خلي بالك قبل ما تشتري مستعمل

**yousef1978** · 11-05-2010 02:16 PM

السلام عليكم ورحمة الله وبركاته

طبعا شراء سيارة مستعمله قد يكون هو الإختيار الأمثل للكثير مننا

لكن لازم نلفت نظركم إن فيه احتياطات وشروط واختبارات مهمة جدا جدا قبل ما تشتري اي سيارة مستعمله بدل ما تلبس في سيارة تكرهك حياتك وتطلع عنيك في التصليح وساعتها تندم في لحظه لا يفيد فيها الندم

خليني أشرحلكم إختبار مهم جدا
وهو حرارة الماكينة مع تشغيل المكيف

ساعات تكون الماكينة بها وش السلندر بيسرب ميه وقد يكون مفكوك قبل كده وما ينفعش يتمسح تاني - يعني الماكينة عايزه تتبدل بالكامل

والسيارة موجود فيها مكيف
فيقوم صاحب السيارة يفضي المكيف من الغاز بحيث يعطله فلما تروح تفحص السيارة وتمشي بيها شوية بدون مكيف - حرارة السيارة مش هتلاحظ إن الحرارة عالية كتير

لما تسأل صاحب السيارة عن المكيف هيقولك عايز بس يتشحن غاز وممكن كمان يقولك المكيف عطلان بالكامل ولو عايز تخصم تمن الكمبروسور والتصليح اخصمه وهو بيكون كده عايز يضحي بخصم المكيف مقابل إنك ما تلاحظش ان الماكينه خربانة

فنصيحة مني إنك لو عايز تشتري سيارة بيها مكيف أو كان فيها مكيف ومتشال منها إنك تشترط تصليح المكيف وتشغيله في النهار وما تقبلش أي مبرر ولازم تسأل نفسك السؤال ده
لو هو فعلا عايز يتشحن غاز بمائة جنيه صاحب العربية ما شحنهوش ليه قبل ما يعرضها للبيع ؟؟؟؟

والسلام ختام

**eino666** · 11-05-2010 04:09 PM

واضح جدا ان حضرتك مقروص قرصة جامدة فى الموضوع ده
ربنا يكفينا واياكم شر الناس النصابة و الجشعة اللى ماعندهمش ضمير وبيقبلوا المال الحرام على نفسهم وعلى اولادهم
........................
محمود عينو