ما رأيكم فى الاستغلال التجارى لايات القرأن والاحاديث فى مسابقات 0900

منذ فترة قريبة حدث تخطى للخطوط الحمراء فى التعامل مع قدسية القرأن واحترام الاحاديث النبوية من قلة لا تسعى الا للربح
فنراهم الان وقد أدرجوا أجزاء من الايات ضمن مسابقات 0900 واتصل الان والكلام ده
و منهم من أكثر من ذلك يخصص محطة كاملة للقرأن ومن وراءها يتم البزنس
حمل الادعية او حمل الختمة على محمول رقم ....

مين اداهم الحق فى استخدام القرأن بهذه الصورة وليه الجهات المسئولة مثل وزارات الاوقاف بالدول العربية لان ده موجود ومعلن بمحطات كثيرة أو الازهر الشريف
أو دار الفتوى كلهم صامتون
سابدأ بنفسى و سألغى أى محطة بتذيع اعلانات للمسابقات دى

عالم متخلفه

انا سمعت فتوة لشيخ مش فاكراه بصراحة هو مين
بيقول ان مسابقات 0900 دي قمار بمنتهى الصراحة
فما بالك لما تستغل بالقرآن وجوايز الحج والعمرة !!!!!

دي نتيجه طبيعيه للفوضي الشامله في مجتمعنا المصري, المشكله في system واحنا ابعد الناس عن اي نظام في اي مجال

الرأي في هذه المسابقات واضح وصريح
دي ميسر ... يعني قمار
لأن الجوائز بتعطي من حصيلة الاشتراكات والاتصالات
فمابالك انها ميسر وقمار وبتستغل الدين في الترويج لها
اللي مش حرام انها تكون مسابقة عامة والجوائز مقدمة من الأمول ومافيهاش اشتراك ولا جمع اموال
زي المسابقات بتاعت رمضان اللي في اذاعة القرآن الكريم مثلا

اما بقى مين اللي اداهم الحق .....
دول ناس معندهمش اي وازع من دين او ضمير .... وماحدش قالهم لأ..... قامو عملو كدة
واحنا عندنا طالما مش بتتدخل في السياسة وامن الشخصيات الموهمة ..... يبقى مالهمش دعوة
لسة ياما ح نشوف

زي البرنامج الديني الي عشان تتصل بيه لازم تطلب 0900

انا شايف ان الموضوع مش راى ورايك طالما المسابقات دى مستمره دليل على انهم بيكسبوا يبقى فى عقليات كتير ممكن ترمى فلوسها فى المسابقات اللى انا شايف انها قمار مفيش كلام انا عن نفسى لم ادفع ولا نكله فى الاشتغالات دى ومعظم الناس هنا فى مجتمعنا بتدور على المكسب السريع نظرا للظروف الضنك اللى الناس عايشاها ومس بس استغلال الدين دا فى مسابقات والله دمى بتحرق لما بشوفها زى كرومبو وهباب ويجيبلك صوره ويقولك مين صاحبها اصبحنا عقول تافهه وبيستخف بينا اوى

ولا النصاب بتاع تفسير الأحلام - بتاع اتصل ويرد عليك شخصياً !
عاملينله برنامج عشان يضل الناس ويعمل الشويتين بتوعه على الناس الطيبة وكله بيسترزق من كله وخلينا كدة مش نافعين فى حاجة عدلة

اكتر حاجة بتعصبني اعلان العالم معرفش مين فرعون والعالمة معرفش مين للطالع وفك السحر ولستة طويلة كدة
ال عالم ال واشكالهم اعوذ بالله عليها غضب الله

المفروض الحاجات دى تتغلى اصلا فين الرقابة فين الحكومة

الواحد زهق بقا بلاش قرف حاجة تقرف بلد تقرف وعيشة تقرف وفى كل حتة التخلف والجهل واللعب بمشاعر الناس والدين والاخلاق

الله يولع في كل واحد بيساعد فى التخلف ده

الحمد لله أن فيه ناس حاسة بالمشكلة دى ... لانى ملقتيش حد كاتب عنها فى النت عموما ... وبصراحة الموضوع ده مش لازم يتسكت عليه هل فيه حلول أضافية غير مقاطعة القنوات دى ... يعنى هل ممكن نبعث شكاوى لبتوع الرقابة على الاتصالات وشركات المحمول

