السلام عليكم ورحمه الله وبركاته أخواني الكرام
أسعد الله أوقاتكم بكل خيـــر و كتب لكم التوفيق في سائر خطواتكم
بصراحة مشكلتي تبدو هايفة في مجلمها و سهلة الحل
بس للأسف لحد دلوقتي مش لاقي لها حل
عربيتي البيجو الـ 205 ,, كانت ماشية تمام و رايح بها شغلي
فجأة العربية بطلت !!
احاول أدورها ,, مفيش فايدة
حاولت كتيــــــــر جدا ,, برضه نفس الكلام
قولت يمكن البنزين خلص ,, رغم ان التنك فيه حوالي 20 لتر علي قراية العداد
جيبت جركنين , كل واحد 4 لتر و روحت لبنزينة بتاكسي ,, و مليتهم و رجعت للعربية ,, و حطيتهم و كاركت شوية و بدور ,, برضه مفيش شوية
البطارية جديدة و المارش بيقوم ,, بس العربية مش راضية تقوم
قولت يمكن البطارية عايزة وصلة مثلآ :U_thin1[1]: , روحت و جيبت واحد صاحبي بعربيته و عملنا وصلة ,, و برضه ما دارتش
قولت يمكن الكاربراتير مش واصل له بنزين , شيلت فلتر البنزين و قعدت أشفط البنزين من الطرمبة لحد لما طلع البنزين في الخرطوم ,, و ركبت الفلتر (الفلتر لسه مغيره من شهر بس ) و من الناحية التانية من الفلتر قعدت أشفط البنزين لحد لما طلع ,, ووصلت الخرطوم اللي من الفلتر لحد الكاربراتير لعد لما تأكدت انه البنزين ماشي فيه
و أدور ,, برضه مفيش فايدة
فكيت عمة الكاربراتير و حطيت شوية بنزين قد غطا زجاجة ماء فيه,, و دورت ,,
برضه :stink[1]:
زقيناها انا و صاحبي ,, و كل واحد يجرب يدورها شوية , برضه مفيش فايدة ,,
لحد لما ركناها في أول عباس العقاد
الكلام ده من 3 أيام تقريبا
بعدها في نفس الليلة كده سافرت لشغل و لسه راجع النهاردة بعد الصلاة و كنت ساييب العربية مكانها من ساعتها
النهاردة والدي الصبح جاب ميكانيكي قريب من بيتنا و قطروا العربية لورشته
بعد لما كشف ,, بيقول لي انه الموبينة و الاسبراتير الأليكتروني محروق هو و المشط :L_bhuhhh[1]:
بصراحة انا مش مصدق الكلام ده نهائي ,, لآنه مفيش اي مشكلة في الكهرباء لما أطفت لوحدها و كنت مشغل الكاسيت و ماشية تمام و مكنش في اي مشكلة
بعد كده رجع قال انه الموبينة سليمة
و العربية محتاجة أسبراتير و مشط أليكتروني
أو أشتري أسبراتير عادي و موبينة عادية و أبلاتين و كوندينسر
روحت للميكانيكي مع صاحبي ده و قال لي نفس الكلام اللي قاله والدي ,, قولت له شكرا يا عم ,,
وسحبت العربية للبيت من شوية
دلوقتي يا جماعة العيب من ايه في الموضوع ده ؟
البطارية جديدة ,, المارش سليم و بيقوم دايما و العربية كانت بتدور من أول تكة ,,
البوجيهات جديدة من شهر بس و مركب NGK أبو 2 شمعة و أسلاك البوجيهات سليمة
طرمبة البنزين متابعها بأستمرار و لما كنت بسخن العربية قبل لما تقطع و تبطل ,, شايف الطرمبة بتضخ بنزين في الفلتر كويس جدا
حتي اني شفطت البنزين بفمي أحسن يكون في خرطوم مسدود و البنزين مش واصل للكاربراتير , بس كل حاجة تمام
انا مش مقتنع بحوار الأسبراتير و المشط أبدأ
تعتقدوا يكون العيب من ايه ؟
بأنتظاركم و جزاكم الله كل خيــر
