تطليع العفش

**osamaesm** · 16-05-2010 10:12 AM

عليك وعلي ميدان الجامع واتفق معاهم ان هم يقوموا بكل حاجة بما فيها الفك والتركيب للنجارة وخليهم يعاينوا علشان لو محتاج ونش هما يجيوه وقولهم انك ملكش اي دعوة وهتستناهم علي القهوة اللي علي الناصية لغاية ميخلصوا ويندهولك ويقلولك تعلي نام ياباشا
القصة دي بتتكلف حوالي 1500 - 2000 حسب المعاينة
وربنا يوفقك

كده يبقي ان شاء الله اتحلت ميدان الجامع رزي ما حضرتك بتقول هما مسئولين عن كل حاجه
انا قبل كده لما عزلت من سنتين كانت التكاليف في حدود 800او 900 تقريبا غير البهدله فدول لو هيبق 1500 الي 2000 يبقي احسن
بس طبعا ده شامل الفك والتركيب والاونش وكله

**mr_sameh** · 16-05-2010 10:46 AM

الموضوع ده فعلا كنت بدور عليه لاني هنقل قريب في شقه جديده

**shaddadfalcon1** · 16-05-2010 11:24 AM

انا لما نقلت من 4 شهور جبت واحد نجار قريبي فكلي العفش وجبت عربيتنا النص نقل وعربية كمان مع ولاد عمي نزلنا العفش كله وودناه وركبناه والموضوع خلص ب 40 جنيه للنجار و50 للعربيه التانيه و 10 جنيه سندوتشات فول وحاجه سقعه يعني 100 جنيه الموضوع كله
بس بصراحه حيلي اتهد يوميها من الشيل والحط بس اهو برده اهون من الكام الألف
مش كده ولا ايه

**Abdm** · 16-05-2010 02:49 PM

المشاركة الأصلية كتبت بواسطة shaddadfalcon1

انا لما نقلت من 4 شهور جبت واحد نجار قريبي فكلي العفش وجبت عربيتنا النص نقل وعربية كمان مع ولاد عمي نزلنا العفش كله وودناه وركبناه والموضوع خلص ب 40 جنيه للنجار و50 للعربيه التانيه و 10 جنيه سندوتشات فول وحاجه سقعه يعني 100 جنيه الموضوع كله
بس بصراحه حيلي اتهد يوميها من الشيل والحط بس اهو برده اهون من الكام الألف
مش كده ولا ايه

الفكرة دية كويسة قوى وبنعملها عند أى حد عندة فرح ونقل العفش بتاعة وهى عايزة الكترة شوية يعنى عايزة ناس متخصصة أو فاهمين فى تتطليع العفش ويكون معاهم حبل أو سلبة جامدة ويكونوا بيعرفوا يربطوا العفش كويس وكانوا من الجيران وممكن لو عايز تستعين بنجار مع المساعدين بتوعة وبالنسبة للجيران والقرايب فى المناسبات بالذات ما حدش هيتأخر وما فيهاش مصاريف خالص كلها حاجات بسيطة شاى حاجة ساقعة غدوة كلام بسيط
والله الموفق والمستعان

**mobmob2010** · 20-05-2010 06:36 PM

المشاركة الأصلية كتبت بواسطة osamaesm

يا شباب انا بعزل من شقه الي شقه المشكله اني الشقه الجديده السلم يتاع العماره ضيق وفي حجات كتير عندي مش هتنفع تطلع منه ومش عارف اعمل ايه
دورت في علي شركه تطلع العفش قالي احنا هنجي نفك ونغلف وننقل ونطلع وباوناش وحبال بس التكلفه قال بعد المعاينه وقالي تقريبا في حدود 3500 الي 4000
انا مستكترهم قوي ومش عارف اعمل ايه
ياريت لو حد يقدر يساعد يعرف شركه او حاجه
وشكرا

عزلت ولا لسه وعملت ايه؟

**AmatoALLAH** · 21-05-2010 12:24 AM

المشاركة الأصلية كتبت بواسطة مصراوي جدا

انا جربت عربيات نقل العفش اللي في ميدان الجامع

الميزة ان العربية مقفولة ومبطنة من الداخل بالخشب وبالتالي بتحافظ على العفش اكتر من العربيات النصف نقل العادي او الlong bed المفتوح او المحاط بحديد فقط

سعرهم معقول انما مش بيفك ولا يغلف هو هييجي ومعاه اتنين تلاته شيالين عمال عادية ينزلوا العفش ويطلعوه

بخصوص سلم العمارة الضيق انا كنت اتفقت مع شركة في عمارات العبور لديها ونش خاص لتطليع العفش وكان على ما اذكر في حدود 400-500 جنيه انما عمل معايا حركة زبالة وهي انه عمل عقد كتب فيه ان ساعة التأخير بـ 300 جنيه
ولما وصل المكان كانت عربية العفش اتأخرت واصر على بنود العقد 300 جنيه غرامة تأخير

المهم بعد كده عرفت ان عربيات العفش اللي في ميدان الجامع لهم معارف اوناش رفع عفش بأسعار معقولة وبدون غرامات تأخير

يعني بالطريقة دي القصة كلها تتكلف من 800-1500 جنيه حسب العفش والحجم والأماكن والأدوار
انما مش 4000 جنيه كتير

لا فيه ميدان الجامع بيفكوا العفش و يركبوه تاني

**osamaesm** · 27-05-2010 10:38 AM

صباح الفل
رحت امبارح ميدان الجامع
شركه الطحان واتفقت معاهم علي النقل وعلي كله
النقل ةالتطليع والتنزيل والنجار اللي هيفك ويركب 1600 جم
هيستلم مني الحاجه في الشق القديمه ويسلمن الحاجه في الشقه الجديده ان شاء الله
وقالي انا نسئول عن كل شيء واي تلفيات
والتطليع قالي احنا لينا نظره غيرك انتا ممكن تشوف ان الحاجه مش هتنفع تطلع علي السلم احنا لينا نظره تانيه وعامه لو مش هتنفع تطلع علي السلم هما هيبقي عاملين حسابهم و واخدين عده الواجهه معاهم و لوكده هيقلك الحساب هيختلف كام و ان شاء الله مفيش مشاكل
و ربنا يستر

**mobmob2010** · 27-05-2010 07:55 PM

ان شاء الله تعدي علي خير

**osamaesm** · 07-06-2010 10:02 AM

الحمد لله تمت علي خير
كله طلع علي السلم ماعدا كنبه الصالون طلعت من البلكونه وربنا ستر وعدت علي خير
المبلغ كله بالاكراميه 1900 جم
بس الحمد لله مفيش خسائر