انا عندي فكرة
ممكن اي زميل يتبرع ويروح لجنة الفتوي بالازهر ويجيب فتوي رسمية بموقف هذة الاعلانات ويتم ارسالها للبرامج الجماهيرية مثل العاشرة مساء والحقيقة والطبعة الاولي و 000 كذلك نشرها وتثبيتها علي المنتدي كدور ريادي وايجابي للمنتدي
وهذا اضعف الايمان

اقتباس:

---

المشاركة الأصلية كتبت بواسطة mobmob2010

انا عندي فكرة
ممكن اي زميل يتبرع ويروح لجنة الفتوي بالازهر ويجيب فتوي رسمية بموقف هذة الاعلانات ويتم ارسالها للبرامج الجماهيرية مثل العاشرة مساء والحقيقة والطبعة الاولي و 000 كذلك نشرها وتثبيتها علي المنتدي كدور ريادي وايجابي للمنتدي
وهذا اضعف الايمان

---

فكرة جيدة بس هو مفيش لجنة تابعة للازهر فى اسكندرية مثلا

لجنة الفتوي موجودة في القاهرة فقط في شارع الازهر

ربنا لا تؤاخذنا بما فعله السفاء منا..............اللهم امين

اللي باستغرب له هل وجد من يتصل بهذه المسابقات الوهمية؟ يعني فيه مسابقة بتقول "الغزوة التي حفر فيها المسلمون الخندق هي: الخندق .. تبوك .. مش عارف ايه" !!!!! استكراد
الأسوأ من كدة اتسخدام الأحاديث والقرءان في ترويج سلع مجهولة (زي إعلان no-pain cream) الذي يبدأ بديباجة دينية ينتقل منها لاستنتاج يبدو فيه هذا الدهان كهدية السماء لمن يشكو من آلام الرقبة، لأنه مصنوع من دهن النعام ... حاجة تقرف بصراحة واستغلال لوازع الدين لدى البسطاء.

اقتباس:

---

المشاركة الأصلية كتبت بواسطة mobmob2010

لجنة الفتوي موجودة في القاهرة فقط في شارع الازهر

---

طيب هل ممكن حد من الزملاء القاهريين يتضامن معانا ويروح يطلب الفتوى لمنع الكلام القاضى ده

اقتباس:

---

المشاركة الأصلية كتبت بواسطة the-hero

ربنا لا تؤاخذنا بما فعله السفاء منا..............اللهم امين

---

والله أنا خايف

اقتباس:

---

المشاركة الأصلية كتبت بواسطة taotao

اللي باستغرب له هل وجد من يتصل بهذه المسابقات الوهمية؟ يعني فيه مسابقة بتقول "الغزوة التي حفر فيها المسلمون الخندق هي: الخندق .. تبوك .. مش عارف ايه" !!!!! استكراد
الأسوأ من كدة اتسخدام الأحاديث والقرءان في ترويج سلع مجهولة (زي إعلان no-pain cream) الذي يبدأ بديباجة دينية ينتقل منها لاستنتاج يبدو فيه هذا الدهان كهدية السماء لمن يشكو من آلام الرقبة، لأنه مصنوع من دهن النعام ... حاجة تقرف بصراحة واستغلال لوازع الدين لدى البسطاء.

---

فعلا لابد من وقفه مع هؤلاء الناس .....ولاد .....

اقتباس:

---

المشاركة الأصلية كتبت بواسطة hany_mohamed

طيب هل ممكن حد من الزملاء القاهريين يتضامن معانا ويروح يطلب الفتوى لمنع الكلام القاضى ده
والله أنا خايف
فعلا لابد من وقفه مع هؤلاء الناس .....ولاد .....

---

الفتوى موجودة بالفعل يا هاني

اقتباس:

---

الأزهر: حج مسابقات 0900 "مشبوه"
صبحي مجاهد


الأزهر أفتى أيضا بعدم جواز جمع تبرعات لمساعدة الفقراء على الحج
الحج عبر المسابقات التي يجريها كثير من وسائل الإعلام في الوقت الراهن وتطلب من المشارك الاتصال برقم محدد والإجابة على سؤال أو أكثر للفوز بفرصة حج بعد إجراء قرعة بين المتصلين.. قد يسقط الفريضة عن صاحبه إلا أن بهذا الحج "شبهة ويبقى على صاحبه إثم المقامرة".

