين مش كانوا ملاحظين العيب ده وكانوا بيقولوا ان المكبس هوا اللى بايظ

الحل ده لجأت له بعد ان دورت عند بتوع قطع الغيار عن عوامه تكون ايطالي او محترمه وبنت ناس ومش لاقيت واحد بس قال لى ونصحنى وقال كل اللى فى المحافظة صينى مهما اتغيرت العلبه

بص يا برنس انا اعرف واحد بيصلح العوامات وبيظبط الامبير البنزين والكل حاجة وانا كانت عندي نفس المشكلة بس الحمد لله ظبطتها وخليتها زي الفل وشغاله الحمد الله معايا بقالها سنة ونص

المشاركة الأصلية كتبت بواسطة dobiues

بص يا برنس انا اعرف واحد بيصلح العوامات وبيظبط الامبير البنزين والكل حاجة وانا كانت عندي نفس المشكلة بس الحمد لله ظبطتها وخليتها زي الفل وشغاله الحمد الله معايا بقالها سنة ونص

ياريت تدلنا على الراجل دة عنوانةة أو رقم تليفونة لو سمحت

معلومه لسه عارفها اني لقيت واحد بيلف عوامات البنزين للعربية بمعنى بيصلحها وده هو نفسه بتاع تصليح عدادت العربية ولما سئلته العوامه تتصلح بكام قال لي ب 25 بس لسه مش رحت له بالعوامه القديمه علشان يصلحها

متابع يا جماعه الخير و منتظر معلومات عن اللى بيصلح عوامه البنزين.