الموضوع: ده مبقاش منتدى يا جماعة ......

ده فعلا مبقاش منتدي

..
..

ده بقى اكتر من كدة بكتير اوي ...
ازاي الواحد يرتبط بالشكل العجيب ده بناس عمره ما شافها ولا سمع صوتها ولا اتعامل معاها ؟
ازاي بقينا نحب ونتفاعل ونتعاطف ونحزن .... الكترونيا ؟
ازاي ناس بتسيب شغلها وحياتها وتفرغ نفسها علشان تروح تساعد زميل في محنة ..... وهما عمرهم ماشافوه؟
ازاي ناس تترك عملها واسرتها وتروح تتبرع بدمها وجهدها علشان زميل اول مرة يتعاملو معاه ؟
ازاي قلوبنا بتتعصر وتدعي الله بصدق ودموعنا بتذرف حزنا على زميل معظمنا كان اول مرة يسمع اسمه في هذه المحنة ؟
انا كنت دايما شايف ان عيوب النت اكتر كتير من مزاياه
لكن النت اللي كنت بأنتقده ..... طلع وسيلة مؤثرة للتقريب بين نفوس البشر ... طلع وسيلة فعالة لمساعدة الغير .... طلع اداة رهيبة ممكن تساعد على فعل الخير
محمد جمعة كامل على ...... انا مش بس كنت ما شفتهوش قبل كدة ..... انا كنت حتى ما شفتش مشاركات له في المنتدى .... المرة الوحيدة اللي شوفته كانت يوم ما زرته في المستشفى من حوالي 9 ايام
لكنني بكيت عليه كأنه واحد من اهلي ...... لما كنت عنده كنت انا بابكي وهو بيبتسم ويهزر ... كأنه بيضرب المثل في الصبر على البلاء والرضا بقضاء الله
كان نفسي اصلي عليه صلاة الجنازة .... ورتبت اموري على ان اكون هناك قبل العصر وعندما كنت اهم بالانطلاق تلقيت مكالمة من زميلنا العزيز هشام رمضان يخبرني باهم انهو اجراءات المستشفى بأسرع من المتوقع وصلو عليه الساعة الثانية والنصف وانطلقو سريعا لكي يذهبو به الى حيث سيدفن في المنيا ..... كان نفسي اكون معاهم في الصلاة والدفن .... هذا ابسط حقوقه على كأنسان وكمسلم وكزميل .... قدر الله وماشاء فعل
رحمة الله عليك يا محمد ...... اللهم اجعل الليلة هي اسعد لياليه وانقله من ضيق اللحود الى جنات الخلود يا رحيم يا ودود

لكن يا جماعة فعلا ...... ده مبقاش منتدي .... ده بقى بيت ..... اسرة .....قرية صغيرة ..... انا حاسس بيه كدة
وحاسس ان الناس اللي فيه دول زي اهلي ...... لو حد من زمايلي زعلان باكون زعلان لزعله .... وبافرح لفرحه
الزميلات الاعزاء باحس انهم اخواتي الصغيرات .... لو حد اتعرضلهم باي مضايقة ح اتخانق معاه .... كأنهن قرايبي او جيراني
هوا لسة فيه كدة في الزمن ده ؟؟ لسة فيه حب ومودة بدون اي مصالح ولا اغراض ولا استفادة ؟
والله تذكرت احاديث الحب في الله
عن ابي هريرة رضي الله عنه :قال قال رسول الله صلى الله عهليه وسلم "ان الله يقول يوم القيامة: اين المتحابون بجلالي اليوم أظلهم في ظلي يوم لا ظل إلا ظلي "
عن معاذ بن جبل رضي الله عنه قال : سمعت رسول الله صلى الله عليه وسلم يقول": قال الله عز وجل: المتحابون في جلالي لهم منابر من نور يغبطهم النبيون و الشهداء
موضوع محمد جمعة الله يرحمه اثار في نفسي تساؤلات كتير عن هذا المنتدى ....... مش لاقيلها اجابة