الموضوع: فيديو روعة لسحب العربيات

المشاركة الأصلية كتبت بواسطة hobaz

اولا الف شكر ليك يادكتور شريف انك اخدت 10 دقايق من وقت حضرتك لمشاهدة هذا الفيديو.....
انا مع حضرتك ان اللي احنا فيه ده ثقافة شعب بأكمله وصعب جدا تتغير ولكن انا مش فاكر نص الأية بالظبط بس فيما معناه لان يغير الله قوم حتى يغيروا ما في انفسهم فعلى الأقل نبدا احنا بنفسنا اصل مستحيل في يوم تصحى تلاقي ال 80 مليون مصري متغيرين مرة واحدة لازم واحدة واحدة....
انا لو الفيديو ده مفرقش مع اي حد غير عضو واحد بس هبقى مبسوط جدا علشان على الأقل هتلاقي واحد ملتزم في الشارع وبيحترم نفسه ويتقي الله في الناس اللي في الشارع انا مش عارف انا متفائل وعندي امل اوي كده ليه (يمكن علشان لسه 20 سنة وطالب لسه) بس انا وانا سايق في الشارع واشوف العيال الفافي اللي عمالين يشدو ويحرقو في شارع مستحمل عربيتين بالعافية بكون نفسي ارتكب جناية فيهم....
ومن ا؟لأخر ربنا يهديهم ويهدينا كلنا ويرحمنا برحمته....

يا اخى العزيز انا مش باقول اننا مش هانتغير ...

لا يمكن ده قصدى ابدا...


و لكن انا فى عادة سيئة انى دايما فى كلامى لما بانتقد حاجة بيكون قصدى توصيل معنى اضافى بين السطور..

و هنا بين السطور كان قصدى (بجانب نقد السلبيات اللى اتكلمت عنها فى ردى السابق) ان المسألة مش بأننا نشوف كليب و نتعظ منه ، لأ .. لأن عدد قليل فقط اللى هايتأثر ، و كتير هاينسوا ... ده حتى اسم الأنسان هو من النسيان (حسب بعض التفاسير)..

و لكن لما أقول دى ثقافة شعب .. فالمعنى هنا ان دى تصرفات و طبائع و عادات على مر السنين حدثت و تغلغلت الى درجة انها اصبحت واقع و امر مسلم به ، و بالتالى فلن يتغير من شريط فيديو ولا حتى الف ...

مثلا زمان كان فيه شهامة ابن البلد ، و اللى كان يقول يا ناس يلاقى الف يلحقوه ، و دلوقت كل واحد بقى يقول "و انا مالى" ... دى وليدة سنين مش يومين و لا شهرين ... الجيل بتاع الشهامة راح و الجيل بتاع وانا مالى هو اللى جه.. و ده تغييره صعب جدا ، لأن من شب على شئ شاب عليه ، يبقى لازم علشان الشهامة ترجع ان الجيل الجديد يتربى عليها زى زمان.

لازم البداية من الطفولة ... زى ما كنا صغيرين و بنلاقى مكتوب على الجلدة الأخيرة من الكراسة النصائح الهامة زى "اغسل يديك قبل الأكل و بعده ، و اطع اوامر رجل المرور..." الخ .. مش زى دلوقتى بنلاقى تويتى و دباديب و غيره ...

لازم تتغير ثقافة الفتاكة و الفهلوة ، و دى مش هاتتغير فى سواقين دلوقت ، و لكن لازم تتشال من دماغ السواقين اللى هاييجوا بعد كده .. الأجيال اللى جايه ... علشان يبقى احترام الأشارة الحمراء نابع من تعوده على كده من من عسكرى المرور اللى واقف بدفتر المخالفات فى ايده..

لما كل واحد فينا يبدأ يزرع فى ابنه و بنته و اخواته الصغيرين احترام الناس و القوانين و حب الناس لبعضها ... الخ الخ... ساعتها السلوكيات السيئة هاتتغير مغ تقدم الزمن بالأجيال الجديدة المزروع فيها القيم دى... كده نبقى غيرنا انفسنا فعلا..

اما الحل الحالى ففى نظرى بالنظام و القانون اللى مايعرفش فرق بين اى حد ... ساعتها ممكن يبقى فيه نظام .. و لكن لو فيه عدم مساواة فى التطبيق .. اذا هايبقى الحال على ما هو عليه ...

و آسف للأطالة و لكن ارجو اكون وضحت وجهة نظرى

و تحياتى