هذه الفتوى صدرت من لجنة الفتوى في الأزهر الشريف ردا على سؤال من أحد المواطنين حول حكم الفوز بالحج في المسابقات الهاتفية التي تجريها وسائل الإعلام والمعروفة في مصر باسم "مسابقات 0900".

وقالت اللجنة في فتواها التي أوضحها الشيخ محمد عبد العزيز أمين عام اللجنة: إن "المسابقات بها نوعان؛ الأول نوع يقوم على المسابقات الدينية التي تحتوي على أسئلة دينية وإجابات ويربح فيها الفائز برحلة الحج لكن دون تربح من تلك المسابقة، حيث يعد الحج هنا من باب الحج على نفقة الغير وهو جائز".

وأضاف: "أما المسابقات التي تقوم على الاتصال فقط بـ(0900) فهذا نوع من المقامرة حيث يكسب شخص في المسابقة، ويغرر بالآخرين للاتصال وتحقيق مكسب للمعلن".

طالع أيضا:
العبيكان: حجك غير مبرور يا "حاج المرور"
المنيع: من حج بدون تصريح "آثم"
ومع ذلك فإن الشيخ عبد العزيز يرى أن "الشخص إذا فاز برحلة الحج (عبر مسابقات 0900) فله أن يؤدي الحج وتسقط به الفريضة مع الشبهة، حيث يبقى عليه إثم المقامرة، فهو كمن حج بمال فيه شبهة".

وأوضح عبد العزيز أن جمهور العلماء قالوا: إن "من حج بمال به شبهة فحجه جائز، وعلى الحاج إثم الشبهة، أما إذا كان الحج من مال حرام فجمهور العلماء قالوا تسقط الفريضة ولكن لا يؤجر صاحبه ويأخذ إثم المال الحرام، فيما رأى آخرون أن الحج هنا باطل".

التبرع لحج الفقراء

وفي سياق متصل، أفتت لجنة الفتوى بالأزهر بعدم جواز جمع تبرعات خيرية لمساعدة الفقراء في أداء فريضة الحج.

وقالت ردا على سؤال من مواطن حول قيام أحد الجمعيات الأهلية بتعليق ملصقات لدعوة أهل الخير للتبرع لحج الفقراء: إن "التبرع لحج الفقراء هو نوع من أنواع التسول لأن الفقير ليس عليه حج، ولا يصح أن تقوم أي جهة بجمع أموال التبرع لتيسير الحج للفقراء، حيث إن الحج مفروض على المستطيع ماليا وبدنيا وأن يأمن الطريق، والفقير سقطت عنه الاستطاعة المالية، ولا ينبغي أن يتم التسول باسم الحج ومساعدة الفقراء لأدائه".

ومع ذلك أوضح الشيخ محمد عبد العزيز أمين اللجنة أنه لو قام شخص ما بمساعدة شخص فقير بنفسه لأداء الحج فلا شيء في ذلك لأنه قام بفعل خير أقدم عليه دون أن يتم التسول منه لصالح هذا الفقير.

---

اقتباس:

---

المشاركة الأصلية كتبت بواسطة أبو حمزة

الفتوى موجودة بالفعل يا هاني

---

الفتوى خاصة بوضوع الحج كجائزة للمسابقات
أما ما نطلبة هو وقف الاستغلال للقرأن والاحاديث فى المسابقات و الفضائيات مثل اتصل بالرقم الفلانى وحمل للشيخ الفلانى دعاء أو قراءة قرأن " ملحوظة سعر الدقيقة جنية ونصف "
مين اداااااااااااااااهم تصريح بأستغلال القرأن كده

واين دور الازهر في هذا الكلام

اقتباس:

---

المشاركة الأصلية كتبت بواسطة elmadawy

واين دور الازهر في هذا الكلام

---

الموضوع مريب مش عارف ليه الازهر لا يتحرك

اللى زاد على الحد كمان وكمان
ان فيه اعلانات نازلة الان بتقول اتصل لتحمل ما تيسر من القرأن الكريم
يعنى معلبين كام اية واتصل لتحملهم على تليفونك
مش عارف استباحة استخدام القرأن فى البزنس ده الناس ساكتة عليه ليه :majd(4):

قمار رسمى .