فيرنا 1600 full option مانيوال

**moodbably** · 03-02-2008 12:57 PM

انا هاجيب فيرنا 1600 full option مانيوال بس خايف من موضوع الجنوط . سمعت ان فيها مشاكل وبتعمل برجله في العربيه بعد ال100 هل الموضوع ده اتحل ولا لسه .
عايز اعرف كمان وانا بستلم ايه اهم حاجات لازم اتمم عليها.

**Nile_Storm** · 04-02-2008 06:04 PM

الف الف مبروك مقدما
بص ياسيدي انا لسه مستلم فيرنا من اسبوعين يعني سبقتك
موضوع الجنوط ده غالبا اتحل خلاص علي حسب ماسمعت و الكاوتش بأه lassa مش نصر
تشيك علي ايه
الولاعه خلي بالك انا بدات بيها لانها بتتنسي ساعات بس متقلقش بيجيبوهلك برضه
الاستبن
الكوريك
غلبه وش الكاسيت
ضمان الكاسيت و البطاريه و العربيه طبعا
شنطه العده
شوف العربيه عامله كام كيلو ميزيدوش عن 100
عداد السرعه شغال و عداد المسافات مش مفصول
اكيد تتمم ان مفيهاش خدوش ولا حاجه و تتاكد من حروف الشنطه و الابواب
تجرب كل زراير التابلوه

و ربنا يباركلك فيها احسنت الاختيار و متسمعش كلام المشككين في العربيه دي ان شاء الله هتريحك جدا و هتحس انه طيعه جدا في ايدك

**analyzer** · 05-02-2008 10:53 AM

الف الف مبروك مقدما
لا تقلق مفيش مشاكل من دى الان
تمم كويس على كل حاجه افحص كويس وافتح الكبوت وبص فيه من جوه وشوف الشنطه كمان ودقق فى اللون علشان لو كانت اتخبطت او اتعمل فيها شغل وده نادرا ما بيحصل

**hesham2h** · 07-02-2008 11:04 AM

وانا كمان لسه مستلمها من كام يوم

وبصراحه العربيه ماشيه معايا 10\10

وناعمه جدا على الطريق

والف مبروك يا باشا

وان شالله ربنا يبارك ليك فيها

ويكفيك شرها

**ddooddyy** · 07-02-2008 03:56 PM

الجنوط فعلاً مش تمام .. بس بالنسبة للمشى العادى مش هاتبان يعنى لحد ال110 لكن بعد كده بتحس برعشة فى العربية ومش ترصيص ولا زوايا ولا كاوتش المشكلة الحقيقية فى الجنوط الرديئة الصغيّرة لأن العربية دى المفروض يركبلها 14" مش 13" بس عمو غبور بيوفر طبعاً عشان يكسب أكتر;)

**aymanassem** · 07-02-2008 08:20 PM

الحمد لله انا لسه مستلمها من يومين .. عربية زي الفل .. الحمدلله .. تمم على الشكل العام من بره .. وعلى وجود جميع الملحقات .. شهادة الضمان و المانيوال .. و ضمان البطارية و الكاسيت و العدة .. والكوريك والاستبن .. ياريت تجرب كل زراير الطابلوه .. وتفتح اي ادراج و تتأكد انها ناعمة .. ياريت تجيب معاك اسطوانة وتجرب الكاسيت و السماعات .. وان كل العدادات شغالة واتاكد ان الكراسي كلها مغلفة .. وكلها سليمة ومش مبقعة ولا حاجة .. وتشوف العداد مايكونش عامل اكتر من 50 كم ولو هتستلمها من غبور من المغزن تكون عاملة اقل .. 20 كم كده ولا حاجة .واحسن لونين .. النبيتي و الفراني الغامق (خد بالك احسن في رمادي فاتح ). والف مبروك مقدماً