الموضوع: فرقعة فى الشكمان + مشكلة فى السحب

السلام عليكم ورحمة الله

انا عندى مشكلتين فى العربية بقالهم معايا سنة ونص تقريبا ومفيش حل. مبدأياً انا معايا كيا سبكترا موديل 2003 مانيوال , ومغير الموتور من سنة ونص (جبت موتور استيراد) لان الموتور فوت , وكمان فى خلال السنة ونص دول غيرت الحاجات دى فى سبيل حل المشكلتين اللى عندى :
دينامو .. بوبينا .. تانك بنزين .. بوجيهات .. اسلاك بوجيهات .. شكمان كامل .. نظفت رشاشات الحقن .. حساس اكسجين (حساس الشكمان) .. وكمان حطيت العربية على الكمبيوتر 3 مرات و مش بتطلع اى حاجة غلط (كانت بتطلع حساس اكسجين بس ,ولما غيرتة بقت مش بش بتدى اى حاجة)


اولا : فرقعة من الشكمان
لما بدوس بنزين جامد والعربية واقفة , بيحصل صوت فى الشكمان كأنة حاجة راجعه , وفى اخر الصوت دة فرقعة .. ولما بابقى ماشى وجايب نقله و اسيب رجلى من على الدبرياج, يحصل نفس الموضوع , صوت تكتكة فى الشكمان كأن فيه هواء راجع منه وفى الاخر تحصل صوت فرقعه. لو دوست دبرياج او مورت ميطلعش الصوت ده خالص. عشان كده انا على طول لما اجى اهدى السرعة بمور.

فى خلال مشوارى الطويل مع المشكلة دى ,الناس استقرت تقريبا على سبب المشكلة لكن ميعرفوش الحل ايه. السبب هو انه البنزين مش بيتحرق كله او البنزين اللى بيخش غرفة الحرق اكتر من الازم (ليه!! محدش عارف) , وعشان كده الجزء اللى مش بيتحرق ده بيرجع عن طريق الشكمان وبيعمل صوت الطقطقة وبعدين الفرقعة دى.

الجميل و الغريب بقى ان المشكلة دى بتحصل بنسبة 100% لما بيكون تانك البنزين مليان . لما بيكون فيه 10 او 15 لتر مثلا بتحصل الفرقعة دى بنسبة 60% , ايه العلاقة !! الله اعلم بردو... وعشان كده انا مش بفوول التانك ابدا , علطول مقضيها 20 لتر


ثانيا : السحب
حالتين
فى الشتا لو مسخنتش العربية كويس ومشيت بيها قبل ما مؤشر الحرارة يرتفع. او فى الصيف لو فتحت التكييف.

على الأولانى والتانى العربية بتتخنق وتحس انها من قوة الخنقة بترجع سنه لورا , ولو دوست بنزين على الاخر مفيش اى استجابه , تعد كده 4 او 5 ثوانى وبعدين تبدأ تستجيب و تمشى عادى. مع التكييف علطول بتعمل كده , انما فى الشتا كانت بتعمل كده وهى باردة بس , لما تسخن خلاص تروح المشكله. وعشان كده بضطر وانا مشغل التكييف انى احرق على دواسة البنزين جامد عشان اتفادى انها تتخنق كده.

المشاركة الأصلية كتبت بواسطة samirayad

لا تغير طلمبه ولا تجرب طلمبه تانيه ولا تتعب نفسك

خللى كل حاجتك زى ماهى والله كريم

طيب و انت مزعل نفسك ليه ؟؟؟

كل الموضوع انى فلست خلاااااص , مش معايا تانى اجرب
لو معاك سلفنى بقى او هاتلى طلمبه هديه فى عيد ميلادى